Tanong: "Sino si Kristo Hesus?"
Sagot: Hindi tulad ng katanungang,"Buhay ba ang Diyos?", iilang tao lamang ang nagtatanong ng,"Sino si Kristo Hesus?". Sapagkat ang lahat halos ay kumikilala na si Hesus ay totoong taong nabuhay at nanirahan sa lupain ng Bayang Israel dalawang libong taon na ang nakararaan. Ang pagtatalo-talo ay nagsisimula kapag ang talakayan ay patungkol sa uri ng pagkatao ni Hesus. Halos lahat ng pangunahing relihiyon ay nagtuturo na si Hesus ay isang propeta, magaling na mangangaral, o taong maka-Diyos. Subalit ang Banal na Kasulatan ay nagpapahayag na ang kaurian ni Kristo Hesus ay higit pa sa pagiging Propeta, mabuting Guro, o taong maka-Diyos.
Sa kanyang aklat na "Mere Christianity", sinulat ni C.S.Lewis ang ganito: "Sinisikap kong pigilan ang sino man sa pagsasabi ng kahangalang parati nang sambitin ng ibang tao tungkol kay Kristo Hesus: 'Handa kong tanggapin si Hesus bilang dakila't marangal na mangangaral, ngunit hindi ko tinatanggap ang pag-angkin niya bilang Diyos.' Iyan ang isang bagay na hindi natin nararapat sabihin. Ang isang pangkaraniwang tao lamang na nagsasabi ng mga ipinahayag ni Hesus ay hindi kailan man maging Dakilang Guro. Maaring siya'y nasisiraan ng bait - - kapantay ng isang nagsasabing siya'y malasadong itlog -- kung di siya'y diyablo ng impiyerno. Kailangan mong mamili - Maaaring ang taong ito ay ang Anak ng Diyos, o dili kaya'y isang baliw o mas masama pa...Busalan mo siyang hangal, duraan mo at patayin; o magpatirapa ka sa kanyang paanan at tawagin siyang Panginoon at Diyos. Ngunit huwag nating tangkilikin ang walang kabuluhang pagturing na siya'y dakilang taong mangangaral lamang. Iyan ay hindi Niya iniwang bukas na maaari nating piliin. Hindi iyan ang layunin Niya".
Kung ganon, sino si Kristo Hesus ayon sa kanyang pag-angkin? Sino Siya ayon sa sinasabi ng Banal na Kasulatan? Una ay tunghayan natin ang sinabi ni Hesus sa Juan 10:30, "Ako at ang Ama ay iisa." Sa unang tingin, tila hindi ito pag-angkin na Siya ay Diyos. Subalit suriin natin ang reaksiyon ng mga Judio, "Hindi dahil sa mabuting gawa kaya ka namin babatuhin, kundi dahil sa paglapastangan mo sa Diyos"(Juan 10:33). Para sa mga Judio, walang alinglangang inangkin ni Hesus na Siya ay Diyos. Sa sumunod na mga talata, hindi itinuwid ni Hesus ang mga Judio tulad halimbawa ng pagsasabing, "Hindi Ko inangking Ako ay Diyos." Ipinamalas lamang niyan na tunay at totoo na si Hesus ay Diyos nang Kanyang ideklara, "Ako at ang Diyos ay iisa"(Juan 10:30). Ang Juan 8:58 ay isa pang halimbawa. Tumugon si Hesus, "Sinasabi Ko sa inyo, bago pa ipinanganak si Abraham, 'Ako'y Ako na!"(Juan 8:58 ). Muling kumuha ng mga bato ang mga Judio at tinangkang ipukol kay Hesus. Ang pahayag ni Hesus ng Kanyang pagkakilanlan bilang "Ako ay si Ako", ay tuwirang paggamit ng Pangalan ng Diyos sa Lumang Tipan (Exodo 3:14). Bakit kailangang muling batuhin ng mga Judio si Hesus kung wala Siyang sinabi na sa paniniwala nila'y panlalait sa Pangalan ng Kataas-taasang Diyos?
