Kon magpa-renew ang usa ka motorista sa rehistro sa iyang sakyanan diha sa Land Transportation Office (LTO) dili gayud mosipyat nga pabayron siya og P50 para kuno “sticker fee.”
Apan daghang motorista nga nagbagolbol kay samtang pabayron sila para sa sticker apan walay sticker nga ihatag kanila. Butangan lang og patak nga “No Available Sticker” sa kopya sa resibo sa iyang nabayad.
Naikag ko nga mituki niining maong isyu kay daghan ang misumbong ug mireklamo kanako sanglit nasayod man sila nga deputized agent ko sa LTO.
Akong klarohon nga dili kini sayop sa kadagkoan sa LTO dinhi sa ato nga gipangulohan ni Regional Director Raul Aguilos kon dili sayop kini sa kadagkoan sa LTO-Central Office didto sa Manila.
Apan isip maoy labing dako nga opisyal sa LTO dinhi sa Central Visayas, si Director Aguilos angay nga mangita'g paagi niini kay pagkadako nga salawayon niini. Pabayron ang motorista sa sticker apan walay sticker nga ihatag.
Nahibaw-an nako nga kuwang gayud ang mga sticker nga gipadala dinhi sa Central Visayas mao nga bahin-bahinon lang usab nila kini sa lainlaing LTO Branches.
Sama sa Talisay City, gitug-anan ko ni Bernardo “Dodong” Borromeo nga maoy hepe sa LTO-Talisay nga 500 ra ka sticker ang gihatag kanila. Sus, Pebrero pa lang hurot na ang sticker.
Ang nakapait ra ba kay gitug-anan ko ni Dodong nga kon walay sticker nga maisyu, dili kuno ma-transfer ang ngalan sa rehistro. Pananglit ako gusto unta nako nga ipabalhin sa akong ngalan ang rehistro sa napalit nako nga sakyanan, matud ni Dodong dili kini mahimo.
Kon mao kana, pwerteng daghana nga mga motorista ang mahasol? Sama nako, adto unta ko magparehistro sa Talisay apan giingnan ko ni Dodong Borromeo nga wala na sila'y sticker. Paita, napugos ko'g adto sa Danao.
Unya, ang mga road law enforcer malangan usab sa pagsita sa mga sakyanan nga walay current year sticker kay magtoo man nga wala kini marehistro apan narehistro na diay.
Dinhi sa Central Visayas kapin sa tunga sa milyon ka sakyanan ang narehistro. Ang tukma unta nga kon pila ang bana-bana sa mga sakyanan nga marehestro sa usa ka lugar hatagan og sobra nga sticker kay iuli ra man bitaw kon dili magamit.
Tiaw mo, ang LTO dinhi sa Central Visayas mikolekta og P1,124,408,750 kon kapin sa P1.1 Bilyones kaniadtong miaging tuig. Unya nganong magtihik-tihik man ang LTO-Manila paghatag sa gikinahanglanon sa mga motorista?
Maayo unta og kining maong isyu mahatagan og diha-diha nga sulbad sa kadagkoan sa LTO ilabi na ni Undersecretary Virginia Torres nga maoy gitugyanan pagdumala sa LTO.
* * *
Nakadawat ko og report kabahin sa giingong usa ka “drug lord” diha sa Batuan, Bohol. Matud sa akong informer diha sa Bohol nga aron kuno kaprotehean ang iyang illegal nga kalihukan, kining maong babaye nga matud pa druglord, nanguyab og polis.
Atong hagiton ang kadagkoan sa Philippine Drug Enforcement Agency (PDEA) nga aksyonan nila kining maong report kay nasayud man ko nga nakaila mo niining maong babaye. Unya, si General Marcelo Garbo angay usab nga mopasusi niini kay kining maong polis sigurado nga protektor ni sa kalihukan sa druglord.
Duna ko'y ngalan sa giingong druglord apan dili lang nako ipublikar dinhi sa mantalaan. Matud sa akong informer nagpuyo kini dili kaayo layo sa police station. Siyaro 'sab, unsay gihimo ninyo mga polis?
* * *
Gitugyan na nako ni LTO law enforcer Bimboy Arnaiz ang report kabahin sa dakhang mga kulurum nga sakyanan, sagad ani mga HiAce nga gigamit isip pasaheroan ug nagbiyahean sa Balamban.
Dili lang nako dayon ibutyag ang tulo ka mga litra sa plate number apan mao ni ang mga numero sa plate numbers 140; 468; 334; 958; 868; 547; 193; 850; 418; 953; 688 ug daghan pa kaayo.
Awhagon nako si sir Bimboy ug kaubanan nga paspasan nila pagpanakop kining maong mga kulurum nga sakyanan.
Palpak sa LTO | Freeman Opinion, The Freeman Sections, The Freeman | philstar.com
Palpak sa LTO
Reply With Quote
Posting Permissions
