***..

Nagduhiraw sa kangitngit ang galamhan,
ang tahas ugma akong napanglantawan,
matud nila ngadto sa toktok sa himaya,
ang kalipay ug pahiyom mawalay sama.

Gikulbaan kining dughan samtang naghuna-huna,
panahon na gayud aron makab-ot kining paninguha,
dugay na kining pangandoy nga ikaw mahimamat,
hinaot lamang ang takna tukma aron manipalad.

Sa pagsugod pa lamang sa pangandihay,
gihangat na daw walay kusog nga ikasumpay,
lantaw ko na ikaw apan layo imong nahimutangan,
nagbunta-og ug pagka madanihon sa padulngan.

Ang dalan paingon kanimo perting kutasa,
puno sa pagsulay kinning kalag nagkaluya,
apan sa matag higayon nga ikaw sud-ongon,
makapahiyom ako, lugwayan boot mopadayon.

Inanay nisubang ang adlaw mintras naglatas,
gamay na lamang hapit na makab-ot ang tahas,
pipila ka tikang ug mahidool na gayud kanimo,
makab-ot na ikaw, tungason ko nga damgo.


(pipila na kahigayon nadungog ang kaanyag sa Osmeña peak, ug miabot
gayud ang kahigayonan nga matongtong ko ang maong buntod diin
napuno sa kaanyag ang palibot. hinaot sa umaabot makab-ot ko
ang ubang mga pangandoy sama niini nga wala damha.)