Cebu local news (daily update)

[marqi_20]

PB mi-congratulate sa Banat News

CEBU, Philippines - Ang Sangguniang Panlalawigan sa Sugbo mipahalipay sa Banat News tungod sa pag-ani niini og tulo ka award sa dili pa dugay nga gipahigayong Cebu Archdiocesan Mass Media Awards (CAMMA).

Atol sa ilang sesyon niadtong Lunes si 6th district Board Member Arley Sitoy maoy miduso sa usa ka resolusyon sa pagpahalipay sa Banat News .

Ang maong mga award naglakip sa Best in Feature Writing, Investigative Report ug Editorial Catooning.

Ang maong resolusyon nalig-on dayon uban sa pagsanong ug pag-uyon sa tanang mga sakop sa hunta probinsyal diin usa niini mao si 1st district board member Julian Daan.

Kahinumdoman nga niadtong buwan sa Agosto , sa paghatag sa CAMMA Awards, ang koresponsal sa Banat News nga si Rey Pasaporte maoy nakakuha sa duha ka award nga Best in Investigative Reporting ug News Writing.

Samtang nakuha usab ni Ramesh Rosales ang Best in Editorial Cartooning ug nakuha usab ni Ma. Eleonor Valeros ang Best in Feature Writing. Ang desk editor ning pamantalaan nga si Edwin Ian Melecio mibutyag nga ang Banat News usa sa labing nakasilbi sa mga impormasyong gikinahanglan sa publiko kada adlaw.

Mapasalamaton kaayo ang tagdumala sa Banat News sa mga sakop sa hunta probinsiyal sa pag-ila niini sa kalamposan ning maong pamantalaan.

Samtang sa mga pipila ka tuig nga miagi ang Banat News naka-ani usab og award niadtong tuig 2007 diin Best in Special Reports, News Story ug Best in Editorial Cartoon. Niadtong tuig 2009 naka-ani usab ang Banat News og Best in News Story ug Best in Special Reports. (BANATNEWS)

[marqi_20]

Manghod giluba angol sa maguwang

CEBU, Philippines - Gumikan sa kahubog sa bino, usa ka manghod giunay og dunggab sa iyang maguwang didto sa sitio Tangke, Lower Bega sa dakbayan sa Toledo niadtong Biyernes sa hapon.

Ang biktima mao si Nino Segara, 24, minyo, samtang ang suspek mao ra usab ang iyang maguwang nga si Rommel Segara, 28, minyo usab ug managsilingan sa maong lugar.

Si SPO4 Gil Lastimosa, desk officer sa Toledo City Police mibutyag sa Banat News nga ang biktima ug ang suspek sa sayo pa nag-inom sa Labonite Store sa maong lugar.

Apan dihang nangalasbag na nagkalalis ang maong managsuon nga misangpot sa hilabihang kainit ang ilang away.

Gipadasig sa bino nga ilang gilala, nagkasinumbagay ang duha, apan ang maguwang nga gilupig sa manghod milanit sa gitangkil niining kutsilyo ug gihansak sa liog sa biktima.

Wala dayon malarot ang maong kutsilyo gikan sa liog sa biktima kay mikaratel og dagan pahilayo sa maong dapit ang suspetsado.

Ang mga silingan na sa biktima maoy naghatod sa biktima ngadto sa tambalanan sa dakbayan sa Sugbo.

Samtang padayon ang kapolisan sa pagpangita sa suspetsado karon. (WC) (BANATNEWS)

[marqi_20]

Public hearing sa Ciudad way klaro

CEBU, Philippines - Wala pay laing petsa nga gitakda alang sa public hearing sa Ciudad Project nga tukoron sa yuta sa kagamhanan sa lalawigan nga nahimutang sa barangay Apas ning dakbayan sa Sugbo.

Kini human makanselar ang public hearing nga gitakda niadtong Biyernes kay napakyas sa pagtunga ang mga opisyal sa Department of Environment and Natural Resources (DENR) didto sa Apas Barangay Complex.

