Pinulongang Bisaya (Everything about Bisaya Language, Ludabi, ug uban pa)

[brownprose]

---

hahahaha

ka alegre niining inyong gi hisgutan.

apil dire Tattva...himoon ka namong usa sa mga guru dinhi

[Tattva]

apil dire Tattva...himoon ka namong usa sa mga guru dinhi

hahaha. Kanindot pamation sa imong mga pulong hinaot ko nga kini madayun apan kuyawan ko sa imong gi ingun nga ako maapil ug himoon guru niining maanindot nga Forum. hehe.

[brownprose]

hahaha. Kanindot pamation sa imong mga pulong hinaot ko nga kini madayun apan kuyawan ko sa imong gi ingun nga ako maapil ug himoon guru niining maanindot nga Forum. hehe.

angayan kaayo ka diri tattva tungod sa imong kaalam og kasinatian dili lang sa atong pinulongan kon dili sa ubang mga butang nga may kalabutan sa atong salabutan og sa kinabuhi. Og pwede pod iyagiyag nimo imong kaalam sa LUDABI nga giingon nako sa unahan...murag taas na siguro imong kasinatian ani

[akoyako]

Aduna pa'y dakung kahigayonan nga dili mapapas ang pinulongan nga Bisaya kun kita mopangga ning atoa gayud nga kaugalingon'g sinultian. Usa sa mga pamaagi niini mao ang pagtudlo sa ato'ng mga anak. Ikaduha, ang pagmugna ug mga ekonomikanhong panikay-sikay ngadto sa mga kalungsoran nga wala pa'y mga kaugalingnan kun ang ekonomiya ang hisgutan. Kun aduna na'y trabaho sa mga kalungosran, dili na mopaingun ngadto sa dakbayan ang mga lumolupyo didto, ilabi na sa habagatang sugbo diin adunahan pa kini kun pinulongan'ng bisaya ang hisgutan. Kun anaa na sa dakbayan ang usa ka sugbu-anon, hayan masagolan na ang iyang pagkabisaya sa siudadnong pulong diin halos nawala na kadtong karaan nga mga sinultian. Ipadayon ang paglitok o paggamit sa Binisaya sa mga tunghaan dinhi sa Sugbu imbis ang Tagalog nga nagtakuban lang nga Pilipino. Ang paggamit sa Binisaya nga Nationa Anthem. Bisan kini ginagmay lang nga aksyon apan mopatik kini sa galamhan ilabi na sa mga bata.

Mga Abay,
ipaambit nako ning gihikay sa balayan sa lunsayngbinisaya. bahin aning hisgotana, tubag nako ni sa kaabay:

Hinay-hinay Basta Kanunay

Mao gyod. Kon sa Bisaya lang ang hisgotan, madala na ni sa hinay-hinay kay daghan nang gabudlay alang sa atong
pinulongan. Naa na ang bisrock sa kabatan-onan, naa ra gihapon si Tiago bangkilan sa langob sa Bisaya Magazine.
Mibalik na pod si Leon Guerrero( diha sa LUDABI), nanglugsong na pod ang mga ambongan sa BATHALAD ug sa DAGANG,
milabyog-labyog pod ang Kapunongang Bisaya, nia poy atong Balayan nato sa Lunsayng Binisaya, bibo pod didto sa Istorya.net, ug sa Bisdakplanet. Naa poy nga bisaya_readers, mga Bisaya nga balayan alang nga Wikipedia, Bisaya Magazine, Standard Bisaya, naa pay nga youtubers nga gamugna og mga binisaya nga salida, daghan pong mga bisaya bloggers, nagkadaghan na pod ang mga bisaya blogs, naay mga balita nga binisaya sama sa Superbalita, mga lindog diha Bisag Unsa sa mindanawnews, lakip nang lanog sa nagkalain laing radyo nga binisaya,lakip na ang Radyobisdak ug ang Radyo Kalubihan. Naay hinayhinay pod nga pagtanom og mga binhi bisaya ngadto sa Tanaman sa Kalubihan, naa tay gabudlay sa atong diksyonaryo (dagitab o gipatik) sama sa binisaya.com, naa na poy mga bisaya nga salida, naay gadagan og mga polisiya sa paggamit og binisaya sa mga ngalan sa dalan sa Mactan, mga abtik nga protesta batok sa mga pang-abuso sa pinulongan kun katawhan Bisaya, naa mga magbabalak sa poste, ug mga mahigugmaon sa budaya nga mga magbabalak ug magsusulat, lakip nang mga editor nga gahago alang sa kahan-ayan ug kahapsay sa atong pinulongan, naay gamugna og mga sentro alang sa pagtudlo ug pagtuon og binisaya, lakip na ang paghubad ug pagmugna og mga audio CDs, naa nay gatudlo og Bisaya sa ubang eskwelahan, naa nay gapamulong nga gabinisaya gyod, ga-emcee sa binisaya gyod....daghan pa, gapahipi lang, naay gapakaylap og mga binisaya nga komedya, bisaya dyoks, ug uban pang makahimuot, naay gaotingkay sa kasaysayan, gasulat og binisaya.... tungod aning tanan madala rag hinayhinay basta kanunay kay ubay-ubay na man ang nahigmata nga mga Bisaya.

