Cebu local news (daily update)

[marqi_20]

Marijuana gigamit pang-recruit

CEBU, Philippines - Gidakop sa kapolisan ang 18 ka mga giingong sakop sa Crips gang nga gilangkoban sa mga hamtong ug mga minor nga gituohang recruits samtang nag-pot session sa usa ka abandonadong payag sa Purok Limonsito sa barangay Umapad, dakbayan sa Mandaue alas-5 pasado ang takna sa miaging hapon.

Nagduda ang kapolisan nga gigamit karon sa mga gangs ang ilegal nga drugas aron maka-recruit og mga batang sakop.

Si Inspector Areston Bataluna sa Presinto 5 sa Opao Police Station maoy nangulo sa ronda inabagan sa mga sakop sa Barangay Intelligence Network (BIN) ug mga barangay tanod sa barangay Umapad.

Giila ni Inspector Wilson Abot, hepe sa kapolisan sa Presinto 5 ang mga nadakpan sa aktong nanuyop mao sila si Ryan Vergara, 18, Ryan Coliamat, 24, James Estorna, 21, Andy Cris dela Crus, Bertulfo Motaler, 21, Sunny Villasalo, Raymond Fermin, 19, Jovalyn Alonso, 26, Roel Ranili, 18, Aldy Amaya, 23, Juliet Mendoza ug ang nahibiling pito pulos mga minor nga nagpanuigon og 17-anyos paubos ngadto sa 12- anyos.

Ang mga minor gidala na sa mga kawani sa Department of Social Welfare and Services (DSWD) ug mao say naggiya kanila pagdala sa PNP laboratory kagahapon.

Si Abot miingon nga si Aldy Amaya maoy ilang nasakmitan og mokabat og kapin sa tunga sa kilo nga pinaugang dahon sa marijuana.

Samtang si Jovalyn Alonso nga taga barangay Lapa sa lungsod sa Dalaguete nakuhaan og unom ka putos nga pinaugang dahon sa marijuana.

Ang mga polis nakadawat og impormasyong adunay mga kalalakin-ang kanunay nga magtapok sa maong dapit ug mag-pot session ug ang uban kanila mga menor de edad.

Tungod niini nagduda karon si Abot nga posibleng gihimong panghaylo sa mga hamtong ang marijuana aron maka-recruit og mga batang ilang mahimong sakop sa gang.

Si Alot miingon nga ilang gidala ang tanang dinakpan ngadto sa PNP Crime laboratory alang sa drug test nga maoy ilang basehan sa pagpasaka og kaso ngadto sa mga dinakpan nga kasamtangan karon nga ilang gibalhog sa bilanggoan. (EIM) (BANATNEWS)

[marqi_20]

Mga task forces ug hawsyao sa BOC papason

CEBU, Philippines - Papason sa buhatan sa Bureau of Customs ang mga task force ug mga ‘hawsyao’ nga empleyado nga nagdoble ang trabaho sa maong buhatan.

Kini ang bahad ni Bureau of Customs Commissioner Rozzano Rufino “Ruffy” Biazon atol sa iyang unang pakigkita sa mga stakeholders, importers, exporter ug mga kawani sa Customs Port of Cebu diha sa Cebu Country Club sa Banilad dakbayan sa Sugbu kagahapon sa buntag. Atol sa usa ka press conference si Biazon misabot sa problema sa mga sakop sa Cebu Chamber of Commerce and Industry ug sa mga stakeholders kalabot sa daghang task forces sa buhatan sa BOC nga maoy makalangay sa ilang mga kargamento ug nagdoble ang trabaho niini sa ubang division sa Customs.

Ang importante matud pa ni Biazon mao ang dali nga transaksiyon sa mga kliyente sa BOC ug dili kini lisud-lisoron sa ilang mga kawani.

Samtang gipahibalo ni Biazon nga panangtangon usab ang mga kawaning dili kwalipikado sa trabahong angayan lang sa usa ka organic personnel sa BOC.

Buot niyang malimpyohan gikan sa mga kawatan ang BOC sa dili pa mahuman ang tuig 2011. (BANATNEWS)

[marqi_20]

Pito ka driver positibo sa drugas

CEBU, Philippines - Pito ka mga drayber sa minibus nga pasaheroan ug jeepney drivers ang nagpositibo sa ginadiling drugas atol sa gilusad nga kinalit nga roadside drug testing sa mga tinugyanan sa Land Transportation Office (LTO-7) kagahapon sa buntag didto sa highway sa dakbayan sa Talisay.

