Ang mga Balak ug Awit sa Pakigbisog

[akoyako]

---

Kaligrapi

kahilakon sa
kanindot sa
kapino sa
linya agi
sa daplin sa
aping subay sa
kilid sa lawas niya

Akoy
2008.2.7

[akoyako]

Tangkugo

ipatong nako akong tudlo
sa imong tangkugo...

imbis hikapon,
ako na lang tan-awon

akong mata na nalay mohikap
sa imong kaanyag

Akoy
2008.4.1

[akoyako]

Lubot

Labyog-labyog

Akoy
2008.4.1

[akoyako]

Tumong

Mosutoy kog lupad sa kahanginan

Akoy
2008.3.25

[akoyako]

Sakayan Sa Langit

duyan-duyan
sa bulan
sa bitoon
sa dughan

labyog-labyog
sa bugsay
sa sakayan
sa langit

Akoy
2008.4.3

[akoyako]

Gibuklad Na

Gibasa ko sa iyang mata
Mora'g bino iyang katawa
Iyang dughan mora'g unlan
Ang labyog mora'g duyan

Gapahungaw iyang paa
Paghangad sa iyang saya
Mora'g moskiterong giisa
Gibuklad na'ng bandera.

Akoy
2008.4.9

[akoyako]

Ihalas

Init!
Tin-aw ang langit
Ilalom sa landong
Nagkatibulaag ang mga dahon.

Ah!
Nabugnawan sa
Imong handomanan
Kinahanglan mobalik ko sa lasang.

Akoy
2008.4.9

[forester]

ELEHIYA SA PAGKAPANAS SA ATONG HINIGUGMANG PINULONGAN


Sa pagdahili sa kapanahonan dili gayud mapugngan ang paglahugay sa mga sinultihan,
walay si bisan kinsang gamhanan ang makasalindot sa bisan unsang kausaban sa atong kagawi-an ug pinulongan,
dili kini mabitad pagbalik ni bisan kinsang kusgan - ni bisan kinsang batid - ni bisan kinsang banggi-itan,
taliwala niining tanan nga gisagubang nga kausaban, ang nasamdan nga mithi hugasan ta na lamang sa mga luha sa atong kasub-anan.

Ooh.. hinigugma namo'ng pinulongan, nganong gibiyaan mo man ang mabuloko'ng kagahapon sa dihang nahimugso ang kabag-ohan?
Nganong gihiklin mo man ang among pagmaya sa pag-amuma kanimo? Nganong gitalikdan mo man ang masadya nga kagahapon bugti ang imong pagkalagiw ngadto sa kinahiladman sa kawad-an?
Dili mo na ba diay agakon kining kabus nga mga bukton sa mga bisayang mamumulong? Talikdan mo na ba diay kami sa hingpit tugbang sa paghanduraw sa masadya nga paghandum?
Imo ba diay'ng tugotan ang way hunong nga dangoy-ngoy sa among kalag nga samaran ug ang mi-umido nga kasakitan sa imong pagtaliwan?

Ooh.. hinigugma namo'ng pinulongan, asa ka man namo pangitaa taliwa sa among kamingaw kanimo?
Asa man namo sud-unga ang mga matam-is mong handumanan taliwa sa among lunsay'ng kahigwa-us kanimo?
Og kinsa may among kasumbongan sa mga ti-unay namong pagbati'g kahingawa kanimo?
Tugotan ba lang namo nga mapanas na ikaw sa kapanahonan?

Dios sa mga pulong, dios sa kaisipan, dios sa mga dila, ayaw ninyo agawa ang among higugmang pinulongan gikan kanamo;
Ayaw siya laksi-a sa among panumduman, ayaw siya ihikaw sa among pagmaya, itugyan siya kanamo bisan pag motabon ang bag-ong kapanahonan ning among kabus nga kalikupan;
Tugoti kaming maghudyaka uban kaniya taliwa niining mapanamastamasong kahigayunan sa kapanahonan;
Tugoti siyang magpabilin sa tagsa-tagsa namo ka dila, sa tagsa-tagsa namo'ng kasing-kasing, itugyan siya kanamo.

Sa pagbanlas sa kapanahonan, dungan ang pagkapanas sa atong hinigugmang pinulongan.
Gitukmod kini halayo kanato, gipadpad kini sa mga huyohoy paingon sa kawanangan.
Gi-anud ang atong hinigugmang pinulongan sa lapyahan sa halapad nga kawad-an.
Mihuros ang hangin sa kabag-ohan nga maoy mitayhop sa atong hinigugma ngadto sa kapunawpunawan.

Sa among paghinuktok, dili ka namo kalimtan, handumon ka namo hangtud may kaisipan ang mihigugma kanimo;
Ikaw mapanas sa kapanahonan, apan walay makalabni kanimo gikan sa bulawang altar sa among kasubo;
Ang among hinigugmang pinulongan hangtud sa hangtud among ampingan ug higtan sa talikala sa among paghandum. Abril 11,2008

[akoyako]

Inahang Dila

Hangtod nga may dugo pang galatay sa kaugatan
Dug'an pa'g tinta ang dagang ug wa pa naughan sa luha
Ipadayon ko pagpaagay kun pagpasanay sa panid sa handomanan
Kining mga panahom ug pangandoy, hunahuna ug pagbati,
Asoy kun sugilanon, garay kun balak sa pagpangga sa Inahang Dila, Bisaya.

Hangtod nga may igo pang kusog ug kalipay sa pagdayeg ug pagpasalamat
Sa kinabuhi, sa kagikan, sa Yuta, kainit sa dughan ug kahayag sa kahimatngonan
Di ko mohunong sa pakigbugno batok sa gahom sa kalimot ug kapintas sa panahon
Inay, handomon ko sa kanunay nga dili angay isalikway ang akong Inahang Dila, Bisaya.

Akoy
2008.4.12[br]Posted on: April 12, 2008, 10:07:27 AM_________________________________________________B ay Forester,

gipaambit nako imong sinulat nga 'Elehiya..." sa balayan sa Lunsayng Binisaya.
Si Pedro, miingon ug nangutana: "Nindot palandungon...apan ang nagsulat nga si Forester amerkano ba ni
Bay Akoy?"

Mitubag ko. Bisayang Dako ka, gapuyo sa Cebu, magtutudlo og tig-apilan sa tigom-tigom sa Istorya.net

[forester]

@Bay Akoy:
Sakto gayud imong tubag bay Akoy.
Ang pangalan nga "Forester" akong gigamit gumikan sa mga nadugtong nga mga sugilanon niini [eg. the pen name of Thomas Paine to the Ambassador of France during the time of King Louis]; lain usab nga katarungan mao nga giisip ko usab akong kaugalingon isip mag-uuma sa kakahoyan [tree farmer], gani being a forester is something I considered as my contribution to our environment.

Imong higala,
Forester