Cebu local news (daily update)

[marqi_20]

---

Traysikol nga way prankisa dakpon

CEBU, Philippines - Ang mga traysikol sa dakbayan sa Mandaue nga fake o mini nga prangkisa higpit nang gidid-an sa pagpamasahero aron nga dili madakpan ug masulod sa impounding area.

Ang maong pasidaan gihimo ni Edwin Ermac nga maoy executive direktor sa Traffic Enforcement Agency of Mandaue (TEAM) nga nahinabi sa Banat News kagahapon.

Matud pa niya nga hangtod na lamang unta sa Oktubre 15 ang ilang verification sa tanang mga prangkisa sa motorsiklo nga namasahero sa dakbayan.

Apan ilang gilugwayan hangtod karong panahona sa ilang pagpamasahero sanglit wala pa man moabot ang 2,000 nga gidaghanon sa mga traysikol nga ilang gihatagan og pagtugot nga mamasahero sa maong dakbayan.

Dugang pa ni Ermac nga dali na nga mailhan sa mga traffic enforcer ang mga traysikol nga fake og prangkisa tungod usab sa business plate nga gipahimutang sa matag kilid sa traysikol nga namasahero sa kabarangayan.

Gipasabot ni Ermac nga ang mga traysikol nga adunay business plate nagpaila nga legal na ang ilang prangkisa ug kadtong wala pay business plate , nagpasabot nga fake ang ilang prangkisa hinungdan nga pahunongon na kini.

Si Ermac miingon nga mokabat sa 4,000 ngadto sa 5,000 ang gidaghanon sa mga traysikol nga namasahero sa kabarangayan sa dakbayan apan 2,000 ra ang may business plate karon.

Hinungdan nga dakpon na sa TEAM ang mga traysikol nga masakpang mamasahero nga walay tukmang plate number ug itapok kini ngadto sa impounding area. (WC) (BANAT NEWS)

[marqi_20]

Turistang Hapon nalumos

CEBU, Philippines - Usa ka 53-anyos nga Japanese national ang napalgang patay nga naglutaw sa kadagatan sa Hudson Beach Resort sa barangay Agus, dakbayan sa Lapulapu.

Si Michio Mirishita nga taga Gumma, Japan gituohang nalumos samtang nag-skin diving o nag-snorkeling sa mokabat unom ka tiil nga gilawmon sa kadagatan sa nahisgutang beach resort.

Matud pa ni Inspector Zenaido Pastorfide Jr., sa Homicide Section kuyog ni Morishita ang laing Jaanese national nga si Yuki Shimura nga usa ka dive instructor ug duha ka boatman sa maong beach resort.

Apan si Alexander Paquibot ra maoy mipatim-aw sa kapolisan ug mipahibalo kabahin sa nahitabo sa maong Hapon.

Dugang pa ni Inspector Fastorfide nga si Morishita miingon nga si Paquibot miingon nga didto na sila sa taliwala sa kadagatan sa maong resort dihang si Shimura ug Morishita milangoy na sa dagat nga nagsul-ob sa ilang life jacket ug snorkel gear.

Apan nahibulong nalang siya dihang iyang nabantayan si Morishita nga mokulob-mohayang samtang naglutaw sa dagat nga dili normal nga buhaton sa mga mag-snorkel.

Hinungdan ngabiyaha kining giduol ug gikarga sa pumpboat ug gidala sa daplin dayon gihatagan og mouth-to-mouth resuscitation dayon gidala sa Mactan Doctor’s Hospital apan gideklarar kini nga patay na.

Si Pastorfide nagtuong naglisod og ginhawa ang maong Hapon samtang diha sa dagat ug nawad-an og panimuot dayon nalumos. (Uban sa report ni Ria Mae Booc sa The Freeman/EIM)(BANAT NEWS)

[marqi_20]

Tomas misaway ni Mike

CEBU, Philippines - Sama kang Bise Mayor Joy Augustus Young, si Kongresista Tomas Osmeña usab misaway kang Mayor Michael Rama sa giduso nga budget proposal niini alang sa 2012.