Ang kagatusang molupyo nga napakyas sa ilang gipaabot igo lang nagpanlingo, apan nalingaw sila dihang miwaldas si Kongresista Tomas Osmeña sa habagatang distrito sa dakbayan sa Sugbo kinsa misaway sa nagpasiugda sa maong proyekto kay wala mohatag og tukmang kasayoran sa katawhan.

Matud pa ni Osmeña nga ang gipagarpar sa mga nagproponer nga makahatag og duha ka libong trabaho ang Ciudad Project, usa ka sayop nga pahibawo.

Kini tungod kay matud ni Osmeña nga inig-abli sa maong proyekto daghang mga establisamento ning dakbayan ang manira ug daghan ang mawad-an og trabaho . Sa laing bahin gihagit niya ang kagamhanan sa lalawigan nga pahimoon og karsada ang lugar nga tarokan sa Ciudad Project aron moluag ang dagan sa trapiko sa Banilad Talamban area.

Apan sa bahin ni manlalaban Marino Martinquilla, ang legal counsel sa lalawigan kini nagkanayon nga walay labot si Osmeña sa problema bahin sa karsada kay iya kini sa Kapitolyo nga problema. (BANATNEWS)

[marqi_20]

Abangan sa stall gipakubsan

CEBU, Philippines - Gipakubsan sa kagamhanan sa dakbayan sa Mandaue ang abangan sa matag stall sa bag-ong merkado publiko niini.

Si Musolina Soliva nga maoy market administrator sa dakbayan nagkanayon nga misugot ang kagamhanan sa gipangayo sa mga vendor nga pakunhoran ang ilang abangan sa matag stall kon lamesa.

Gumikan niini ang mga stall kaniadto nga gipaabangan og P50,000 ngadto sa P100,000 sa pagkakaron gipakibrahan na gikan sa P25,000 ngadto sa P40,000 nalang.

Hinuon bisan kun gipakunhoran na ang kantidad sa abangan daghan gihapon ang mireklamo tungod kay alang kanila bug-at ang maong presyo dili gyud sama kun ilibre nalang kanila ang tanan.

Si manlalaban Jovanni Taniero, legal officer sa dakbayan sa Mandaue miingon nga ang labing mahinungdanon mao ang pagtuman sa lagda ug dili kay ang pagsupak niini.

Matud pa niya nga ang kagamhanan mohatag sa mga vendor og duha ka buwan nga libre wa silay abangan sa ilang stall inigbalhin nila ngadto sa bag-ong merkado.

Si Edwin Ermac nga maoy executive director sa Traffic Enforcement Agency of Mandaue (TEAM) miingon nga nagpadayon karon ang ilang pagtuon sa paghatag og higayon sa mga PUJ sa dakbayan nga makaagi gyud sa bag-ong merkadong publiko.

Dugang pa niya nga ang mga electronic car maoy gitun-an nila karon nga pahakuton sa mga pasahero ngadto sa bag-ong merkado aron masuwayan ang kapasidad ug kalidad sa maong matang sa sakyanan nga gihuptan karon sa kagamhanan sa Mandaue. (BANATNEWS)

[marqi_20]

SK Chairmen apilon sa P3 mil nga assistance

CEBU, Philippines - Ilakip na ang mga Sangguniang Kabataan chairmen sa makadawat og P3,000 nga financial assistance gikan sa siyudad susama sa madawat sa mga kagawad sa barangay.

Kini maoy gibutyag ni Mayor Michael Rama kagahapon ug misaysay nga posibleng madawat nila kini karong Disyembre apan mag-agad sa dagan sa proseso.

Ang financial assistance nagsugod sa mga kapitan nga magdawat og P5,000 matag buwan samtang P3,000 alang sa mga konsehal.