Si LTO-7 director Raul Aguilus mibutyag dihang nahinabi sa Banat News nga sukad kagahapon sa udto tulo na ka drayber ang nagpositibo gikan sa 20 nga napaubos sa kinalit nga drug test.

Matud ni Aguilus gikuhaan dayun una sila og lisensiya aron dili sila makamaneho og pasaheroan samtang nagpaabot sa resulta sa confirmatory test.

Kun masutang positibo gihapon sila sa ilegal nga drugas suspensuhon ang lisensiya niini ug ipaubos sila sa rehabilitasiyon.

Ang roadside drug testing matud ni Aguilus gitumong aron pagsiguro nga walay mga adik adik nga drayber nga mobiyahe nunot ning pagdagsang usab sa mga pasaherong namauli sa ilang tagsa tagsa ka lugar nunot sa taas nga bakasyon atol sa kasaulogan sa Kalag Kalag karung Martes.

Nakalitan ang mga drayber nga nagbiyahian sa habagatang bahin dihang gimuntar sa LTO-7 inabagan sa Task Force Alpha ang road side drug test.

Matud ni Aguilus magpadayon ang kinalit nga roadside drug testing sa mosunod nga mga adlaw bisan og liwas na sa kalag-kalag aron madisiplina ug moundang na sa dautang bisyo ang mga adik adik nga drayber.

Gihimo kini sa LTO aron masiguro ang kaluwasan sa mga pasahero gikan sa mga kamot sa mga drayber.

Gipahibawo usab ni Aguilus ang mga drayber nga likayan ang overloading tungod kay estrikto nila kining monitoron tungod kay usa kini sa hinungdan sa disgrasya ingon man kadtong mobiyahe gawas sa ilang rota nga walay special permit gikan sa Land Transportation and Franchising Regulatory Board-7.

Aduna nay help desk nga kadangpan sa mga pasaherong dunay reklamo diha sa South Bus ug North Bus Terminals apil na sa Ayala Terminal ug Citilink Terminal. (BANATNEWS)

[marqi_20]

Ex-Army nga "gun runner" nadakpan

CEBU, Philippines - Gidakop sa kapolisan ang usa ka kanhi sakop sa Philippine Army nga namalit og mga high powered nga armas nga paingon na untang mosakay sa Ro-Ro paingon sa San Isidro, Leyte kagahapon sa alas-5 sa buntag diha sa wharf sa barangay Dunggoan sa dakbayan sa Danao.

Si Ariel Tasic Bolivar, 47, nga taga Mindanao nakuhaan og usa ka Colt 9mm assault rifle, tulo ka .45 nga pistola ug duha ka .357 revolver, ug siyam ka mga magazines.

Si Insp. Romulo Torralba, deputy for operation sa Danao City Police Station nga maoy nangulo pagsikop kang Bolivar nagkanayon nga nakadawat sila og impormasyon nga dunay tawong namalit og armas nga dad-on sa Mindanao ug mosakay kini og barko paingon sa San Isidro, Leyte .

Ilaha kining giatngan sa wharf ug sa dihang mihaom ang deskripsyon sa ilang impormante ilahang gisita si Bolivar nga nagdala og karton niadtong higayona nga paingon nang mosaka sa barko.

Matud ni Torralba sa dihang ilang gisusi ang sulod sa karton niini nasuta nga pulos armas nga giputos og papel ang sulod niini ug napakyas kini pagpakita og mga papeles sa pagdala niini.

“Dayon na niyang saka sa barko, mura gud siya og nakuyawan nga among gipangitaan papeles, wa ka tingog,” dugang sab ni Torralba.

Sa ilang pagsukitsukit giingong mitug-an si Bolivar kanila nga ikaduha na niya kining higayon nga nangompra og armas diha sa Danao.

Matud ni Torralba nga mitug-an usab kanila si Bolivar nga kanhi siya sakop sa Philippine Army kaniadto apan nataktak tungod sa absence without official leave (Awol) niadtong 1980.

Si Sr. Supt. Patrocinio Comendador, hepe sa kapulisan sa probinsya sa Sugbu nagkanayon nga ang maong armas dad-on ni Bolivar didto sa Mindanao ug diha lang iagi sa San Isidro, Leyte ug mag land trip nalang paingon sa Surigao del Norte.

