Ang mga Balak ug Awit sa Pakigbisog

[akoyako]

---

O, Mama Mia

O, Mama Mia,
naglawig ako nga nag inusara
padulong ngadto sa layo nga dapit
gianod sa lawod
ug sa hangin gitukmod.
Miabot sa kamingaw nga mitaklob,
mitaklob daw langob,
ang kahilom makabungog,
ang kabugnaw...
dulot sa bukog!

O, Mama Mia,
akong nadungog
ang mananoy mong tingog,
ang paglaom midulot, mi buho' sa ngi-ob.
Ang panghupaw mianam-anam paghanaw,
ug ang kahilom napukaw,
sa imong laylay nakigsayaw.

O, Mama Mia,
kalingkawasan ang imong tingog,
kalipay ko ang imong pagduyog.
Paglaom sa dughan milanog,
kalag ko daw nabanhaw,
naluwas sa kahidlaw.

O, Mama Mia,
Pasaylo-a intawon,
kay nadaog ako sa kalimot
Diay, Ikaw dili angay isalikway,
Inahan sa kanunay!
Ikaw ang akong dungog...
Inahang Tingog!

Akoy
2003. 01.19. (Domingo 12:04 kaadlawon: Unang Bersyon)

[akoyako]

O, Mama Mia



Naglawig ko,

nag inusara

sa lawod gianod

sa hangin gitukmod.

Niabot ang kamingaw,

langob nga mitaklob,

kahilom makabungog,

ang kabugnaw...

dulot sa bukog!



O, Mama Mia

Imong tingog,

akong nadungog

sa dughan milanog,

migun-ob sa ngiob.

Dayag ang hulagway,

matahom nga pahiyom

sa kamingaw mihupay

nakigsayaw…

sa imong laylay!



O, Mama Mia

Ang imong tawag,

akong kagawasan;

handom sa kalimot,

kalipay sa nabanhaw,

naluwas nga kahidlaw.

Diay, ikaw dili isalikway,

inahan sa kanunay,

akong dungog...

Inahang Tingog!



Akoy
2003.01.19

[akoyako]

ang pulong bisaya



ang matag pulong sa baba

lambigit sa yuta,

hikot sa kasaysayan.

ang matag pulong may kagikan,

buhi nga handoman,

handoman sa tingog ug dungog

sa atong katawhan.



ang matag pulong

salamin sa pagkamao,

lamdag sa pagkatawo.

ang pulong may gahom,

mamugnaon,

buntog ang gahom sa kalimot.



ang pulong bisaya, inato

kinaham sa Bisayang Dako.



Akoy
2004. 2.15

[akoyako]

Bahaw



pahiyom o hagikhik

panghupaw o pagkusmod

aslom nga pagbati

sa ilalom ning dughan

daw ilaga gadagandagan!



lalom nga panghupaw

ayayay!

way hunong nga panghupaw...

may bahaw ka ba diha?

ginamos ba kaha!?



gihidlaw sa piniritong bulad

o sinugbang bangus,

toyo ug suka

kamatis ug sebulyon

may lain pa ba diha?



magkinamot

magtungko sa bangko

ang suwang sa tuhod hapit na mosangko

nakalimot sa kalami,

nga bugnaw ang sabaw

kay paksiw lagi

ibahog-bahog lang

sa bahaw...



ang bahaw

salin sa nahurot!

biniyaan og gikalimtan,

apan lamian og makatagbaw

sa bisaya nga gihidlaw

sa kaugalingong buhilaman

nga nabahaw.



Akoy
2002.10.08

[akoyako]

Sa Imong Pahiyom

Salamat sa tim-os mong pahiyom
Mitangtang sa taming ning kasingkasing

Gahapdos nga gahandom king dughan
Kanunay sa putli mong pahiyom

Akoy
2007.7.7

[akoyako]

Ang Prutas



Ibabaw ning kahoy

Midungaw kanimo

Sa imong dughan

Napupo.



Akoy
2007.7.4

[akoyako]

Uga



Ang dahon nga laya

Gatinghaya sa yuta

Giligis sa panahon

Gisilhig na, gisilhig na...



Akoy
2007.11.19

[erichoy]

ahh.. daghana gud ana..hehe

[akoyako]

Anak sa Inahan

amping sa imong
kasingkasing…ayaw’g
hasola ang imong pagbati

undanga ang paghunahuna,
mohuot lang sa dughan ang
kapungot ug mga kabalaka

ang imong galamhan ang
unang madaot, biyai ang nagbuot
nga hunahuna sa kagahapon ug ugma

adto karon sa imong tanaman sa kalibotan
sulod sa ganghaan sa kahimatngonan diha sa
imong kalawasan, tungatunga sa kasingkasing

presensiya, karon, tim-os nga gasa, padayonon
amping sa imong kasingkasing aron motunhay
ug mohayahay…

dawata ang kasamtangang
kahimtang karon…
dawata.

Akoy
2006.10.30

[akoyako]

ahh.. daghana gud ana..hehe

bahaw nang uban ani Bay,
pero sige lang, alang sa timo-timo ug tilaw-tilaw...
ipost lang balik dire, ang uban gihipos sa kaban.

Akoy[br]Posted on: February 24, 2008, 11:47:56 PM_________________________________________________U haw sa Kaadlawon

Siak
sa kawayan nga dingding
Ang Dughan…

Hilak
sa bata nga dumdom
Ang Suso…

Buak
sa kahilom ang dokdok
Sa Agong…

Kiat
nga sayaw sa ngitngit
Nga Kagabhion…

Uhaw
sa yamog sa banagbanag
Sa Kaadlawon.

Akoy
6.12.2006