***..

latagaw akong huna-huna samtang gahangad sa kawanangan,
may dapit nga boot ning kalag maadtoan ug makit-an,
kaanyag nga talagsaon boot ko matilawan ug matagam taman,
ang imong mga hulagway nagpuno sa akong tumang kahinam.

Nahukman kong adtoon ikaw ug sination ang kaanyag,
ngitngit pa dihang milakaw ako ug mipakita na ang kahayag,
dihang naabot ako sa balangay'ng imong nahimutangan,
gibati ko ang kakulba ug matambalan na gayud ang kahinam.

Ang kahayag sa silangan inanay nang lapos sa mga kakahoyan,
ang kaanyag sa kangiob nga imong gitapigan ug gitagoan,
minglutaw ug nangilalak, pagkanindota sud-ongon ang katahom,
bahandi, kinaiyaha'ng boot matagamtam kanunayng gihandum.

Ang pahiyom ko'ng daw abot sa dalunggan, dili tiaw'ng kalipay,
karon taud-taud tagbawon kong kaugalingon ug inanay,
ang kabugnaw na nootsoot ning kalawasan gikan sa busay,
ang tibook sapa ug bukid sa kamadinohon nagdagayday.

Sa katuigang umaabot hinaot magpabilin ang imong katahom,
ampingan sa mga binuhat nga sa kanimo boot mosud-ong,
talagsaon na lamang ug mapasalamaton ako sa kahigayonan,
kining kasinatian may kadasig ug kalipay dili ko makalimtan.