***..

Sayo akong mingbukwas ning lantay bisan sa kaduka,
may bag-ong tahas nga sagubangon alang sa maayong ugma,
makadiyot naghinuktok samtang naglingkod sa katre,
kining pag panimpalad may maayo ba akong maani?

Pil-an na kahigayonan ang milabay ug sa matag paninguha,
miuli nga pakyas, haw-ang ang dughan, huyhoy ang abaga,
may bag-ong kahigayonang makapausab ning kapalaran,
mahimong magmalampuson, modalit ug kalipay ning dughan.

Kaharuhay ang tinguhang makab-ot human ning tanan,
mahupay unta kining mga kasakit nga boot makalimtan,
mahimong ang tubag niini ania na sa akong atubangan,
apan subo, padayong gihiwikan sa maayong kapalaran.

Naanad na sa kaidlas sa kalampusang boot matagamtam,
Ug dili mahimong sa mga pagsulay moatras na lamang,
andam sugabangon mga pagsulay nga wala'y pagkibra,
padayon sa pakigbisog bisan sa ulahing mga ginihawa....


pero sa tinooray perti na jud kapoya....