CEBU, Philippines - Mitanyag na og dakong ganti ang Metro Cebu Water District alang sa makahatag og impormasyon aron masikop ang mga responsable sa sunod-sunod nga pagpangawat sa mga metrohan sa tubig sa Metro Cebu.
Kini human gibutyag sa officer in charge sa public affairs department of MCWD nga si Edwin Correos dihang nahinabi sa
Banat News nga alarming kaayo ang pagsaka sa mga pagpangawat og metrohan sa tubig niining mga panahona.
Matud pa ni Correos nga gikan lang sa petsa 1 hangtud sa tunga-tungang bahin ning buwana moabot na og 200 ka mga kaso sa pagpangawat ang natala nila, mas taas kini itandi sa 30 ngadto sa 40 matag bulan sa nangaging mga bulan.
Nunot niini nagbutang og ganti nga tag P10 mil ang MCWD alang niadtong makahatag og impormasyon aron madakpan ang mga kawatan ug P25 mil alang sa mga polis ug tanod o ni bisan kinsang makatabang nga makapasaka og kaso sa korte batok sa mga kawatan.
Giklaro hinuon ni Correos nga way labot sa nahitabong mga water service interruptions ang mga pagpangawat sa metro sa tubig ilawom sa ilang franchise area sa Metro Cebu.
Kagahapon, usa ka 14-anyos ug 13-anyos ug tag-iya sa junkshop nga si Juanita Jabato ang gisikop sa Investigation and Detection Management Branch (IDMB) sa Cebu City Police Office.
Ang mga bata gipasanginlang maoy tigpanguha og mga metrohan sa tubig sa sitio San Miguel barangay Lorega ug nasakmit usab ang 23 ka mga metrohan sa tubig gikan sa usa ka junkshop ni Jabato.
Si SPO1 Filomeno Mendaros sa IDMB mibutyag nga ilang nasikop ang duruha human usa sa nabiktima midangop sa ilang kauban nga molupyo usab sa maong lugar hinungdan sa gihimong operasyon.
Ang duha mibutyag nga didto nila gibaligya sa Adok Junkshop sa Villagonzalo 2, barangay Tejero nga iya ni Jabato ang mga kinawat.
Si Jabato mihimakak og kasayuran nga dunay gidawat ang iyang mga magbalantay nga mga metrohan sa tubig, mihimakak usab siyang nakaila sa duha ka menor de edad nga nadakpan.
Matud pa niya nga iyang gidid-an ang mga sakop nga manawat og metrohan sa tubig gumikan kay walay mopalit niini.
– Darrel Carumba (BANAT NEWS)
P10 mil ug P25 mil ganti vs. kawatan og meter
Reply With Quote
Posting Permissions