Hinuon iyang giklaro ang maong mga armas walay koneksyon sa kasaulogan sa Kalag-kalag kundili gamiton kini sa mga kriminal didto o kaha gamiton sa pagpanulis.

Nagtuo si Comendador nga usa ka gun runner si Bolivar ug iya usab kining ibaligya ang maong mga armas didto sa Mindanao.

“I do believe magamit ni sa mga kriminal ug ibaligya ni didto, gun runner gyud ni siya (Bolivar),” matud pang Comendador.

Si Comendador mibana-bana nga dul-an sa P50 mil ang kantidad sa maong mga armas. Gitinguha sa kapulisan sa Danao nga ilahang mapasaka ang kaso sa piskaliya didto sa Danao kagahapon sa hapon batok kang Bolivar.

Si Bolivar sa dihang gisuwayan unta pagkuha sa iyang reaksyon, apan wala na gyud kini motubag bisan usa nalang ka pangutana sa mga sakop sa media diha sa provincial headquarters. (BANATNEWS)

[marqi_20]

Dinakpang Kenyan wa nay kwarta

CEBU, Philippines - Ang kampo sa Kenyan national nga nasikop human makuha-i og tulo ka kilong shabu mihangyo sa korte nga ihatag og balik ngadto kanila ang kwarta niini nga nagkantidad og US$ 3,700 ug 2 mil Qatari Riyal.

Ang abogado ni Asha Atieno Oguto nga si Ricardo Amores miduso og motion to release money kini human si Oguto nagkalisod na sa kwarta.

Mipasabot si Amores nga si Oguto dihang nasikop sa kapolisan gikuha og apil ang iyang kwarta hinungdan nga wala gyud siyay bisan usa ka dako nga magamit.

Kahinumduman nga si Oguto nasikop niadtong buwan sa Septiyembre ning tuiga sa mga sakop sa National Bureau of Investigation (NBI) diha sa Mactan-Cebu International Airport human kini mokanaog sa usa ka abyon gikan sa gawas sa nasud human makuhai sa iyang bagahe og tulo ka kilong shabu.

Si Oguto mihimakak niini. (BANATNEWS)

[marqi_20]

Rota sa sakyanan sa Talisay

CEBU, Philippines - Ang City of Talisay Traffic Operation Development Authority (CT-TODA) mipahibawo sa publiko kabahin sa mga karsada nga ilang sirad-an sa panahon sa Kalag-kalag.

Si Tronando Lastimosa bise presidente sa CT-TODA sa pakighinabi sa Banat News kagahapon nagkanayon nga sa Nobembre 1 ug 2, 2011 ang mga sakyanan nga gikan sa dakbayan sa Sugbo dili na makalahos sa barangay Tanke.

Kini kay anha ra sila sa eskina sitio Maglasang, barangay Cansojong dayon moliko sa bakanteng luna dapit sa may basketball court sa maong lugar balik sa ilang destinasyon.

Sa barangay Tanke ug Cansojong nagsumpay ang duha ka sementeryong pampubliko ug gikan sa sitio Rattan sa barangay Tanke paingon ngadto sa sementeryo dili na pasudlan og mga sakyanan.

Ang parking area sa mga sakyanan anaa sa bakanteng luna sa Villoria Compound nahimutang usab sa nahisgutang sitio.

Matud ni Lastimosa nga adunay mga enforcer nga idestino sa lugar diin unom sa buntag nga mo-duty gikan sa alas 6:00 sa buntag hangtud sa alas 2:00 sa hapon ug laing unom nga mo-duty gikan sa alas 2:00 sa hapon hangtud sa alas 10:00 sa gabii.

Sa barangay Poblacion diin nahimutang usab ang laing pampublikong sementeryo walay usbon nga rota sa mga sakyanan tungod kay sudlonon man ang maong sementeryo sa maong barangay.

Hinuon dunay mga enforcer usab ang idestino apan tulo lang sa buntag gikan sa alas 6:00 hangtud sa alas 2:00 sa hapon ug laing tulo nga mo-duty sa alas 2:00 sa hapon hangtud sa alas 10:00 sa gabii.

Ang maong mga enforcer maoy motudlo sa mga motorista kung asa kini dapita moagi, molusot ug mogawas aron dili masamok ang karsada.

Ang dalan Fidel Bas sa barangay Mohon paingon ngadto sa barangay Linao i-one way kini.

Sa barangay Mohon nahimutang ang Cebu South Memorial Garden usa sa pribadong sementeryo sa siyudad.

