naa koy unforgetable experience about hitchhike(angkas) nga akong e-share ninyo.. medyo taas2x ni cya pero cge lng karon raman hehe
=======
somewhere 2004, nagplano mi nga moadto'g Dumaguete kay giinvyt mi sa among amigo nga motan-aw ug gig didto. usa ka gig sa mga puthaw(metal) ang among adtoan. upat mi kabuok. tungod kay kabos lagi ug kulang2x ang among pamasahe, nagkasinabot mi sa akong mga kuyog nga mangangkas(hitch-hike) lang mi ug mga dagkong truck nga mobyahe padulong South hangtod nga makaabot mi sa Santander(gkan diri mosakay nalang ka ug ferry boat padulong sa isla Dumaguete ky duol naman lang na sila. tag 25 ra ang pamasahe atong panahona)
ug dinhi nagsugod ang among adbentura..
alas-dose ang takna sa kaudtohon. diha mi nanukad sa San Carlos-Main. nangita mi ug kaangkasan hangtud naa may nakit-ang truck nga walay sulod ang likod. giduol namo ang driver ug nihangyo mi nga mo-hitch kutob sa among maabtan basta padulong lang ang iyang rota sa South. tuod man nisugot siya apan kutob lang siya sa Minglanilla. wa mi mag duha2x ug sakay kay nakahibalo mi nga mag putol2x gyud ang among byahe tungod kay mangangkas ra lagi mi ug di namo gusto nga masayang ang oras kay layo2x pa ang Dumaguete. pag abot namo sa Minglanilla nikana-ug mi ug nangita ug laing ka-angkasan. sa dihang among nasigpatan ang usa ka dakong truck nga nagpadulong namo, nagdali-dali dayon mi ug tapok daplin sa dalan ug amo kining gipara. mihunong ang truck. napuno kini ug karga sa mga sinakong bugas nga mobyahe padulong sa Carcar. aduna kini'y mga angkas sa likod nga maoy gabantay sa mga sinakong bugas. mihangyo napud mi ug tuod man nisugot ang driver ug iya ming gipasakay sa likod. nalipay kaayo mi atong tungora kay bisan ug wala pami katunga sa among byahe paingon sa Santander, nakahimo gihapon mi ug angkas ug lain na usab nga sakyanan. pag-abot namo sa lungsod sa Carcar mikana-ug mi ug nagpasalamat mi sa driver ug sa mga tawo nga anaa gabantay sa likod. mipahulay kami ug mipalit ug ice water sa kilid2x.
mag alas-tres na ang takna sa kahaponon sa dihang nangita napod mi ug laing ka-angkasan. wala mi pasagdi sa panahon tungod kay nakakita mi ug laing truck nga adunay karga nga balas o bas. amo kining gipara ug mihunong. nangutana mi kung pwede ba mo-hitch ug asa siya padulong.. mitubag siya " o cge sakay lang, adto ko'g Argao paingon!" daw sama sa usa ka tawo nga nakadaug ug lotto ang among gibati. mi-abiba mi ug nagdali dali ug angkas sa likod. wala namo panumbalinga ang bas nga mipilit sa among mga sinena ug kalawasan basta ang importante kay makasakay lang gyud mi. alegre kaayo mi atong tungora. ga-sige mi'g kanta2x sa likod ug ga-sige mig pangatawa samtang nagtan-aw sa mga butang nga among giagi-an. kusog ang hangin sa among palibot ug walay timaan sa kalangitan nga adunay uwan nga mobundak nga maoy makapabalaka namo sa among pagbyahe. pag-abot namo sa lungsod sa Argao nagpasalamat mi sa driver tungod sa kaayo nga iyang gihatag diri kanamo.
nangita napod mi ug laing kaangkasan. pasado alas-kwatro ang takna. gasige mi'g lantaw2x sa layo kng anaa bay magpadulong nga dakong truck sa among agi-anan. mag alas
kwatro y medya na apan wala gihapon mi nakit-an. mingaw ang dalan ug kasagaran sa imong makit-an mga gagmay nalang nga mga sakyanan nga pang "family use" lang. dinhi nagsugod ang among kabalaka kay basin unya'g dili mi makaabot sa katapusang byahe sa ferry boat kung magabhi-an mi'g abot sa Santander. katunga pa lang ang among naagi-an. giuhaw kami ug mura'g hapit na mawad-i ug paglaum nga makaadto pa sa Dumaguete..