Apan kon tan-awon nato ang kahimtang sa daghang pang lumadnon nga pinulongan sa atong Yuta kun sa tibuok kalibotan, dili madala og maghinayhinay lang, kay gaapas sa panahon, kay kuno sulod aning 10 katuig, matabang-tabang pa ang pipila ka pinulongan, kay sa dili madugay, kuno sulod sa 100 ka tuig katunga sa 6000 nga pinulongan sa kalibotan mapuo na. Tigulang na ang kasagarang nahibiling manugilon kun manugsulti sa mga lumadnong pinulongan, ug kon dili ni mapasa kun matudlo sa kabatan-onan, malubong nig apil human sa kamatayon sa kataposang lumad nga hanete sa pinulongan.

Bisan gani ang UN nabalaka na, ug gani karong tuiga gihukman nila isip "Tuig sa mga Pinulongan", ug giawhag ang tanang hugpong sa pagtabang kun pagmugna ug mga programa alang sa pag-atiman ug pagtuboy sa mga lumadnong pinulongan. Namat-an pod nila nga Inenglis kasagaran ang nanghawod sa dagitwanang(cyberspace) kun dagitpukot(internet). Nanghinaot sila ug nag-awhag sa lain-laing hugpong nga mangitag paagi nga masulod sa dagitabnong pukot (internet) ang nagkadaiyang pinulongan. Ug kadtong wala pay sinulat sa kaugalingong pinulongan, matabangan unta agi sa mga himan nga pang- 'tingog' kun audio ug ma-record sad ang ilang mga pinulongan diha sa sulod sa dakong pukot. Mapuslan ang dagitpukot sa pagtudlo sa pinulongan ngadto sa sunod nga henerasyon. Ug diha sa 'virtual nga katilingban' ang mga lumad makapadayon silag binaylaoy ug inestoryahanay agi sa ilang pinulongan bisan tuod og nagkatibulaag na sila sa lain laing suok sa Yuta kun kalibotan. Ang dagitpukot maoy ilang taboanan.
Ubay-ubay na pod ang gabuhat sa ingon sa Canada ug sa America alang sa mga lumad nga Indian American, naa pod sa Australia ug New Zealand. Daghan pa gabudlay sa pagmugna og mga himan sa dagitpukot nga puslan alang sa paghipos ug pagtuboy sa mga lumadnong pinulongan. Sama sa maayong laki nga miimbento sa dagitpukot, Tim Berners-Lee nga nagmugna og hugpong (http://www.w3.org/) gapadayon og handom ug pagbudlay sa pagkab-ot sa tumong nga tanang tawo sa kalibotan makapahimulos sa dagitwanang. Ug mapuslan kini sa binayloay og kahibalo kun impormasyon nga makatabang sa matag indibidwal kun katilingban agi sa paggamit sa mata, pamaba, sa dunggan, sa hikap. Hinaot mapuslan gyod ang dagitpukot alang sa pagpasundayag sa mga lumad sa ilang kaugalingong pinulongan kun kalibotan. Madugang kini sa kadato sa kadaiyahan sa kultura sa tibuok kalibotan. Mahigmata ang katawhan sa kalibotan sa presensiya sa nagkadaiyang lumad, nagkadaiyang kultura ug panglantaw sa kinabuhi, pamaagi sa pagpuyo, labi na ang pakiglambigit sa kinaiyahan ug sa isigkaingon. Makatuon unta ta gikan sa mga kaalam sa mga lumad, sa ilang kahibalo ug kinaiya. Kay kon mahanaw sila ug ang nagkadaiyang pinulongan, morag wa nay pag-asa ang kalibotan, kay ang mahanaw mao ang kadato sa kaalam ug kahibalo nga nahipos sa nagkadaiyang pinulongan ug kultura sa mga lumad, mga nagkadaiyang bahandi sa kahulogan sa kinabuhi nga nadiskubre kun namugna sa nagkadaiyang kultura sa katawhan sa kalibotan. Ang kinabuhi sa syudad kun dakbayan dili molahutay kon ang natural kun kinaiyahan nga kalibotan madaot.Ug ang kinabuhing naandan sa syudad, dili lamang mao ang pamaagi sa pagkinabuhi niining kalibotan.

