Pinulongang Bisaya (Everything about Bisaya Language, Ludabi, ug uban pa)

[akoyako]

Inahang Dila

Hangtod nga may dugo pang galatay sa kaugatan
Dug'an pa'g tinta ang dagang ug wa pa naughan sa luha
Ipadayon ko pagpaagay kun pagpasanay sa panid sa handomanan
Kining mga panahom ug pangandoy, hunahuna ug pagbati,
Asoy kun sugilanon, garay kun balak sa pagpangga sa Inahang Dila, Bisaya.

Hangtod nga may igo pang kusog ug kalipay sa pagdayeg ug pagpasalamat
Sa kinabuhi, sa kagikan, sa Yuta, kainit sa dughan ug kahayag sa kahimatngonan
Di ko mohunong sa pakigbugno batok sa gahom sa kalimot ug kapintas sa panahon
Inay, handomon ko sa kanunay nga dili angay isalikway ang akong Inahang Dila, Bisaya.

Akoy
2008.4.12

[forester]

ELEHIYA SA PAGKAPANAS SA ATONG HINIGUGMANG PINULONGAN


Sa pagdahili sa kapanahonan dili gayud mapugngan ang paglahugay sa mga sinultihan,
walay si bisan kinsang gamhanan ang makasalindot sa bisan unsang kausaban sa atong kagawi-an ug pinulongan,
dili kini mabitad pagbalik ni bisan kinsang kusgan - ni bisan kinsang batid - ni bisan kinsang banggi-itan,
taliwala niining tanan nga gisagubang nga kausaban, ang nasamdan nga mithi hugasan ta na lamang sa mga luha sa atong kasub-anan.

Ooh.. hinigugma namo'ng pinulongan, nganong gibiyaan mo man ang mabuloko'ng kagahapon sa dihang nahimugso ang kabag-ohan?
Nganong gihiklin mo man ang among pagmaya sa pag-amuma kanimo? Nganong gitalikdan mo man ang masadya nga kagahapon bugti ang imong pagkalagiw ngadto sa kinahiladman sa kawad-an?
Dili mo na ba diay agakon kining kabus nga mga bukton sa mga bisayang mamumulong? Talikdan mo na ba diay kami sa hingpit tugbang sa paghanduraw sa masadya nga paghandum?
Imo ba diay'ng tugotan ang way hunong nga dangoy-ngoy sa among kalag nga samaran ug ang mi-umido nga kasakitan sa imong pagtaliwan?

Ooh.. hinigugma namo'ng pinulongan, asa ka man namo pangitaa taliwa sa among kamingaw kanimo?
Asa man namo sud-unga ang mga matam-is mong handumanan taliwa sa among lunsay'ng kahigwa-us kanimo?
Og kinsa may among kasumbongan sa mga ti-unay namong pagbati'g kahingawa kanimo?
Tugotan ba lang namo nga mapanas na ikaw sa kapanahonan?

Dios sa mga pulong, dios sa kaisipan, dios sa mga dila, ayaw ninyo agawa ang among higugmang pinulongan gikan kanamo;
Ayaw siya laksi-a sa among panumduman, ayaw siya ihikaw sa among pagmaya, itugyan siya kanamo bisan pag motabon ang bag-ong kapanahonan ning among kabus nga kalikupan;
Tugoti kaming maghudyaka uban kaniya taliwa niining mapanamastamasong kahigayunan sa kapanahonan;
Tugoti siyang magpabilin sa tagsa-tagsa namo ka dila, sa tagsa-tagsa namo'ng kasing-kasing, itugyan siya kanamo.

Sa pagbanlas sa kapanahonan, dungan ang pagkapanas sa atong hinigugmang pinulongan.
Gitukmod kini halayo kanato, gipadpad kini sa mga huyohoy paingon sa kawanangan.
Gi-anud ang atong hinigugmang pinulongan sa lapyahan sa halapad nga kawad-an.
Mihuros ang hangin sa kabag-ohan nga maoy mitayhop sa atong hinigugma ngadto sa kapunawpunawan.