Matud ni Lastimosa nga 12 ka enforcer usab ang iyang idestino sa maong dapit nga maoy magmando sa trapiko aron dili maghuot ang karsada.

Ang maong mga enforcer mo-duty usab ang unom niini gikan sa alas 6:00 sa buntag hangtud sa alas 2:00 sa hapon ug ang laing unom gikan sa alas 2:00 sa hapon hangtud sa alas 10:00 sa gabii.

Sa Evergreen Memorial Garden nga sementeryo sa barangay Tanke habig sa Cebu South Coastal Road walay idestino nga mga enforcer tungod kay pipila pa lang ang gilubong diha sa maong pribadong sementeryo apan adunay mga polis nga idestino sa maong lugar aron mabantayan ang mga badlongon ug dili makapamiktima sa mga moduaw sa lubong sa ilang mga minahal sa kinabuhi sa maong menteryohan. (WC) (BANATNEWS)

[marqi_20]

Veco mipa-dismiss sa kaso

CEBU, Philippines - Mihangyo ang Visayan Electric Company (VECO) ngadto sa pag-umangkon ni 4th District Representative Benhur Salimbangon nga i-dismiss ang kaso sibil nga ilang gisang-at human makita nila nga kulang sa merito ang maong kaso.

Ang VECO pinaagi sa ilang abogado nga si manlalaban Bernard Inocentes Garcia miduso sa ilang tubag niadtong Lunes ngadto sa buhatan ni Judge Estela Alma Singco batok sa kaso nga gipasaka ni Ken Salimbangon.

Si Salimbangon mipasaka ug civil case for injunction with prayer for the inssuance of temporary restraining order ug writ of preliminary investigation kini human sa gikatahong illegal sila nga giputlan og linya sa kuryente sa Veco.

Kini tungod kay matud pa sa taga VECO nga sa dihang mipahigayon sila og random inspection sa subdivision sa kihanti sa 1530 East Capitol Hills corner Acasia St. niadtong Hulyo 6 ning tuiga, ilang nadiskobrehan nga ang meter nga gigamit nagtuyok nga counter- clockwise motion o nagtuyok nga paatras.

Midugang kini nga ang pagtaod og reverse nga transformer makamugna og dakong kadaot kay di man kini makahatag og tukmang kuwentada sa nakonsumong kuryente sa mga kabalayang tiggamit sa linya.

Gibutyag usab sa VECO nga ilang nadiskobrehan nga niadtong Nobiyembre 2009 hangtud sa Hulyo 2011, si Salimbangon aduna lay 8,331 kilowat-hour nga kunsomo sa elektrisidad nga nagkantidad og P86, 869.55 lakip na niini ang 25 porsento surcharge ug inspection cost.

Samtang ang kaso nga gisang-at ni Salimbangon ang marketing director sa CKL Real Estate Corp.iyang gihulagway nga illegal ug invalid ang instalasyon sa Veco.

Butyag usab ni Salimbangon nga miduso gani siya og reklamo ngadto sa buhatan sa Energy Regulatory Commission (ERC) tungod sa illegal disconnection.

Tungod sa maong kaso nga gisang-at ni Salimbangon ang buhatan sa VECO mihangyo karon nga ma-dismiss nalang ang kasong sibil kini tungod kay mahulog lamang nga ‘forum-shopping’ ang tanan. (BANATNEWS)

[marqi_20]

Manager gipusil angol sa kustomer

CEBU, Philippines - Kritikal ang kahimtang sa manager sa kompaniya nga tigpautang og motorsiklo human pusila sa iyang customer nga giimbargohan niya og motorsiklo didto sa barangay Lourdes siyudad sa Bogo niadtong Huwebes sa alas 8:50 sa gabii.

Ang biktima mao si Marsan Puebla Dua, 33 , minyo ug manager sa Wheeltic Motor Sales Corp. nga taga barangay Maslog siyudad sa Danao.

Samtang ang suspek mao ang iyang customer nga si Benhur Igdanes Angcajas, 30, ulitawo, apan adunay kapuyo ug taga barangay Pandan, sa dakbayan sa Bogo.

Si PO2 Joseph Salvador, imbistigador sa Bogo City Police mibutyag sa Banat News nga ang suspek nasuko human imbargoha ang iyang gidata-datahang motorsiklo tungod sa kapakyas niya pagbayad sa iyang datahan.