Kuyaw. Paspas ang pagkapuo sa kadaiyan sa tanaman ug kahayopan sa kalibotan. Labing paspas ang ang pagkawala sa nagkadaiyang pinulongan. Matod pa, usa ka pinulongan ang mahanaw matag duha ka semana. Kon paningkamotan nga maatiman ug mapalambo ang mga lumadnong pinulongan, dili na gyod ni madala og hinay-hinay, kay kon maglangay-langay sa gihapon mahulog ta pohon sa dakong pangpang sa pagmahay, kun dili gani sa pagkapuo sa kinabuhi tawhanon sa kalibotan. Kinahanglan sa katawhan kun sa kinabuhi sa kalibotan ang kadaiyahan alang sa pagtunhay.

Kuyaw. Kon usa ra ang dalan sa kinabuhi, unsaon na lang kaha kon kining dalana gapaingon sa pangpang sa pagkapulo? Ug kon wala nay kapilian, ambot na lang! Hinaot molipang ang kadaiyahan ang sa pagtunhay sa kinabuhi sa katawhan. Dapigan, atimanon ug ituboy ang kadaiyahan lumadnong kultura ug pinulongan, sa hinay-hinay kun sa pinaspasay. Ikaw ray mag-igo.

Akoy
2008.4.4

gisulat isip tubag sa kaabay sa: http://groups.yahoo.com/group/bisaya

[akoyako]

Daghang salamat Akoy sa imong mainiton ug matinud-anong pagpangalagad sa pinulongang Bisaya; your passion is really exposed through your dedication.
Naa koy namatikdan nga ang atong Bisaya [I never associate Bisaya with LUDABI; the insitution is not the dialect]
mikutat gumikan sa makusog nga bul-og sa pinulonga'ng Iningles nga mibanlas karon sa tanang lapyahan sa sinultihan. Usa ka tilimad-on nga dili malimod mao ang giingon sa academia nga "professional competence is oftentimes measured in the efficiency of English Language". Kining maong katinuoran maoy buhing hinungdan og nganong mipauraray kining atong Bisaya ngadto sa pagkapanas. Sa akong kaugalingong kasinati-an, bisan pa sa akong kahanas sa paghubad, napugngan ako sa makadaghang higayon alang sa dagkong tahas sa mga tunghaan ngadto sa langyaw nga  indigay gumikan sa ilang hinimong katarungan sa pag-ingon: "Forester speaks English in German Pronunciation". Entonces, ang Ininglis mao na karon ang gipakaginoo sa tanang dila - makapasubo kining tungora.

Bay Forester,
salamat pod sa imong mainitong pagtagad.
bitaw, mikutat ang inato tungod sa palabi nato sa nilangway. Ang bul-og sa inenglis kusog kaayo, gani angUN nabalaka nga ang mga lumadnong pinulongan wala mahisulod sa dagitpukot(internet). Gaawhag sila nga gamiton ang lumadnong pinulongan ug mangitag pamaagi nga ang kadaiyahan sa pinulongan motunhay diha sa  'kalibotan' sa dagitpukot.
Usa pod ka pinulongan ang Inenglis. Nikaylap ug nakaabot sa 'international' nga gamit. Hinaot mapuslan pod nato ang Binisaya sa international nga kalihokan.

