NAILHAN na sa kapulisan ang usa sa upat ka tulisan nga ningtulis sa LBC-Escario Branch kagahapon sa ala 1:10 sa hapon sa may Escario street, Barangay Camputhaw, dakbayan sa Sugbo.
Nakasibat ang mga tulisan nga sakay sa duha ka mga motorsiklo paingon sa ibabaw nga bahin sa Barangay Opra dala ang P11, 017 cash.
Way nahimo ang cashier nga sila si Lea Mariquit, 25, ug Connie Concepcion, 31, human kalit nga miti-on nilag armas ang wa mailhing mga tulisan.
Kini maoy gibutyag ni Supt. Romeo Santander, hepe sa City Intelligence Branch (CIB) sa Cebu City Police Office (CCPO) dihang nahinabi sa dySS Super Radyo uig Sun.Star Superbalita.
Ang upat ka mga tulisan nailhan sa ilang testigos.
Matud niya nga usa niini babaye nga kuyog sa laing tulisan diha sa gawas nga maoy nagsilbing lookout sa duha nila ka mga kauban nga maoy nisulod sa LBC.
Di pa sila makasulti kon mga professional ba ang mga tulisan sanglit nagpadayon ang ilang imbestigasyon sa maong kaso, apan dakog ikatabang ang pag-ila sa testigos sa usa ka suspek.
Ang ilang saksi diha sa gawas nakakita sa duha nga nagpaabot sa ilang kaubang tulisan.
Human niini, ningsakay ang duha ka mga motorsiklo dayon paspas nga nisibat.
Gibutyag niya nga way gwardiya ang LBC hinungdan nga yano lang ningsulod ang duha ka mga tulisan samtang ang duha nagsilbing back-up ug mideklarar og tulis.
Ang gwardiya sa silingang pawnshop wa sab atol sa pagpanulis kay nikaon niadtong higayuna hinungdan nga wa makabantay sa kagubot.
Matod ni Santander, nga dugay na-report ang hitabo kay nadawat sa Mobile Patrol Group (MPG) mga alas 1:30-1:40 na sa hapon ang alarma hinungdan nga wa na nila maabti.
Wa sab ma-on ang CCTV sa LBC niadtong higayuna.
LBC Escario gitulis; P10T nakuha | Sun.Star