Nagkanayon si Osmeña nga naglisod gani si Rama sa pagkuha og P4.45-billion nga budget karong tuiga busa mosamot kini kalisud sa gisugyot niining P11.8 kay bilyon nga budget sa sunod tuig.

Sumala pa sa kongresista nga tataw kaayo nga ang gibuhat ni Rama mao ang pagluwas sa politikanhong karera niini.

Nagkanayon si Osmeña nga bisan unsa na lang ang mga plano ni Rama apan wala gyud kini buhata sa mayor.

Midugang si Osmeña nga magpunay na lang og plano si Rama nga moumol og “special body” nga maoy modumala sa South Road Properties apan hangtud karon wala pa gyu’y draft nga nahulma ang mayor.

Midugang si Osmeña nga murag pulos nalang pagarpar ang nahimo ni Rama niining iyang pamunuan karon. Hinuon ang mga suporter ni Rama nagkanayon nga daghan pa ang mahimo si Rama sa dili pa moabot ang election nga lisud pukanon kun si Osmeña lay kontra. (BANAT NEWS)

[marqi_20]

Samsam ug kauban sa Bag of Dreams

CEBU, Philippines - Ang mga kabataang nagtungha sa San Roque Elementary School (SRES) sa dakbayan sa Talisay, maoy unang benepisyaryo sa mga ipanghatag nga mga bag nga puno sa school supply gikan sa mga estudyante sa Ateneo Graduate School of Business-Cebu Campus sa proyekto nilang gitawag nga “A Bag of Dreams”.

Si Samsam Gullas usa sa mga lider nga nagpasiugda sa maong proyekto nagkanayon nga matag usa sa 2,407 ka mga estudyante sa SRES makadawat og tagsa ka bag karong Nobiyembre 3, 2011.

Si Samsam Gullas kinsa apo ni Kongresista Eduardo Gullas sa unang distrito sa lalawigan sa Sugbo nagkanayon nga napili nila ang SRES sa pagsubo ning program nga “A Bag of Dreams” human nila konsultaha ang mga kadagkoan sa mga tulunghaan sa maong dakbayan.

Matud pa niya nga ang mirekomendar nga adto isubo sa SRES ang maong proyekto naggikan sa mga kadagkoan sa eskuylahan sa kagamhanan sa maong dakbayan tungod kay ang San Roque maoy lugar sa Talisay nga daghan kaayong mga kabataang nagtungha nga kasagaran anak sa mga ginikanang kabus.

Samtang si John Rey Guadalquiver, usa usab sa lider sa maong proyekto nga kauban ni Gullas miingon nga gipili nila nga bag nga puno sa mga school supply ang ilang ipanghatag sa mga kabataan tungod kay nakita nila nga mao kini nag-unang panginahanglan sa mga kabataan aron makapadayon sila sa ilang pag-eskuyla.

Miingon si Guadalquiver nga usa sa mga hinungdan nga makaundang ang bata sa pag-eskuyla mao ang kakuwang sa ginikanan og kuwarta nga ikapalit og mga materyales alang sa pagtungha sa ilang anak.

Si Don Edrian Tirol kaubang lider sa grupo nagkanayon nga ang proyekto ilang gilusad uban sa nagkalainlaing mga organisasyon, gikan sa mga sektor sa negosyante, akademya , simbahan, ug bisan sa mga politiko, nga mibulig niini aron makabaton og kalampusan.

Matud pa niya nga usa sa mipaluyo niini mao ang Cebu Arts Foundation nga gipangulohan ni Kongresista Gullas, kansang adbokasiya nagpalanog alang sa kaayohan sa mga batan-on ilabi na sa mga kabataang nagtungha aron makabaton sila sa maayong kaugmaon.

Si Paolo Diaz kauban sa grupo mipahayag usab nga ang maong proyekto nga ilang ilusad sa San Roque, maoy una sa iyang matang, ug gisaad nilang ipadayon nila kini bisan kun anaa na sila sa tagsa-tagsa ka natad unya sa ilang propesyon sa umaabot nga mga adlaw.