Sa akong tan-aw ang panghunahuna kun kinaiya sa mga tawo tali sa pinulongan maoy bikil. Kon gipalabi na ang Inengllis isip taas og status kun kalibre kay sa kaugalingong pinulongan, diha na ta magkahuyang ang pagtan-aw sa kaugalingon. Maayo man motuon og inenglis, apan una sa tanan gapanukad ta sa kaugalingong pinulongan. Dili mao nga tamayon ang kaugalingon diha sa pagpalabi sa langyawng pinulongan. Ug dili gyod angay tamayon ang kaugalingong pinulongan sulod sa iyang kaugalingong tugkaran,  yuta kun territoryo. Gitamay gyod ang natibo. Salin ni sa kolonisasyon. Angay ning mausab nga panghunahuna. Angay sad nga usbon ang gapadayon nga 'internal colonization' agi sa pagpasulabi sa Tinagalog ug sa way pagpakabana sa ubang pinulongan kun katawhan sa hilit-hilit.

Pukawon nato ang mga kalahi nga nahikatulog agi sa atong pagmahal ug pagtuboy sa kaugalingong pinulongan, aron mahigmata pod sila sa gugma sa kaugalingong lahi, kultura ug pinulongan. Mabatonan pod nila ang garbo ug kadasig diha sa pagpuyo  sa gugma sa kaugalingong katawhan ug kultura.

Kining mahimulag na sa kaugalingon, morag gapnod sa lawod nga gianod-anod. Sayang pod ang tawo kon mahimo na lang tawo-tawo. Kon dili niya mailhan gyod ang kaugalingon, dali siyang gamiton sa uban, pahimuslan ang iyang kahuyang.  Malig-on man god ang tawo kon nakaila  siya sa iyang kaugalingon,nasadyod sa iyang bili ug mga prinsipyo, nakaila ug nailhan sa iyang katawhan kun katilingban.

Kining imong giingon nga 'professional competence' diin gipalabi ang Inenglis o gihimong sukdanan ang inenglis, naghulagway ni nga gipalabi ang 'profession' nga identidad kaysa kailhanan sa kaugalingong tribo kun katawhan.
Hinaot pohon, kon magpaila ta, unahan pagpaila nga 'ako usa ka Bisaya'.

Ipaambit nako ning gisulat nako sa Lunsayng Binisaya:

Bay Neil,

tulukibon ang kahimtang karon.
dili sayon.
dili pod puti itom.
mabulokon, nagkadaiya ang mga bantang, nagkadaiya ang gimok sa
mga 'kalibotan' niining atong gatuyok nga kalibotan.

ituboy gyod ang kadaiyahan, sa mga panglantaw, pinulongan ug kultura, katawhan,
ug uban pang pamaagi sa pagpuyo.

kay kon gipangusgan sa atong balayan ang diyandi, ang pagpadayag sa pagbati ug hunahuna
agi sa Binisaya, ang pagpatumaw sa kaamgohan alang sa kaugalingon 'kalibotan', kay mao man
ang gisigihan ug labyog-labyog dire, dili ni magpugong sa paghisgot kun pag-buhat sa ubang bulaton
nga malangkubon sa tibuok natong kinabuhi.

gamayng obserbasyon, mahinungdanon nga mabalik ang kaamgohan sa kaugalingong pinulongan nga
sakayan  pabalik sa kaugalingong tribo kun katawhan, ang atong batoganan. Kon ang
atong mga sundalo mahibalik na pod sa ilang pagbati ug paghunahuna ngadto sa ilang kaugalingon, kaugalingong
katawhan kun tribo, dili na sila dali-dali nga mapahimuslan sa mga tribo adunahan kun gamhanan, dili na sila magamit
sa pag-abuso batok sa katawhan nga ilang kagikan.Ang mapalabi na mao ang iyang kailhanan sa pagktawo, sa pagka-tribo, uban
sa iyang katawhan, dili na ang iyang propesyon isip usa ka sundalo, dili na ang iyang sweldo.  Pohon, kon magpaila na ang tawo, moingon na nga ako gikan sa tribo Bisaya, Maranao, Kankanaey, Waray, T'boli ug uban pa.  Dili na unang bungatong sa pagpaila sa propesyon nga ako 'doktor', 'enhenyero', 'nurse', 'sundalo', ug uban pa. Unahon na sa pagpaila ang katawhan, ang kailhan sa iyang lahi, ang pakigsandurot sa katawhan, 'ako usa ka Bisaya'

Kon ang katawhan molabyog-labyog, dili na sila pakgangon sa mga sundalo inay ubanan hinoon. Katawhan kon kailhanan sa lahi sa katawhan mopatigbabaw dili ang mga ideyolohiya ug dili ang mga propaganda.  Sanglit ang katawham, ang kailhanan sa lahi, ang katilingban,iyang kalibotan sa pinulongan ug budaya maoy mga sukaranan sa makahulogan nga pagpanginabuhi.

