Paita kwarta lang gihapon!
GIASIKASO na sa Department of Social Welfare and Development sa Central Visayas ang mga bayranan aron makuha na ang nangatanggong nga relief goods sa Cebu International Port sa dakbayan sa Sugbo nga gikan sa lain-laing mga nasod alang sa mga biktima sa bagyong Yolanda.
Si Rosario Bacong, food and nonfood cluster coordinator sa DSWD 7, niingon nga gi-process na sa ilang buhatan ang pagpagawas sa P5.8 milyones nga pundo gikan sa ulohang buhatan.
Matod niya ang maong kantidad maoy ibayad sa mga kompaniya og barko nga maoy nihatod sa mga sinakong bugas gikan sa Algeria paingon dinhi sa Sugbo.
Niadto pang Pebrero, nahiabot sa CIP ang 175 ka con*tainer vans nga gisudlan sa mga bugas gikan sa Algeria.
Apan hangtod karon wala pa maapudapod ngadto sa mga pamilya nga apektado sa super typhoon tu*ngod sa bayranan sa DSWD-7 sa shipping companies ug sa gikinahanglan nga mga dokumento.
Siya nipasabot mobayad sila alang sa “demurrage” o abang sa container vans nga gisudlan sa mga sinakong bugas.
Matag container van adunay abang nga P1,400 matag adlaw, pahibawo ni Bacong.
Sa higayon mabayad na ang maong kantidad, mahatag na ang mga sinakong bugas gikan sa Algeria ngadto sa mga survivor sa bagyong Yolanda.
Mobayad usab sila alang sa service fee ug storage fee sa Oriental Port Allied Services Corp. (OPASCOR).
Siya nipasabot daghang mga dokumento ang iproseso aron ma-facilitate ang pagpagawas sa mga donasyon gikan sa ubang mga nasod.
Human sa bagyong Yolanda, gi-waive ang mga bayranan alang sa donasyon, apan sugod niadtong Pebrero kinahanglan na mobayad ang DSWD 7.
Si Bacong niklaro nga way nalata nga mga donasyon gikan sa ubang mga nasod apan siya niangkon nga mga binotilya sa juice nga gikan sa Espanya ang na-expired niadtong Pebrero 22.
Ang maong mga juice nahiabot sa CIP niadtong Enero 14 ug kuwang sa mga dokumento ug diha na nila nahibaw-an nga expired na kini dihang gibalhin ngadto sa Cebu International Convention Center sa dakbayan sa Mandaue, ang ilang temporaryo nga warehouse, niadtong Mayo 2.
“Mao sad unta nay bantayan sa donor kon food items, at least six months to one year ang expiration...,” nagkanayon si Bacong dihang nahinabi sa Sun.Star Superbalita kagahapon.
Siya di makasulti kon pila ang kantidad sa na-expired nga mga juice.Gawas sa mga sinakong bugas, natanggong usab sa CIP ang usa ka container van nga adunay sud nga mga sinena gikan sa London, duha ka container van gikan sa Kuwait nga adunay sud nga Jerry can, mattresses ug uban pa nga niadtong Mayo 10 nahiabot.sa CIP ug uban pang mga donasyon.
Dugang P14 milyones ang giproseso sa DSWD 7 alang sa ubang mga bayranan niini pagpagawas sa ubang mga donasyon nga natanggong usab sa CIP. (SCG)
Relief goods natanggong | Sun.Star
Relief goods natanggong!
Reply With Quote
Posting Permissions