Kauban sa grupo nga manguna sa pagpanghatag sa mga bag didto sa SRES karong Nobiyembre 3, 2011 mao sila si Christina Sia ug uban pang kauban nila sa Ateneo Graduate School of Business –Cebu campus. (BANAT NEWS)

[marqi_20]

2 giluba angol

CEBU, Philippines - Duha ka tawo ang naangol sa pagpanunggab nga nahitabo sa managlahing lugar sa dakbayan sa Lapulapu sa miaging gabii.

Ang mga biktima mao sila si Jerevic Sagarino Michelle, 19, ulitawo, ug Hanzel Dosdos, 19, estudyante sa Babag National High School, pulos taga dakbayan sa Lapulapu.

Ang suspetsadong miluba kang Michelle giila sa kapolisan nga si Edgar Agosto, hingkod nga silingan ni Michelle, samtang ang miluba kang Dosdos , usa usab ka batan-on nga wala hiilhi.

Matud pa ni SPO1 Allan Pantaleon sa homicide section sa kapolisan sa maong dakbayan nga nahinabi sa Banat News miingon nga si Michelle nagbarogbarog lang duol sa merkado sa Lapulapu nga nagpaabot sa iyang higala.

Apan kalit nga miabot ang suspetsdado ug sa way daghang estorya miduol kini sa biktima ug gihansakan ang buko-buko sa naulahi sa iyang kutsilyo.

Human mosirit ang dugo sa likod sa biktima mikabad usab dayon og dagan pahilayo sa maong lugar ang suspetsado ug wala kini hidakpi sa kapolisan.

Samtang si Dosdos gikan pa sa tulunghaan ug samtang naglakaw sa karsada paingon sa ilang balay kalit lang gisugat sa usa ka batan-ong lalaki nga wala hiilhi ug gihansakan siya og kalit sa kutsilyo niini.

Nasabak sa tiyan ang biktima ug dayong sibat sa kriminal gilabni niini ang cell phone sa nahauna dayong dagan pahilayo sa maong lugar.

Padayon pang gipangita karon sa kapolisan ang mga kriminal. (BANAT NEWS)

[marqi_20]

Igsuon sa naabswelto sa kaso gi-ambush

CEBU, Philippines - Naluwas sa tinong kamatayon ang usa ka habalhabal drayber nga igsuon sa usa ka high-profile robbery with homicide case human kini giambusan sa tulo ka armadong mga lalaki nga nagsakay og motorsiklo kagahapon sa alas-2 sa kaadlawon diha sa duol sa Langob shrine sa barangay Kalunasan siyudad sa Sugbu.

Si Boyet Carteciano, 30, taga Unit 5 sa barangay Kalunasan ug drayber sa habalhabal nakalayat gikan sa iyang motorsiklo bisan kun samaran na siya sa iyang paa ug nagligid-ligid duol sa pangpang daplin sa karsada sa maong lugar.

Ang mga tanod pinangulohan ni Isagani Ibarita mao nay nakaluwas sa biktima nga didto na sa ubos nga bahin ug nagsige og pangayo og tabang.

Sigun pa ni Ibarita naay naka-report kanila nga nakadungog og tawong nagpunay singgit ug nangayog tabang kay kini napusilan diha sa maong pangpang. Si Carteciano nga samaron sa walang tiil nagbitay sa pangpang nga gibana-banang 20 ka tiil ang giladmon.

Matud ni Carteciano nga duna siya’y gihatud nga pasahero sa Langob Shrine ug pauli na siya dihang kalit nga dunay tulo ka lalaking nagmotor ang mipaulan kaniya og bala.

Tungod niini nagpaligid-ligid siya hangtud nga nasangit siya sa pangpang. Si Carteciano gidala sa Cebu City Medical Center (CCMC).

Nagtuo ang kapulisan nga naalaan lang ang biktima sanglit ang igsuon niini maoy usa sa tulo ka mga gipasanginlang mitulis ug mipusil patay sa usa ka graduating student sa kursong nursing sa Cebu Doctors University (CDU) nga si Ruby Jade Ruba nga taga Leyte diha sa may Capitol Site pipila na ka tuig ang nakalabay.