Sa among paghinuktok, dili ka namo kalimtan, handumon ka namo hangtud may kaisipan ang mihigugma kanimo;
Ikaw mapanas sa kapanahonan, apan walay makalabni kanimo gikan sa bulawang altar sa among kasubo;
Ang among hinigugmang pinulongan hangtud sa hangtud among ampingan ug higtan sa talikala sa among paghandum. Abril 11,2008

[forester]

LATID SA KAPALARAN

Tinuod bang may magbubuot ning kalibutan? Tinuod bang may magbubuot sa kapalaran?
Kining tanan mga hagawhaw lamang sa halawm nga tinugkaran sa kaisipan.

Oooh..tawo nga kinadenahan sa kapalaran, nahigut sa dili na kabadbaran nga tanghaga sa kaulipnan;
Kanus-a kining kaugalingnan maangkon, niining kinabuhi nga nahigut sa tumang pagmatngon.

Hunonga na, ooh.. kalisdanan, kining pagsagubang nga nalatid sa kapalaran;
Hunonga na, ooh.. kalisdanan, kining tu-aw ug pagbakho nga gi-agakay sa kasub-anan.

Oooh.. kalag nga timawa, ayaw kahibulong sa dili mabadbad nga tanghaga;
Oooh.. kalag nga uyamot, ayaw katingala sa mga damgo nga dili makab-ut.

Mga Tinguha ug mga Damgo, nganong dili kami makabu-ot kaninyo?
Nganong gihigtan ninyo kami sa dili matukbil nga pangagho?

Kinabuhi, kini ba ang dakung saad alang kanamo?
Kinabuhi ba ang bugti sa among pagkahimugso nga nalambud sa dakung tunglo sa kapalaran?
Oooh.. Kinabuhi, nganong gilatid mo man ang kapalaran nga maoy nakapabug-at sa among gilukdo?
Nganong gibukhad mo man among mga mata ug kaisipan nga moy miila sa imong kapalaran nga gipapas-an?

Latid sa kapalaran, bunga lamang ikaw sa halawm nga gumunhap ug kaisipan;
Kanimo waly katinuoran, ginama ka lamang sa among salabutan sa pagmugna kanimong dat-ulan ug pasanginlanan sa among kaugalingong kasaypanan.

--------------------------------------------------------------------------------------------------------------------------------------------------------------------------------------------

Component of "Latid sa Kapalaran":

1. Rhetorical Pair Questions - mga sambug sa katuyo-an nga gipaagi sa pagpangutana
2. Anaphora - Ang pagbalik-balik sa mga nag-unang klausula
3. Personificado Alegorico - Ang pagpanampit sa mga gipaka-ingong mga tawo ug may balati-an "Ooh.. Kinabuhi..Kalisdanan..Kalag..etc"
4. Epanodos - Pag-inat sa mga tinibuok nga idea ngadto sa ginagmay nga mga pulong
5. Exergasia - Pagbalik-balik sa mga managsama'ng kahulogan
6. Palilogia - Repetition for vehemence of fullness
7. Apophasis - Ang pagbalituk sa kalahi-an sa buot nga ipasabut, ingon sa "Latid sa Kapalaran" ngadto sa "Dat-ulan sa kasaypanan".

[brownprose]

@forester

Pagka-anindot ining imong mga mugna sa huna-huna -- Eleheya og Latid...nihikap gyud sa akong kasing kasing ang mga mabulokong mensahe nga nagpahipi sa imong mga lindog.

Ako ning icompile, para pohon atong ipaambit sa atong mga sumusunod...

[akoyako]

Nindot Bay Forester.
Bay Prose, maayo sad mahipos.
Ug mahimo pong ipaambit sa uban, agi ani:
http://groups.diigo.com/bisaya/bookmark

Akoy

[clarkhkent]

taasa na sa mga lindog nga gipang ladlad dre oy....magkinahanglan namn jud ko og dako dako nga panahon nga igahin aron sa pagbasa niining namantala dinhi...

[rainwax]

pagkalawm ba ani ui..
malumos man pud ta, lisud au tugkaron..