Dakong problema ang mga tawo nga nahibulag sa ilang kailhanan, tawo-tawo lamang siya, dula-dulaan, mapahimuslan
lamang sa uban, mamandoan sa interest sa kwarta ug gahom ug uban pa. Dili madali-dali kailad ang nakaila sa iyang kaugalingon ug kabililhon, sa iyang kaugalingong lahi ug kailhanan.

Tingali, ang nakatunob sa kaugalingong yuta, prinsipyo, kailhanan uban sa iyang katawhan...dili madali-dali, dili mailad-ilad.
Nasayod siya sa kahulogan sa iyang kinabuhi ug sa iyang tumong sa pagpakabuhi uban sa iyang katilingban kun katawhan, nakagamot sa iyang yuta ug sa iyang lahi. Nasayod sa iyang karon, kagahapon, ug pangandoy sa ugma.

Ang pakigbatok dili lamang pakigbugno. Dili sigurado modaog kon modula sa dula sa kaatbang. Mahimong mohimo og kaugalingong dula. Dili lang usa ka dula. Dili lamang 'globalisasyon sa ekonomiya' ang dula sa kinabuhi, nga mas makahulogan nga kinabuhi. Tulukibon ni. Gani, nasayran ron, nga kon duna 'epidemic' sama sa SARS, mokaylap ni sa tibuok sa kalibotan, sa daling panahon tungod sa globalisasyon sa transportasyon.  Mahimo pod nga mahunong ang tanang palupad sa eroplano kon wala nay mosakay kuyog sa daghang tawo, kay wa ta masayod usa kanila gadala og kagaw sa epidemya.

Kadaiyahan ang estratehiya sa 'survival' sa kinabuhi, sa pag-uma, sa pagpatigayon. Mao nga kon magkapareha tang tanan, kon usa na lang ka pamaagi sa panginabuhi, usa ka dula, ug kon mahugno ang maong dula, mahuman tanan. Apan kon may kadaiyahan, bisan mahugno ang usa, aduna pay laing kapilian, nagkadaiya pang pamaagi sa pagpanginabuhi nga makahuloganon.

Dili pod itom-puti kining hilisgotan sa globalisasyon, pananglitan ang 'globalisasyon sa komunikasyon' nagtakos kanato sa pakigsandurot ug pakiglambigit. Gani ang nagkadaiyang lumadnong pinulongan kun kalibotan may katakos na nga mopaambit kun mopadayag sa ilang kaugalingong pagbati, panghunahuna, panglantaw, panginabuhi, budaya ug uban pa agi niining dagitwanang (cyberspace).  Sa karon, Inenglis ang gapasulabi niining dagitpukot(internet), pero sa ngadto ngadto, dakong hagit karon, nga makapasundayag pod ang mga nagkadaiyang lumad sa ilang kalibotan diha sulod sa dagitpukot. Alang pod ni sa kaayohan sa katawhan sa tibuok kalibotan. Aron agi sa pasundayag sa nagkadaiyang kalibotan sa lumad, makaamgo ang katawhan sa kalibotan sa kamabulokon sa kadaiyahan sa pagkatawo, sa pagkalahi, sa pamaagi sa pagkinabuhil ug paglipay-lipay.

Daghan diay ang makahuloganong pamaagi sa pagkinabuhi, dili lang diay ang kombate sa 'globalisasyon sa ekonomiya' nga gapasulabi og yatak sa kadaiyahan sa kinaiyahan ug sa katawhan kun kultura sa kalibotan. Ang 'globalisasyon sa ekonomiya' ginama sa tawo alang sa iyang kaayohan, dili alang sa iyang pagkapuo.  Mapuo ang tanan, kun molukop og pasulabi ang usa ka kultura, kultura sa kwarta agi niining 'globalisasyon sa patigayon'. Gawas pa, gasto kaayo ni, sama ra nga dakong gasto ang pagpalupad sa eroplano aron mohatod og gulay ug itlog alang sa mga tawo sa layong dapit. Mahal pa ang gasolina kay sa itlog ug gulay. Kon naa lang sa palibot sa payag ang mga gulay ug pugaran sa itlog, dili unta kaayo gasto sa gasolina, dili unta kaayo mahugaw ang kinaiyahan sa aso sa sunog sa gasolina, dili pod unta mahago ug makabsan og gasolina kun 'fossil fuels' ang kinaiyahan.  Lokalisasyon maoy pangbalanse sa globalisasyon. Pangkatilingbanon, pangkultura, pangkatawhan, maoy pangatbang sa pagkaylap sa ideolohiya sa kwarta ug gahom, kultura sa inhustisya ug pagpangulipon.

