Ang mga Balak ug Awit sa Pakigbisog

[akoyako]

---

Pahalipay sa LUDABI

nahimo na gyod ang balayan sa LUDABI
http://ludabi.org/

kapahulayan sa mga bisdak
batoganan sa mga bisaya nga gapanaw
payong kapasilongan sa galihok ug gapamalandong
alang sa pagpalambo sa pinulongan ug budayang Bisaya

Mabuhi ang LUDABI!
Mabuhi ang Bisaya!

Akoy
2008.02.16

[akoyako]

Tugpa

mora ko'g langgam
nga way katugpaan
hangtod mitugpa sa
abaga ni Bathala

Akoy
2008.02.23

[akoyako]

Kasalo Sa Gugma

Taliwala ning dagitabnong dakbayan sa kagabhion,
mikaylap ang mga bulak
nga gialirongan kun gihiktan....gikugos kun gihuptan,
diay, dayandayan sa dughan sa adlaw sa gugma.

Gahalog siya og pinunpon nga mga rosas
mihunong sa atbang
nagkaduol sa akong atubangan
ang iyang buhok,
iyang aretes,
iyang mga tudlo
nga gunit ang tangkilepono
gapanawag...nanawag tingali sa uyab

Samtang
gihapsay sa akong panan-aw
ang taas niyang buhok nga gipuyos,
bulawanong bulok,
nindot siyag pamarog,
bayen-on gyod og panglawas.

Unya
nagkaduol na siya sa akong kiliran,
duol sa akong gisandigan,
ang iyang buhok
iyang dalunggan,
iyang liog ug
ang iyang hawak
gapanawag gihapon
kanindot unta hapuhapon
apan wala tandoga
kay may gipaabot siya
nga laing kasalo sa gugma.

Akoy
2008.02.14

[akoyako]

Dahong Bulawan

Matod pa
Ang dahon nga (imong) masalo
Nga wa pa katugpa (sa yuta)
Kon isulod sa kaban
Mahimong bulawan

2008.02.07

[akoyako]

Ero ni Tikong

Mipatong
Misyomoy
Mitikongkong
Ay!Nabalintong
Misyagit og
Syatoooooooooooong!


Akoy
2008.02.05

[akoyako]

Ang Dagan Sa Kaadlawon

Ako gakamang samtang
Gadagan ang panahon
Lupad, lupad
Gusto ko molupad.

Naay gabii nga dili ko
Katulog, kay dili katulgon.
Tubig ang tambal, dili sa
Kauhaw, kon dili sa kagutom.

Naay pagkaon apan
Dili kaonon
Aron makapahulay ang lawas
Nga unta tulog na karon.

Dili lang pod ko
Makigharong ni kinsa
Magpabilin lang ko
Diri sa kahilom.

2008.02.02

------


Sa Mga Buot Matulog

Taas ang kagabhion
sa mga wa mahinanok
Lisod ang magpakaron-ingnon
nga nahulog na sa katulugon
Dili kalimdan mata nga nagbuka
hunahona nga galupad
lawas nga gikapoy

Limdi ang kaugalingon
sa takna sa kagabhion
Ayaw suonga bisan ang kadlawon
Did-i ang mga pilok sa pagpiyong
Ipha ang mga tiki sa imong bungbong

Sama sa inahan nga gapuwaw sa iyang puya
Lumsi ang kahilom diha sa pahiyom
Himoang adlaw ang kaadlawon
Aron ikaw ihatod sa katulugon

Yani

[akoyako]

Tig, Tong, Tig, Tong



ang alho ug lusong ni Lolo ug Lola
sa matag tig, tong, tig, tong sa tunob
sa panahon, molanog
gapahinumdom.
si Lolo nako,
si Lola nimo
sama sa tingog
madungog pa usob
molanog sa handomanan ang kalami
sa ilang kabilin nga gilubok sa ilang


pag-pangga ug pag-amuma, sa ilang mga asoy ug sugilanon, kahimuot ug pahiyom, sa
pagpamuyag ug pagmaymay, sa ilang pagtudlo ug pagmatuto, sa pagpanaw sa hilom...