Mipasangil ang suspek nga gikuha didto sa iyang pinuy-anan ang giutang niyang motorsiklo nga wala siya pahibaw-a hinungdan nga nakigkita siya sa biktima.

Didto sila magtagbo sa J. Almerante St sa maong dakbayan diin misangko sa panaglalis ug dihang miinit na pag-ayo, gipusil sa suspek ang biktima.

Nasabak ang biktima sa tiyan apan wala makalapos ang bala niini ug miungot pa karon sa ilawom sa tiyan.

Ang biktima daling gihatud sa Verallo District Hospital apan gi-transfer dayun kini sa tambalanan sa dakbayan sa Sugbo tungod kay operahanan.

Samtang ang suspek nasikop dayon sa mga nirespondi nga polis ug nakuha gikan kaniya ang kalibre 38 nga armas nga duna pay lima ka buhing bala ug usa ka kabhang sulod sa cylinder niini ug maoy gituohang gigamit sa krimin.

Ang suspek kasamtangang nagtingkagol sa karsel samtang nagpaabot sa tukmang sumbong nga ipasaka batok niya. (WC) (BANATNEWS)

[marqi_20]

Presyo sa buwak klarong mosaka

CEBU, Philippines - Gituohang mosaka ang presyo sa mga buwak ilabi na sa adlaw sa mga santos ug kalag.

Sumala pa sa usa ka tindera og buwak nga si Eselen Marco sa Freedom park nga naandan na gyud nga momahal ang ubang buwak gumikan kay ang ubang stock niini magnihit man gumikan sa kadaghang order.

Matud pa niya nga ang lokal nga rosas nga kasagaran nagtangag sa presyo nga P120 ang dosena mahimo na kuno kining P150 ngadto sa P180 matag dosena agad sa klase ug sa gidak-on sa mga buwak.

Ang imported nga rosas, mahimo na kining P120 ngadto sa P200 matag dosena.

Ang orchids nga maoy kasagarang iadorno sa mga sam-ang, gibana-bana nga mosaka usab ngadto sa tag P100 ang dosena gikan sa P60. Samtang usa ka mamalitay og buwak sa Freedom park nga si June Arilena kinsa na-interview sa Banat News miingon nga mao gyud kini ang mahitabo sa panahon sa Kalag-kalag.

“Okay raman tingale, tinuod nga mahal pero panagsa ra sad baya nang kalag-kalag. Aron maka-save, igo-igoon lang gud ang pagpalit og buwak, dili kaayo daghanon basta ang importante nga duna lang kay i-adorno,” matud pa ni Arilena.

Samtang ang tag-peso nga presyo sa kandila magpabilin gihapon gumikan kay mao man gyud kini ang naandan sa mga tawo, matud pa ni Nisa Jane Pableo, tindera og kandila sa sam-ang sa Calamba. (BANATNEWS)

[marqi_20]

P3 mil sa senior ihatag sa Dec. 8

CEBU, Philippines - Misaad si Mayor Michael Rama nga ipanghatag na usab niya ang tag P3,000 nga financial assistance alang sa mga senior citizen (SC) karong umaabot nga Disyembre 8, 2011.

Ang maong kantidad maoy maghingpit sa gisaad ni Mayor Rama nga tag P5,000 matag tuig nga hinabang sa matag SC ning dakbayan sa Sugbo.

Sa miaging Septembre nadawat na sa tanang mga SC ang tag P2,000 nga unang bahin sa maong hinabang.

Sama sa naandan gusto sa mayor nga adto gihapon dawata sa mga edaran ang maong hinabang sa ilang tagsatagsa ka barangay sama sa miagi.

Ang dakbayan sa Sugbo may 45,000 kapin ka mga SC nga naggikan sa 80 ka barangay.

Ang maong programa gisugdan ni Kongresista Tomas Osmeña kaniadtong siya pay mayor sa dakbayan sa Sugbo sa tag P4,000 matag usa ka SC, matag tuig.

Kini nagrepresentar sa P2,000 alang sa birthday sa hingtungdang SC ug ang laing P2,000 alang sa Christmas bunos sa hingtungdan.

Apan ning panahon ni Mayor Rama gipun-an sa naulahi og P1,000 aron mahimong P5,000 ang tanan.

Gani sa tuig 2012 gipadak-an sa mayor ang gahin alang sa SC nga mokabat sa P300 milyones sa dakong pagtuo nga mosaka ang gidaghanon sa mga SC sa maong tuig. (BANATNEWS)