Dalit nga pangandoy
by
, 08-15-2014 at 12:34 AM (1152 Views)
Nanamilit ako kaninyo nga may luha nga nidagayday
sa sulod ning galamhan nagbakho ug sa luha nagminatay
daw nawad-an ug paglaom samtang ikaw gisud-ong
ang pinitik ning kasing-kasing sa makadiyot mihunong.
Naninguha apan dili paigo, ang kaninyo akong ikadalit,
tinood sa makadiyot makahupay kini sa inyong kasakit,
dili ako makaharong paglantaw sa imong mga mata,
sa kasinatian naaninaw kong mga palad mo niini abunda.
Sa lain lawak nadungog kong bag-ong nigitib nga bulak,
apan sa dihang gisud-ong ko, daw kuli kini makabuswak,
ang punoan diin kini nagtapot kulang sa kahamtong,
ug kining bulak, nagpangutana ako kun anaa bay kaugmaon.
Pagkapintas na lamang gayud ning kapalaran sa uban,
mahimo ba nga kini unta sila sa kalipay pod mabuligan,
luyo sa mga pahiyom gitagoan na lamang ang gibati,
tungod kay ning takna ang kalig-on ang ilang gipili.
Niuli akong naghinuktok sa kagabhion, naglantaw sa bukid,
mobalik ako sa umaabot aron kining grasya ikapaambit,
paigo na kanako makita ang tam-is ninyong mga pahiyom,
aron kining mga pangandoy ko sa kinabuhi magpadayon.