Tulukibon.
Dire na lang sa taman, basig dili ta maghuman.

Akoy
2008.4.3

[rudjard]

dakong talinghaga kining panagpunduk dinhi. gikalipay kong na-ugkat kining tiigum sa mga balaknung pinulungang akong natawhan. Ako usab usa ka lumad nga Cebuano ug nagtinguha nga mu lambo pa unta kini sa pipila ka mga hinirasyon. tinuod nga halos pinulungang banyaga na atong makutlo dinhi sa "dagitpukot" apan dili ingun nga tungod sa laing dapit kini na mugna dili na lang kita magpakabanang mga lumad.

wala pa koy nasugatang tigum nga nagpasiugda sa pinulungang Binisaya gawas na lang sa istasyon sa radyo kada buntag nga akong madungug kaniadto samtang naghigup sa mainit nga kape sa pamahaw.

hinaut unta buhiun kini nga tigum harun makat-unan pa nato ang mabulukon ug puno sa tradisyon nga pinulungang Bisaya. daghang salamat ug maaung adlaw.

[brownprose]

@rudjard

Among mainiton nga abiabi rudjard gikan sa imong mga ubos nga higala dire sa atong gamay'ng kapilya. Among panghinaut nga makanunayon imong pagbisita dire bisag sa kakabus sa among ikadalit.

Niay daghang mga hunahuna dire rudjard nga pwede pod nimong sumsoman kay ubay ubay (bohol) na ni atong mga resources dire sama nilang forester, velvett, josephdc, clarkhent, akoy, tattva ug uban pa.

[forester]

Rudjard:

Lunsay nga pagmaya ang among gibati sa imong pagsalmut dinhi sa atong gamay'ng salimbung sa mga titik nga diin mahimugso ang among kabus nga pakigbisug alang sa atong pinulonga'ng bisaya. Among gipangaliya nga imo kaming ubanan sa paglukdo sa kasayuran isip atong tagsa-tagsa ka tampo sa atong kaugalingo'ng dila.

Sama ni Akoy, mi-agak usab siya uban kanato dinhi taliwala sa among kabudlay diha sa pagpakigharung sa inadlaw-adlaw nga tahas sa kinabuhi. Atong pas-anon kini atong BISAYA nga nagsagubang sa kalisdanan, hugtan ta kini sa pagkupot pinaagi sa atong hiniusang kusog, higtan ta kini sa pinakamaayong pagkagamat aron dili kini mailog sa mapanamastamaso'ng kahigayunan, tugbangan ta'g paninguha kining tanan dungan sa pag-ingon "BROWNIE, I-AMPO MO KAMI"

[brownprose]

Rudjard:

Lunsay nga pagmaya ang among gibati sa imong pagsalmut dinhi sa atong gamay'ng salimbung sa mga titik nga diin mahimugso ang among kabus nga pakigbisug alang sa atong pinulonga'ng bisaya. Among gipangaliya nga imo kaming ubanan sa paglukdo sa kasayuran isip atong tagsa-tagsa ka tampo sa atong kaugalingo'ng dila.

Sama ni Akoy, mi-agak usab siya uban kanato dinhi taliwala sa among kabudlay diha sa pagpakigharung sa inadlaw-adlaw nga tahas sa kinabuhi. Atong pas-anon kini atong BISAYA nga nagsagubang sa kalisdanan, hugtan ta kini sa pagkupot pinaagi sa atong hiniusang kusog, higtan ta kini sa pinakamaayong pagkagamat aron dili kini mailog sa mapanamastamaso'ng kahigayunan, tugbangan ta'g paninguha kining tanan dungan sa pag-ingon "BROWNIE, I-AMPO MO KAMI"

toink, lol

[rudjard]

maga uban ako ninyo kanunay sa pakigbugno ni-ining atong balaknung pinulungan. inyong ma-angkon akong kinasingkasing nga paglambigit dinhi sa gamay natung payag. himayaun ta kini kai mao ra unya kina atong ma-ikadalit sa atong mga bag.ong tubong hinirasyon...