Gisaysay hinuon ni Rama nga sa pagkakaron, ilaha kining ipa-check sa Commission On Audit kung mosugot ba sila nga hasta ang nanglabay’ng mga buwan gikan sa Enero karong tuiga ang mahimo nilang mahatag ngadto sa mga opisyales.

Giingong nagplano si Rama nga ang financial assistance isugod lang una nila sa buwan kung diin gi-aprobahan ang budget nga nahitabo sa miaging buwan.

Kung tingbon ang paghatag sulod sa usa ka tuig , moabot ngadto sa P60,000 ang madawat sa mga kapitan samtang P36,000 alang sa mga konsehal ug SK chairmen.

Samtang ang presidente sa Sangguniang Kabataan Federation (SKF) sa siyudad sa Sugbo nga si John Philip Po mipadayag nga nalipay siya pag-ayo sa maong kalamboan nga i-apil na sa financial assistance ang mga SK chairmen.

Panghinaut niya nga mopaambit unta ang mga SK chairmen sa ilang madawat ngadto sa ilang mga SK councilors.

Gipadayag hinuon ni Po nga iya pang susihon sa konseho ang tinuoray nga estado sa budget sanglit sa iyang nahibaw-an dili pa igo ang budget kung iapil ang mga SK sa financial assistance. (EIM) (BANATNEWS)

[marqi_20]

2 kolektor gitulis sa Naga ug Carcar

CEBU, Philippines - Duha ka kolektor sa lending firm ang nabiktima sa pagpanulis sa duha ka managlahing dapit sa syudad sa Carcar sulod lang sa tulo ka oras diin ang mga kawatan pulos nagsakay og motorsiklo.

Pasado ala una sa hapon gitulis diha sa sitio Kamagayan barangay Perelos syudad sa Carcar ang kolektor nga si Tommy Bonol, 24, molupyo sa Jagobiao sa syudad sa Mandaue ug nagtrabaho sa Double P Lending Company.

Sa pasiunang imbestigasyon sa kapolisan nasayran nga ang biktima nangolekta sa ilang mga kliyenti sa nahigsutang lugar dihang giduol sa duha ka lalaking nagsakay og motorsiklo ug ang angkas mikanaog ug mition ngadto sa biktima og armas.

Ang tulisan mideklarar dayon og tulis dungan sa pagkuha sa koleksyon ni Bonol nga P2 mil ug cellphone niini.

Human niini daling miikyas ang mga tulisan padulong sa barangay Perelos samtang ang biktima igo nalang nga mitaho ngadto sa kapolisan.

Tulo ka oras ang milabay laing kolektor na usab ang gitulis diha sa syudad sa Naga sa sitio Upper Bayong barangay Inayagan diin usa ka Rommel Peñas, 23, molupyo sa sitio Tabukanal barangay Pardo ug lending collector sa DOLI Credit Collection ang nabiktima.

Ang biktima nangolekta usab og kwarta sa ilang mga kliyente ug susama sa modus operandi sa tulisan sa Carcar gihunongan ug gitulis ang biktima. Ang biktima nga gitionan og armas diha sa iyang hawak wala na mosukol dihang gikuha ang iyang koleksyon nga P4,300. Ang mga tulisan daling miikyas sa dapit samtang midangop sa kapolisan si Peñas. (BANATNEWS)

[marqi_20]

Dalagitang naghikog mibahad

ANG kauwaw maoy nagtukmod sa 15 anyos nga dalagita nga nisangpot sa paghikog human gipasanginlan nga maoy nikuha sa kuwarta nga sinking fund sa ilang tunghaan.

Nakompirmar sa mga kabanay ang rason sa paghikog sa dalagita sa iyang gibilin nga suicide note diin siya nanganti nga mobalik ra siya ug iyang samokon kadtong tawo nga maoy nagpaka-uwaw kaniya.Nagkirig-kirig pa ang mga tudlo ni Jennifer Mabanta, taga-sityo Bantigue II, Barangay Tinggo, isla sa Olanggo sa dihang naabtan sa iyang iyaan nga nagbitay na diha sud sa iyang lawak kagahapon sa alas 7:00 sa buntag.