pero mura'g gi-swerte mi atong adlawa kay adunay dakong truck nga nagpaingon namo pagka taud2x.. "hala! unsa mana... truck..truck sa beer?!" maoy singgit sa akong kauban. usa kini ka dakong truck nga puno sa beer! gikan pa kini sila nangumpra dinhi sa Cebu ug ila kining dad-on didto sa Dumaguete para ibaligya. pulos mga maayong tawo ang among nasugatan tungod kay wala kini magduha-duha ug pagpasakay namo. makaingon gyud ko nga dakong tabang kini nga gihatag gikan sa kahitas-an. didto mi nila gipalingkod sa atubangan kay duha raman sila ug ganahan sila nga aduna silay mga kauban nga maka-Istorya para dili sila laayan o magduka ba ron sa ilang pagbyahe. lingaw silang ikauban kay sa among obserbar puros man kini mga walay libog. duha lang sila ka tawo, pareho silang driver ug magpuli-puli ni sila ug drive kung kapoyon na ang usa. amo silang gisulti-an mahitungod sa among tuyo sa pag-adto ug Dumaguete. daghan na kuno silang nasugatan sa kadalanan nga pareho namo nga mo-angkas lang para makaabot sa Dumaguete o makaari ba ron ug Cebu gikan sa Dumaguete tungod kay wala lagi igong kwarta nga ikaplete. pwerte gyung alegreha ang among gisakyan tungod kay samtang nagsakay mi ga-sige lang mi ug tagay diha sa atubangan. pagkapa-it raba aning beer kun dili bugnaw. dali rakang mahubog ug magsuka. pero sila nga anad na anang butanga molahutay gyud hangtud nga makaabot sila sa ilang adtoan. upat na ka grande(di bugnaw) ang among nahurot. amo silang gipangutana kng dili ba sila pabayron ani ug miingon sila nga ang ilaha ra daw boss ang bahala. mohunong lang mi para mangihi ug kun mahurot na gani ang beer diha sa among atubangan magkuha napod ang iyang kaubang diver ug laing beer didto sa likod! haskang lawgawa ug mahurot kaha namo ang usa ka truck sa beer sa.. sigarudaong mapatik man gyud mi sa "Guiness Book of World Records" haha! ang akong usa ka kauban naigo na ug ga-sige nag suka2x sa dan samtang nagdagan ang truck. nindot untang ibalibad na ug inom kay nagsugod nasad kog kalipong pero tungod kay naghunahuna pod ko nga malingaw sila mao nga ni-jam nalang pod mi nila agi'g respeto ug aron dili sila malain diri kanamo. nakaingon ko sa akong kaugalingon atong tungora nga makatabang gyud diay nga makat-on tag inom ug beer. hehe.. kusog ug tulin ang among dagan. daghang liko2x, dulhog ug patangas. nindot kaayo lantawn ug hingoson ang hangin sa mga mga baybayon nga among giagi-an kay limpyo kini ug malinawon.
alas7 na sa dihang naabot mi diha sa pantalan sa Santander. lipong2x nami sa kahubog atong tungora. gisakay lang ug barge ang among gisakyan ug modretso na kini sa isla sa Dumaguete sa dili madugay. samtang nagpaabot mi nga mapuno ang barge sa mga truck de karga, nihapit mi ug kaon diha sa kan-anan nga anaa mahimutang kilid sa pantalan ug mipahulay.. mibalik mi sa truck ug miandar na ang makina sa barge nga maoy gisakyan sa truck. makaabot na gyud mi sa Dumaguete. dili na kaayo problema ang pag-abot didto kay aduna may mosugat namo sa pantalan sa Dumaguete nga among mga kaila, ug sila na ang bahala modala namo didto sa gig ug ingon man sa pagkaon ug katulgan. dako kaayo among pasalamat aning duha ka driver nga ani-a sa among atubangan karon. wala mi magdahom nga anaa pa diay mga tawo nga maloloy-on ug kasing2x nga motabang sa mga tawo nga na-stranded diha sa kadalanan.. kung maka eperience man gani ko ug "hitchhike" dili gyud ko makalimot aning hitaboa. usa kini ka panghitabo sa akong kinabuhi nga magpabilin sa akong alimpatakan hangtud sa hangtud ug ingon man niining mga tawhana nga mitabang kanamo ug pagpa-hitch gikan sa San Carlos-Main, Cebu paingon sa isla Dumaguete, dako kaayo mig utang kabubut-on ani nila. hopefully naa pay daghang tawo nga sama ani nila..
======
===