[akoyako]

Sige la'g tag-as basta Binisaya, payts gihapon.

naay taas nga balak giposte ron didto sa tigom-tigom (forum) ilalom sa Arts and lifestyle, sa Balak sa pakigbisog...
pakigbisog ni sa lumad, sinulat ni Omar Khalid,
tighikay ni siya sa Bisaya Magazine, tribo sa Kandaya.

usa ra ka balayan ang ginasak-an niya, ang balayan sa Lunsayng Binisaya,
kon buot makig-abay makig-ila-ila saka lang didto, inadlaw ang hikay nga binisaya didto
daghan pod og lab-as nga mga balak ug mga panahom...

Akoy

[akoyako]

LATID SA KAPALARAN

Tinuod bang may magbubuot ning kalibutan? Tinuod bang may magbubuot sa kapalaran?
Kining tanan mga hagawhaw lamang sa halawm nga tinugkaran sa kaisipan.

Oooh..tawo nga kinadenahan sa kapalaran, nahigut sa dili na kabadbaran nga tanghaga sa kaulipnan;
Kanus-a kining kaugalingnan maangkon, niining kinabuhi nga nahigut sa tumang pagmatngon.

Hunonga na, ooh.. kalisdanan, kining pagsagubang nga nalatid sa kapalaran;
Hunonga na, ooh.. kalisdanan, kining tu-aw ug pagbakho nga gi-agakay sa kasub-anan.

Oooh.. kalag nga timawa, ayaw kahibulong sa dili mabadbad nga tanghaga;
Oooh.. kalag nga uyamot, ayaw katingala sa mga damgo nga dili makab-ut.

Mga Tinguha ug mga Damgo, nganong dili kami makabu-ot kaninyo?
Nganong gihigtan ninyo kami sa dili matukbil nga pangagho?

Kinabuhi, kini ba ang dakung saad alang kanamo?
Kinabuhi ba ang bugti sa among pagkahimugso nga nalambud sa dakung tunglo sa kapalaran?
Oooh.. Kinabuhi, nganong gilatid mo man ang kapalaran nga maoy nakapabug-at sa among gilukdo?
Nganong gibukhad mo man among mga mata ug kaisipan nga moy miila sa imong kapalaran nga gipapas-an?

Latid sa kapalaran, bunga lamang ikaw sa halawm nga gumunhap ug kaisipan;
Kanimo waly katinuoran, ginama ka lamang sa among salabutan sa pagmugna kanimong dat-ulan ug pasanginlanan sa among kaugalingong kasaypanan.

--------------------------------------------------------------------------------------------------------------------------------------------------------------------------------------------

Component of "Latid sa Kapalaran":

1. Rhetorical Pair Questions - mga sambug sa katuyo-an nga gipaagi sa pagpangutana
2. Anaphora - Ang pagbalik-balik sa mga nag-unang klausula
3. Personificado Alegorico - Ang pagpanampit sa mga gipaka-ingong mga tawo ug may balati-an "Ooh.. Kinabuhi..Kalisdanan..Kalag..etc"
4. Epanodos - Pag-inat sa mga tinibuok nga idea ngadto sa ginagmay nga mga pulong
5. Exergasia - Pagbalik-balik sa mga managsama'ng kahulogan
6. Palilogia - Repetition for vehemence of fullness
7. Apophasis - Ang pagbalituk sa kalahi-an sa buot nga ipasabut, ingon sa "Latid sa Kapalaran" ngadto sa "Dat-ulan sa kasaypanan".

Bay Forester,
gipaambit na pod nako ni sa balayan sa lunsayng binisaya, maayo itugbang sa balak ni Omar Khalid.
hapdos sa dughan ang inyong mga balak....

morag gisilihan, gisukaan, gilimonsitohan nga sawsawan sa sinugbang bulad...hapdos sa dila,
lami ikaon.

Akoy
makalaway!

[akoyako]

Nindot ni basahon, mananoy nga binisaya sa agila sulod sa korte:
http://muragdoctor.wordpress.com/200...for-a-verdict/