Dali nga giputol sa mga kabanay ni Mabanta ang nylon nga pisi nga maoy gihigot diha sa iyang liog nga gibaat ngadto sa kisame.

Gidali siya sa pagdala sa Santa Rosa Community Hospital.

Pipila ka minutos ang milabay sa pagtabang kaniya sa mga mananambal, ang tinun-an nakabsan gyud sa iyang kinabuhi.

Asoy pa ni P01 Mark Anthony Toring sa Police Station 1 sa Lapu-Lapu City Police Office (LCPO) nga nagbase sa isla sa Olanggo nga sigun sa ilang imbestigasyon sa mga kabanay ni Mabanta nga gipasanginlan ang dalagita sa iya ra usab nga classmate nga nagsilbi nga class treasurer nga maoy nikuha sa P1,300 nga pundo sa ilang tunghaan.

Samtang ang ig-agaw sa namatay nga si Raymund Duallo, 28, usa ka tourist guide sa isla, nagkanayon nga wa na makaaguwanta si Jennifer sa maong problema.

Human sa flag raising ceremony niadtong Biyernes giingong gipahibawo sa pipila ka mga magtutudlo sa Efepanio Taneo Memorial High School sa barangay Tinggo ngadto atubangon sa mga tinun-an nga nawala ang ilang gi amot-amot nga kuwarta kay gikawat.

Apan wa magtumbok og tawo nga maoy responsable sa pagkuha sa kuwarta.

Apan nisamot ang kaguol ni Jennifer sa dihang gitulisok kini sa ilang class treasurer dungan sa pag-ingon “I-uli na ang kuwarta. Dili gani nimo i-uli, ipabarang tika,” kutlo ni Duallo sa giingong gisulti sa classmate.

“Naguol to siya (Jennifer) pag-ayo, human ato. Iya rang gilu-om kay hilomon man gud na siya,” matod ni Duallo sa dihang nahinabi sa Sun.Star Superbalita.

Dugang pa niya nga base sa suicide note ni Jennifer, mobalik ra siya aron ipahibawo sa mga matutudlo nga di siya maoy nagkawat sa maong kantidad.

Iyang ipamatuod kon si kinsa ang tinud-anay nga nikuha sa kuwarta ug iyang hasulon kadtong tawo nga nipakauwaw kaniya.

Gipatik sa mantalaang SuperBalita Cebu Oktubre 23, 2011.

[marqi_20]

Kabanay ni Ponce nangayog pasaylo

NANGAYO og pasaylo ang kabanay ni Emmanuel Ponce sa nabuhat nga krimen niini pagmasaker sa iyang kaugalingon nga pamilya niadtong Dominggo sa miaging semana sud sa ilang panimay sa Barangay Tabunok, dakbayan sa Sugbo.

Kini dihang gihatud na sa katapusang kapahulayan si Emmanuel pasado alas 2:00 kagahapon sa hapon sa Queen City Memorial Garden human sa misa requiem sa St. Joseph the patriarch church sa Barangay Mabolo ning siyudad.Ang katabang sa pamilyang Ponce nga si Anastacia Deniega nga apil sa gimasaker gilubong na usab kagahapon sa Talisay City Public Cemetery.

Si Embrelaince, kinamanghuran nga anak ug bugtong survivor sa masaker wa makatambong sa lubong sa iyang amahan gumikan kay nibiyahe na kini paingon sa kaulohan ug naghatud sa lawas sa iyang inahan ug tulo ka mga igsuon sa Sorsogon diin sila ilubong.

Si Erwin Ponce, first-cousin ni Emmanuel nanghinaut nga mapasaylo sa Ginuo ang iyang ig-agaw bisan sa nahimo nga krimen niini.