Ang sinasabi sa Juan 1:1 ay, "Ang Salita ay Diyos." At sa Juan 1:14, ang sabi ay, "Ang Salita ay nagkatawang tao." Ito'y maliwanag na indikasyon na si Hesus ay Diyos sa kaanyuan ng laman. Ang disipulong si Tomas ay nagdeklara kay Hesus ng ganito, "Aking Panginoon at aking Diyos"(Juan 20:28 ). Si Tomas ay hindi nagkamali upang iwasto ni Hesus. Si apostol Pablo ay naglarawan kay Hesus ng ganito, "...ang ating Dakilang Diyos at Tagapagligtas na si Hesu Kristo..."(Tito 2:13). Gayon din ang sinabi ni apostol Pedro, "...ang ating Diyos at Tagapagligtas na si Hesu Kristo"(2 Pedro 1:1). Ang Diyos Ama ay nagpatotoo rin sa buong pagkakakilanlan ni Hesus, "Ang Iyong Trono, O Diyos ay mananatili magpakailan man, at ang Katuwiran ay mangingibabaw sa Iyong Kaharian."(Awit 45:6). Ang mga Propesiya sa Lumang Tipan ay nagpatalastas ng pagiging Diyos ni Hesus, "Para sa atin, isang sanggol na lalaki ang isisilang, at Siya ang mamamahala sa atin. Siya ang kahanga-hangang Tagapayo, ang makapangyarihang Diyos, walang hanggang Ama, ang Prinsipe ng Kapayapaan"(Isaias 9:6).
Kaya nga't tulad ng pangangatuwiran ni C.S.Lewis, ang pagtitiwala kay Hesus bilang isang mabuting Guro lamang ay hindi iniwang bukas na maaring piliin. Bagkus, maliwanag at walang pagtangging inangkin ni Kristo Hesus na Siya ay Diyos. Kung hindi Siya Diyos, Siya ay sinungaling, samakatuwid hindi Siya Propeta, hindi mabuting Guro, at lalong hindi maka-Diyos. Sa kanilang tangka na magpaliwanag papalayo sa Katotohanan tungkol sa mga pahayag ni Hesus, inangkin ng mga modernong "iskolar" na ang "tunay na Hesus sa kasaysayan" ay hindi totoong nagsabi ng maraming isinulat sa Banal na Kasulatan patungkol sa Kanyang katangian. Sino tayo para mangatuwiran tungkol sa mga salitang pinahayag ni Hesus, at mga salitang hindi Niya sinabi ngunit di umano ay nakasulat? Papaanong ang "iskolar" na halos dalawang libong taon ang agwat sa kapanahunan ni Hesus ay may mas malawak na pananaw at kaalaman kay sa mismong mga tagasunod at kasama-sama Niya na nagsilbi at tinuruan din Niya (Juan 14:26).
Bakit ba napakahalaga ang katanungan tungkol sa tunay na pagkakilanlan ni Kristo Hesus? Bakit makabuluhan na tiyakin kung si Hesus nga ba ay Diyos o hindi? Ang pinakamahalagang kadahilanan kung bakit kailangang Diyos si Hesus ay sapagkat, kung natural at karaniwang tao lamang Siya, ang kamatayan Niya ay hindi magiging sapat upang tubusin ang kasalanan ng buong sangkatauhan (1 Juan 2:2). Tanging Diyos lamang ang mayroong lubos na kakayahan upang mabayaran at iligtas sa walang hanggang kaparusahang dulot ng kasalanan (Roma 5:8; 2 Corinto 5:21). Kinailangang maging Diyos si Hesus upang maging ganap ang kabayaran ng ating mga kasalanan. Kinailangan din na maging tao si Hesus upang danasin ang kamatayan na siyang kabayaran ng kasalanan (Roma 6:23). Ang kaligtasan ay matatamo lamang sa pamamagitan ng pananampalataya kay Kristo Hesus! Ang pagka-Diyos lamang ni Hesus ang tanging daan tungo sa kaligtasan.
Ang pagka-Diyos ni Hesus ang siyang dahilan upang Kanyang iproklama, "Ako ang Daan, ang Katotohanan, at ang Buhay. Walang makapupunta sa Ama kundi sa pamamagitan Ko." (Juan 14:6)
Sino si Kristo Hesus?
Originally Posted by Malic
di ko mainitindihan sa tumang ka libog...