Apan ang igsuon sa biktima na-acquit sa maong kaso samtang duha niini ka mga kauban nakombikto.(EIM)(BANAT NEWS)

[marqi_20]

Anak gipakumkom og baga sa inahan

MAMA mipaso og nagbaga nga uling sa iyang 11 anyos nga anak nga babaye ug di pa igo, nigaid pa gyud sa bata sa bungbong sa ilang balay niadtong Lunes sa hapon.

Kini tungod sa iyang kalagot nga nisuway paglungkab sa computer unit nga dunay mga sensiyo sa ilang paryente.Ang grade 5 nga tinun-an ang nakaangkog mga paso sa duha ka mga kamot ug gigaid pa sa iyang inahang 37-anyos nga factory worker sa ilang balay sa Barangay San Vicente, lungsod sa Liloan niadtong Lunes sa alas 2 sa hapon.

Hinuon nasikop ang inahan ug gipasakaag kasong kalapasan sa RA7610 kun Anti-Child Abuse Law tungod sa iyang gibuhat.

Mga ngan sa inahan ug anak gipugngan.

Si PO2 Rutchell Jugalbot, sa Lilo-an Police Station nga nahinabi sa Sun.Star Superbalita nagkanayon nga sa miaging duha ka mga adlaw, ang bata nanghilabot sa sa senselyo nga kita sa negusyo nga computer sa iyang uyoan.

Ang uyoan nitug-an sa inahan labot sa gihimo sa bata.

Hinuon wa makuha ang mga senselyo dihang giablihan na unta sanglit iyang naabtan.

Apan ang inahan nibutyag sa kapulisan niangkon nga napungot na siya ug napuno na sa pagpabadlong sa bata hinungdan nga iyang nahimo ang pagmaltrato niini.

Matod ni Jugalbot nga dunay nagbagang uling sa balay mao nga gipakumkom sa inahan ang bata hinungdan nga pwerting minatay og hilak sa kasakit sa paso sa duha ka mga kamot.

Wa pa matagbaw, ang inahan nikuhag pisi ug gigaid niya ang bata sa bungbong sa ilang balay.

Apan naluwas ang bata dihang ang iyang uyoan nga mao ra say nireklamo sa iyang gibuhat, nakakita sa bata nga gigapos sa inahan.

Naluoy siya sa kahimtang sa iyang inahan hinungdan nga gipahibawo ang kapulisan.

Ang mga sakop sa kapulisan sa Lilo-an inabagan sa mga sakop sa Department of Social Welfare and Development (DSWD) nisikop sa inahan ug gibalhog sa police station.

Ang inahan nga nabilanggo nagbakho sa paghilak uban sa iyang bana nga usa ka welder dihang niduaw sa police station kagahapong adlawa.

Lakip sa ningduaw mao ang ilang laing mga anak.

Mipadayag sa iyang tumang pagmahay ang inahan sa iyang nahimo sa iyang anak nga maoy ikatulo sa unom nila ka mga bata.

Gihatagag kahigayunan ang inahan nga mapa-ubos sa counseling sa DSWD hinungdan nga wa mapasakaig kaso kagahapong adlawa samtang ang bata ubos na sa poder sa maong ahensya.

Naluoy ang mga awtoridad tungod kay gagmay pa ang mga anak sa magtiayon.

Si SPO2 Gay Servilla, chief sa women’s desk sa Lilo-an Police nga nahinabi sa Sun.Star Superbalita, nagkanayon nga usa kini ka dakong kalapasan sa inahan ubos sa lagda sa RA7610.

Gipatik sa mantalaang SuperBalita Cebu Oktubre 19, 2011.

[marqi_20]

Mga Ponce sa Sorsogon ilubong

HUMAN sa pipila ka mga adlaw sukad sa giingong pagmasaker ni Emmanuel Ponce sa iyang pamilya, nahukman sa iyang kabanay ug sa pamilya sa iyang asawa nga si Melinda nga adto silang lima ilubong sa Sorsogon City.