Siya nihangyo sa mga higala, kabanay ug sa mga tawo nga nanambong sa lubong nga i-ampo ang kalag sa iyang ig-agaw alang sa kapahulayan nga dayon niini.

Nagpasalamat siya sa mga tawo nga misampatiya sa ilang gibati nga kasub-anan sa kamatayon sa pamilyang Ponce nga giunay pagmasaker sa ilang padre de pamilya.

“I hope that Emmanuel Ponce will rest in peace and will be accepted to the promise of our Lord Jesus Christ, eternal life… I’m sorry for that in behalf for all the people here. Thanks for everything sa assistance sa family.” padayag ni Erwin atol sa lubong sa iyang ig-agaw.

Ang lungon ni Emmanuel gipa-ibabaw sa lubong sa iyang amahan nga si Aurelio ug apohan nga si Ricardo nga maoy naa sa pinakailawom sa yuta. Gilubong usab sa maong pribadong sam-ang ang uban nilang mga kabanay.

Sama ni Erwin, si Dawn Cordova, classmate sa elementary ug high school ni Emmanuel sa Holy Rosary School of Pardo sa Barangay Pardo nihulagway niini nga usa ka maayong tawo apan hilumon.

Unang gikanaug ang lawas ni Emmanuel sa St. Peter Chapels pasado alas 11 sa miaging gabii ug pagka alas dos sa kaadlawon kagahapon gisunod pagkanaug ang lawas ni Melinda, 53, ug tulo ka mga anak nga sila si Elaine Grace, 26, Heather Joy, 24 ug Emlin Bridge, 18.

Gipatik sa mantalaang SuperBalita Cebu Oktubre 23, 2011.

[marqi_20]

Bata naligsan, patay

ni: Ma. Gelli L. Rojas ug Maiden Rae Diongzon PIT AB-Comm Intern

NIBUTO ang ulo ug nilugwa ang utok sa usa ka 11-anyos nga bata nga naligsan sa usa ka trailer samtang nagbarug-barug sa Moonlight St., dakbayan sa Mandaue alas 3 pasado sa hapon niadtong Biyernes.Ang trailer (GWA- 700) giingong gikan pa nagdiskarga sa mga karga niini ug nigawas sa vanyard sa nahisgutang lugar.

Ang driver nga si Julito Martus, 34, minyo, lumad nga taga barangay Tabagak Madridejos, Sugbo, naratol nga nidangop sa Mandaue City Traffic Office (MCTO) ug nag voluntary surrender.

Si PO2 Dante Flores sa MCTO nga nahinabi sa Sun.Star Superbalita nagkanayon nga si Martus ila dayong gi-turnover sa Subangdako police station human niasoy kanila sa maong hitabo.

Gipatik sa mantalaang SuperBalita Cebu Oktubre 23, 2011.

[marqi_20]

Bella mopakaon unta?

HUMAN gikataho nga nagpakumbira si Bella Ruby Santos og humba ug sinugba nga isda sa kaubang mga piniriso sa Naga City Jail bag-uhay lang, kagahapon giingon nga mamangka na usab unta kini og lechon baboy ug usa ka libo ka mga poso atol sa paniudto sa kaubang mga inmates sa prisohan dungan sa kapistahan sa ilang barangay sa Inayagan, Naga City.

Mao kini ang nadawat nga impormasyon ni Atty. Inocencio de la Cerna, abogado sa Criminal Investigation and Detection Group ug Task Force Ellah Joy.Apan si Atty. Julius Ceasar Entise, usa sa mga abogado ni Bella Ruby, nidepensa nga way dautan kon manghatag man ang iyang kleyente ngadto sa kaubang mga binilanggo.

Si de la Cerna sa pakighinabi sa Sun.Star Superbalita nibutyag nga basi sa iyang nadawat nga impormasyon, usa ka tibuok lechon baboy ang gitagod-tagod ug gibutang og lunch pack.

Gipatik sa mantalaang SuperBalita Cebu Oktubre 23, 2011.