source:
Dunay HIV magsige og donar og dugo | Sun.Star
Wednesday, May 30, 2012
NAKAPAALARMA ang hinimoan niining usa ka lalaki nga giingong apketado og human immunodeficiency virus (HIV) apan midonar sa iyang dugo labina gyod sa mga major bloodletting nga kalihokan denhi sa siyudad sa Cagayan de Oro.
Si Konsehal Dante Pajo, kinsa chairperson sa City Council committee on health and sanitation, niingon nga ilang gi-classify ang tawo nga lalaki kini basi sa recorded information ug ang dugo nagpostibo atol sa testing.
Apan gipasabot ni Pajo nga dili kaayo nila maila ang maong lalaki tungod kay mogamit man kini og lain laing nga pangalan, address ug gani bisan cell phone numbers. Niini dili kini tracked down.
Gibutyag niini nga magsige kini og donar og dugo matag bulan basi sa recod sa Blood Bank ug Philippine National Red Cross.
Gipadayag ni Pajo nga labihan ka makaalarma ang gihimo niini labina kuyaw kaayo nga mataptan ang mga inosente nga makagamit sa gidonar nga dugo niini.
Nangayo na og police assistance ingon man tabang ngadto sa National Bureau of Investigation (NBI) aron pag imbestigar ug pag-trace sa maong lalaki.
Pasabot ni Pajo nga gikinahanglan niini ang counseling ug treatment ug nanawagan kini niini nga magpakita ug magtabang nga mapugngan ang pagdaghan sa kaso sa HIV.
Apan bisan paman niini, nanawagan gihapon si Pajo sa publiko dili lang kaayo maalarma tungod kay ang dugo nga gikan sa bloodletting activities ang maayong gisusi ug gisiguro nga luwas kining makaabot ngadto sa mga nanginahanglan.
Basi sa talaan nga mokabat na sa 36 ka kaso sa HIV ning siyudad sa Cagayan de Oro.
Kanunay lamang nga mamatikdan ug obserbahon ang ABCD approach aron mapugngan ang HIV.
Ang ABCD approach mao ang “abstain from sexual intercourse; be faithful and eliminate casual partners; use condoms not for birth control but for preventive measure; and do not use drugs or share needles.”
“We also encourage having tests for sexually transmitted infections as early as possible, especially those men having *** with men,” dugang ni Pajo.
(NJM/SVB)
Gipatik sa mantalaang SuperBalita Cagayan de Oro Mayo 31, 2012.