Quote Originally Posted by greywolf View Post




Surambaw
LINTUNGANAY Ni Fred Languido (Banat) Updated March 25, 2011 12:00 AM Comments (0)

AIRSOFT, maoy usa sa labing maayong sports alang nako. Kini tungod kay gawas nga makalingaw, ma-develop sab ang imong disiplina sa kaugalingon. Kini gihulagway nga “gentleman’s game.”

Nahimugso ang maong matang sa duwa niadtong katapusang bahin sa dekada 70 didto sa nasud sa Japan diin gidili ang pagpanag-iya og tinuod nga pusil. Gibasi ang maong duwa sa konsepto sa paggamit og daw sama sa tinuod nga pusil apan dili makamatay.

Tungod sa kamahal sa unang mga migawas nga airsoft guns ang unang mga tawo nga nakahupot og nagduwa niini dinhi sa Pilipinas mao ra gyud kadtong mga anak og adunahan.

Apan sa pagpangligid sa katuigan nahimong affordable ang presyo niini, salamat sa China nga maoy nanghimo sa Jing Jong (Jing Gong) brand, diin nahatagan og kahigayonan bisan kadtong dili adunahan nga makaduwa sa maong matang sa sports.

Tungod lagi kay nahimong affordable ang gamit sa airsoft daghan ang nabuang niini. Nahimo sab nga sikat ang maong sports dinhi sa Sugbo dihang gipasiugdahan sa Kapitolyo ang Governor Gwen Garcia Airsoft Open.

Pagsugod sa maong torneyo nahatagan og kahigayonan dili lang ang mga “elite” nga mga anak og milyonaryo ug bilyonaryo nga makaduwa apan hangtud ang mga kabus nga mahiligon sa maong matang sa sports.

Nahimong agianan aron molambo ang sports tourism sa Sugbo tungod sa maong torneyo nga gidala sa Kapitolyo ngadto sa kalungsoran. Nindot unta ang programa, apan nakaingon ko’ng unta tungod kay gisagulan man og surambaw sa mga nagdumala niini pinaagi sa tataw nga pagpabor og usa ka team matag higayon nga ipahigayon ang torneyo.

Niadtong miaging semana gihimo ang championship sa 2nd Season sa Governor Gwen Garcia Airsoft Open diha sa may North Reclamation Area sa dakbayan sa Mandaue. 16 ka team ang nag-ilog sa titulo.



Apan daghan sa mga nagsud-ong sa duwa ang nakabantay sa tataw nga pagdapit sa mga nagpasiugda sa torneyo sa usa ka team nga mao gyuy ilang gikuronahan nga kampiyon. Timailhan sa ilang pagdapig og team mao ang daghang “bad calls” batok sa mga team nga giisip nga hulga sa ilang manok.

Pananglitan dihay sangka nga bisan og klaro nga “game fixing” ang nahitabo tungod kay inay mogamit og pusil ang kontra gisablig nalang ang bala. Crucial ang maong duwa tungod kay makaapekto man ang resulta niini sa standing sa matag team.

Laing tataw kaayo nga surambaw sa torneyo mao ang duwa tali sa Guadalupe Airsoft Team ug sa Talamban Airsoft Team diin gitabla sa organizers bisan layo pa kaayo ang oras. Ang matag duwa dunay 8 minutos. Basi sa lagda sa torneyo dili mamahimong tablahon ang duwa kon dili pa molabay ang 5 minutos.

Dunay timailhan nga nilabay na ang 5 minutos tungod kay dunay blinker nga mosiga sulod sa gamesite. Apan ang nahitabo kapin pa sa 2 minutos sukad sa pagbuhi ug hapit na makompleto ang misyon sa GAT gitabla hinuon ang duwa.

Mismong ang mga nagdumala sa duwa niangkon nga wala pay oras, apan bisan sa reklamo sa team GAT buta ug bungol ang mga opisyal sa torneyo. Ngano man? Tungod ba kay gisiprahan nang daan sa pangalan sa ilang manok ang championship trophy?

Dili ni unang higayon nga gisurambaw sa mga nagdumala sa maong torneyo ang resulta sa duwa. Gihimo na pud nila kini kaniadto didto sa Lilo-an. Mao gihapon nga team ang ilang gihatagan sa tropiyo sa kampiyon bisan kun ang tinuod laing team ang mananaog.

Nahilom lang ang maong kontrobersiya kaniadto tungod kay nihangyo ang mga tagdumala nga dili nalang padak-on ug ilang i-award ang championship trophy sa tinuod nga kampiyon.

Angayang hinumduman sa mga nagdumala sa maong torneyo nga way luna ang surambaw dinhi tungod kay nakataya ang kredibilidad sa gobernador niini isip maoy tigpasiugda.

Angayan sab ninyong hinumduman nga dili personal ninyo nga kwarta ang gigasto sa bongga nga torneyo kun dili kwarta sa mga magbubuhis sa probinsiya sa Sugbo. Unsaon man pagpabilin sa airsoft nga “gentleman’s game” kung dunay mga tagdumala og torneyo nga mosurambaw sa duwa.