Akoy
2008.02.06

[erichoy]

mura mag double meaning dah.. hehehe

[akoyako]

Nagdumili nga mohalok, giuhaw
sa kahiladman nga ulianan sa tanan
nga panahom kun sugilanon. Ang balak
dili buot mabahaw ang mga kagahapon nga
usahay motumaw matag karon, makigsayaw
sa yogyog sa tambol nga nahubog sa lanog sa
kaugalingong tunob. Ug Mitungha ang kahayag
sa adlaw nga miduaw sa gialimongawang damgo
kon tinuod ba ang tanan nga mitumaw sa kahilom.

Hapdos ang dughan sa napukaw nga kamingaw sa
higala nga nipanaw sa kasadpan, nga dugay ng wa
mahimamat pag-usab, usa ka laylay sa kagahapon,
makakabig gyod sa katam-is sa paghalad sa talad-
halaran sa kahidlaw, tuboran sa mga tanghaga sa
kahiladman, nga sama sa pughawng dagat nga gi-
uhaw sa dula kun pasundayag sa parat-parat og
lami-lami nga kinabuhi. Ang halok sa aping sa

Lapyahan, kamatayon sa balod. Human og
kiay-kiay, layog-layog sa panahon, bisan
makab-ot ang gitinguha nga lapyahan,
ang damgo mahanaw ra gihapon, sa
init sa adlaw matunaw, mahiuli sa
gihapon, balik sa kahiladman,
sa walay katagbawan nga
kahidlaw, hangtod nga
mahimatngonan, diay
ang balod ug dagat,
dili duha ka binuhat,
diay Usa ra, nahiusa
sa kanunay. Ug ang
mga kiaykiay sa balod
nga nalumay sa kalipay,
nga naghandom sa halok
sa lapyahan, mosapnay sa mga
balas sa iyang kulamoy ug dughan,
mohalok sa ngabil sa baybayon, ug aron
lang diay mahibulong...tanang butang lumalabay.

Kamatayon sa balod ang halok sa
lapyahan. Ang katumanan sa damgo ug
tingusbawan, maoy iyang kataposan. Mahigmata,
hinaot pa unta, sa iyang paghiuli sa
kahiladman, sa kahimatngonan nga way
katugkaran. Diay, dili siya usa ka balod, diay Siya...

Ang Dagat, nagasapnay sa tanang
balod sa kinabuhi. Siya ang kaalam sa
nga nagatan-aw sa tanang kahibulongan. Siya
ang buhing kahimatngonan,
nga taliwala sa kahilom,
nagatungha, nagaduaw,
nagatan-aw sa
tanang pasundayag
sa kamatayon
ug pagkabanhaw,
nagapahiyom
sa balod nga
gadumili
paghalok sa
lapya-
han.
..
.


Akoy
02.03.2006

[akoyako]

Sa sinugdan, miliki ang kawayan. Sa lantay naghigda ang babaye ug lalaki . Lawom ang gabii. Mihapuhap ang hangin sa kaadlawon. Nahigmata si Kusgan, gitugnaw. Si Matahom sa iyang kiliran, mitanday sa iyang batiis. Miinit ang ilang panit. Midilaab ang ilang dughan. Mihiusa ang ilang kusog. Mitukmod-miduot sa pus’on ug pusod. Milawom ang ginhawa . Mihaom sa gilaum. Miagay ang dugo. Ang singot mitulo. Ang lantay miuyog. Ang langit miduyog. Militi. Midalogdog. Ang hangin mihuros. Ang punoan milabyog. Ang kawayan miliki. Ug mibaganaw ang tubig, mitumaw ang Yuta-----Yutang Tabunon.



Akoy
2004.5.17