Thursday, November 4, 2010
GIPATAY sa iyang bana ang ig-agaw sa aktres nga si Angel Locsin pinaagi sa pagdunggab ginamit ang pinuti sulod sa ilang balay kagahapon sa alas 10:30 sa buntag sa Sitio Kapatagan, Barangay Perelos, dakbayan sa Carcar.
Selos ang gitumbok nga motibo sa pagpatay samtang nakuha sa mga pulis ang duha ka SIM cards gikan sa underwear sa biktima nga gipaabot nga makagiya kanila sa imbestigasyon.
Si Rachelle Marie Colmenares Salvador Sansan, 28, nagpuyo sa nahisgutang lugar, lumad sa Ginigaran, Negros Occidental, giluba sa banang si Fernando, 44, supplier og mga prutas ug ang tindahan niini nahimutang sa Unit 3 Carbon Public Market, dakbayan sa Sugbo.
Ang suspek dali nga nakasibat. Gihulagway sa kapulisan nga grabe ang kasuko sa suspek sa biktima base sa ilang nakita sa mga samad. Gigulgol ang liog niini ug ang mga samad dinunggaban sa tiyan minglapos sa likod sa lawas samtang duna pay mga samad sa mga kamot timailhan nga nanagang ang biktima. Si SPO1 Rey Fuentes, imbestigador sa Carcar police station nga nahinabi sa Sun.Star Superbalita, nagkanayon nga sa wa pa mahitabo ang krimen, ang mga silingan nakabati sa biktima nga si Rachelle Marie ug Fernando nga nagkaaway.
Matod pa ni Fuentes nga usa sa ilang nahuptan nga saksi si Arsenio Duran, 67, handler og manok sa suspek taga Englis V. Rama, kinsa maoy nakasumbong sa mga silingan.
Ang managtiayon nga negusyante giingong nagkalalis tungod kay ang bana nagselos sa iyang batan-ong asawa gumikan kay nagtuo kini nga dunay laing lalake nga gikabuangan.
Giingong sagad kini madunggan sa mga silingan nga nagduda ang bana nga dunay gyoy lalake ang iyang asawa nga maoy permi awayan sa magtiayon sukad pa sa ilang pagpuyo sa maong lugar.
Si Duran, nga nag-atiman sa mga manok sayo sa buntag, nakabati sa managtiayon nga nagkalalis og maayo tungod sa selos.
Apan sa kahadlok niini nga mograbi ang panag-away sa duha, nidagan kini sa ilang silingan nga si Lope Durado Jr. aron mabadlong. Sila si Fernando ug Durado kasusyo sa ilang negsoyo sa pagpamubuhig mga manok igtatari ug ang suspetsado mopatuo usab kang Durado kon badlongon kon mag-away ang magtiayon. Apan samtang nagkauol si Durado sa balay sa managtiayon, mao na lay iyang nakit-an si Fernando nga daling nisibat palayo sa lugar nga nagsakay sa luho niining sakyanan. Hinungdan nga iyang gisusi ang balay nga abli ang main door. Nasurprisa siya dihang nakita niya si Rachelle Marie diha sa sala nga naglunang sa dugo nga patay na.
Dali silang nanawag og mga pulis, kinsa maoy nanawag sa mga sakop sa Scene of the Crime Office (SOCO) apan nalangay ang pagkuha sa lawas niini sanglit 1:30 na sa hapon niabot ang Soco sa lugar. Pag-abot sa mga pulis sa crime scene naglunang sa dugo ang biktima. Gani wa pa mapawong ang air con sa balay dihang ilang naabtan ang biktima ingon man ang pinuti nga gigamit sa suspetsado.
“Walay laing motibo sa krimen, selos kay ang bana dugay nang nangabubho sa iyang maanyag nga asawa nga dunay lalake. Unya sa ilang sigig lalis naabot sa punto nga nahimo niini ang krimin, murag kapin to sa unom ang samad pagluba,” sumala pa ni SPO1 Fuentes.
Iyang giklaro nga
gwapa ang biktima ug
puti kaayo nga susamag panagwag sa ig-gaw niining si Angel Locsin. Gisusi usab nila karon kon unsay mga mensahe sa cell phone biktima nga makatabang sa ilang imbestigasyon, uban sa mga USB, digital camera.
Apan nakapaikag nilag maayo nga daw dunay gitagoan ang biktima sa iyang bana sanglit dihang gihiling sa punerarya ang lawas, ilang nakuha ang duha ka mga SIM card sa cellphone nga gitagoan sa sulod sa iyang panty.
Gipadayag niya nga pinaagi sa duha ka mga SIM card nga nakuha nga gisulod sa bulsa sa ilawom sa panty makatabang sa imbestigasyon, gawas sa laing duha ka SIM card nga diha sa duha ka mga cellphone.
Nag-hot pursuit ang kapulisan sa Carcar hangtod na dinhi sa dakbayan sa Sugbo sanglit duna kiniy tindahan sa Carbon, ingon man sa dakbayan sa Talisay diin lumad ang suspek.
Original article:
Ig-agaw ni Angel Locsin gipatay sa iyang bana | Sun.Star Network Online
Ig-agaw ni Angel Locsin gipatay sa iyang bana
Posting Permissions