Sa sinugdan, naplanohan unta sa masig ka habig nga si Emmanuel anhi ilubong sa Sugbo samtang ang iyang asawa ug ilang tulo ka mga anak dad-on sa Sorsogon.Apan si Embrelaince “Ember” Ponce, 13, bugtong buhi sa mga anak sa magtiayon, niingon nga siya ang magbuot.

Kagahapong adlawa, ang habig sa pamilyang Ponce, 55, ug sa iyang asawa nga si Melinda, nakahukom nga dad-on ang tanang lawas ngadto sa Sorsogon City sa Bicol region Sabado sa buntag.

Ang ilang helper nga si Anastacia Deriega, 34, gikatakdang dad-on usab sa San Isidro, dakbayan sa Talisay ugmang adlawa ug posibleng ilubong sa Sabado, matod pa ni Alice Canasa, paryente sa bana sa biktima.

Si Paul Redula, kabanay ni Emmanuel, nagkanayon nga magtampo-tampo ang mga kabanay nila ni Emmanuel ug Melinda aron sa paghatod sa ilang mga lawas uban sa ilang tulo ka mga anak nga sila si Elaine Grace,26; Heather Joy, 24; ug Emlin Bridge, 18.

Si Embrelaince mohatod ngadto sa Sorsogon City sa haya sa iyang banay apan wa pa masayri kon kanus-a mobalik ang bata dinhi sa dakbayan.

Apan gitug-an ni Redula nga dinhi sa siyudad motiwas og eskwela si Embrelaince nga padayon pa nipailawom sa stress debriefing alang sa daling recovery sa bata gumikan sa hitabo. Pilapil-PIT AB Comm Intern

Gipatik sa mantalaang SuperBalita Cebu Oktubre 19, 2011.

[marqi_20]

Gwen mihatag og rosaryohan

USA ka gold-bead rosary ug mass card ang gihatag ni Gobernador Gwen Garcia ngadto ni Embrelaince Ponce, ang kinamanghuran nga anak nga maoy bugtong survivor sa nahitabong masaker sa dakbayan sa Talisay niadtong Dominggo sa buntag.

Kini atol sa iyang pagbisita sa haya sa mga Ponce uban ni Bise Gob. Agnes Magpale, Yolly Daan, asawa ni Bokal Julian “Teban” Daan nga higala sa mga Ponce.Sa pag-abot sa gobernador miduol dayon siya sa dalagita ug gigakos kini og hugot dayon emosiyonal nga nakighinabi niini sulod sa pipila ka minutos ug human tagsa-tagsa nga giduol ang lungon sa mga nangamatay.

Ang gobernador niingon nga ang maong rosaryohan gi-bendesiyonan ni Pope Benedict XVI ug mao kini ang kanunay niya nga gamiton panahon nga siya mag-rosaryo.

Gipatik sa mantalaang SuperBalita Cebu Oktubre 19, 2011.

[marqi_20]

Lisensya gipasubay na

GIPASUBAY na sa Police Regional Office sa Central Visayas ang giisyu nga lisensiya sa Firearms, Explosives, Security Agencies and Guard Supervision Section ngadto kang Emmanuel Ponce nga niunay pag-masaker sa iyang asawa, tulo ka mga anak ug katabang pinaagi sa pagpusil sa mga biktima gamit ang iyang .45 pistol.

Samtang nagplano si PRO-7 Director Marcelo Garbo nga makigtagbo sa tanang nanag-iya ug namaligya og mga armas sa rehiyon labi na sa Sugbo. Matod ni PRO-7 deputy director for operations Senior Supt. Louie Oppus nga ila gipalawman ang ilang pakisusi kon nganong naisyuhan og lisensiya si Ponce nga duna man kini’y deperensiya sa pangisip human matagak sa gisakyan nga barko napu ka tuig na ang nakalabay.

Gipatik sa mantalaang SuperBalita Cebu Oktubre 19, 2011.