Cebu local news (daily update)

[marqi_20]

---

Miunay og 'lugos' sa anak sa kainom

CEBU, Philippines - “Dila ray labod.” Kini maoy nahiaguman sa usa ka 27-anyos nga lalaking miunay og lugos sa 9-anyos nga batang babayeng anak sa iyang kainom sa usa sa mga barangay sa dakbayan sa Lapulapu sa milabay’ng gabii.

Ang suspek nga si Noel (apelyedo gipugngan), 27, lumad sa taga barangay Gun-ob dakbayan sa Lapulapu gitabangan og kulata sa mga tawong migukod kaniya human nakaipsot sa mga mirespondeng mga tanod.

Matud pa nila ni Romeo Mejia ug Rossbelt Andales nga mga sakop sa Task Force Kalikasan nga maoy nakadakop ni Noel nga mga alas 11:00 sa milabay’ng gabii nakadawat sila og reklamo nga dunay pagpanglugos nga nahitabo diin usa ka 9-anyos nga babaye ang biktima. Dihang ilang girespondehan ang suspek nga wala nay sapot ug nagpatong na sa bata hinungdan nga ila kining gidakop apan nakahigayon kini pag-eskapo ug nakadagan.

Ang suspek naglayatlayat sa mga atop sa panimalay sa maong dapit samtang kini gitabangan og gukod sa mga tawo ug dihang naabtan gitabangan kini og kulata hinungdan sa grabeng mga bun-og sa kalawasan nga iyang naangkon.

Usa ka saksi mitug-an sa Banat News nga birthday sa iyang amahan niadtong higayona ug ang ilang amahan nakig-inom sa suspek.

Matud pa gihulga sa suspek ang bata sa gidala niining kutsilyo ug diha-diha giguroy kini ngadto sa basurahan sa lugar nga giparkingan sa mga dagkong trak.

Sumala pa nga gitanyagan sa suspek og P50 ang bata aron makighilawas kaniya apan nagdumili kini ug misinggit hinungdan nga naalarma ang pipila ka residente sa maong dapit ug sekretong misumbong sa mga awtoridad.

Atol sa pagkasikop sa suspek wala makita ang kutsilyo kay giingong gilabay niini atol sa ginukdanay. Ang suspek nga giingong pwerteng bun-oga ug dili na makatingog ug maglisod og lakaw gibalhog sa kapolisan sa Station 3.

Ang biktima gidala sa mga sakop sa Women and Children’s Desk sa tambalanan alang sa eksaminasyon. - BANAT NEWS

[marqi_20]

Drayber sa taxi gipusil patay

CEBU, Philippines - Patay nang nahidangat sa tambalanan ang usa ka drayber sa taksi human gipusil sa tulo ka lalaking nagsakay og motor pasado alas 4 sa kaadlawon kagahapon sa dalan Sanciangko eskina Junquera barangay Kamagayan.

Ang biktima nailhan nga si Aquinaldo Mangubat Lorono, 37, kinsa nakaangkon og mga samad pinusilan sa kalawasan.

Sa imbestigasyon sa kapolisan nasayran nga ang biktima uban sa iyang mga higala diha sa Bottoms Up Bar sakay sa usa ka Toyota Vios nga awto nga adunay plakang ZMM-529 aron paabuton ang usa ka babaye.

Samtang nagpaabot nakatulog sila sa sakyanan apan kalit nga miabot ang mga gikatahapang sakay og duha ka motorsiklo ug ang usa nga adunay angkas kalit mipusil sa biktima.

Ang biktima naigo sa tuong dughan ug tuong bahin sa iyang kilid. Si Nicanor nga nakamata sa buto daling mipadagan sa awto ug gidali pagdala ang biktima sa Cebu City Medical Center apan gideklarar kini nga dead on arrival.

Sa pakisusi sa kapolisan diha sa crime scene duha ka kabhang sa kalibre .45 ug usa ka deformed slug ang ilang nakuha.

Samtang ang hospital staff mi-turn-over usab sa mga kabtangan sa biktima susama nalang sa pitaka nga adunay sulod nga 1, 300, unom ka US Dollars, drivers license ug cellphone.

Ang kapolisan padayon pa sa ilang imbestigasyon kabahin sa maong insidente. - BANAT NEWS

[cobraKing]

na unsa nman tawn ni oi..

[marqi_20]

Bayong-bayong naghikog hose gigamit

CEBU, Philippines - Patay nang napalgan ang usa ka bayong-bayong nga naghikog gamit ang plastic hose sulod sa kuwarto sa barangay Sindulan, syudad sa Naga sa miaging hapon.

Ang naghikog nailhan nga si Jonriel Caballero, 17, ug molupyo sa maong lugar.

Sa pakighinabi sa Banat News ni SPO2 Ian Quintayin misaysay nga base sa ilang nakuha nga impormasyon, nasayran nga sa wala pa maghikog ang maong batan-on gipapalit pa kini sa iyang ginikanan og utanon sa silingan nilang tindahan.

Apan pag-uli giingong mideretso kini sa iyang lawak ug wala na mogawas sulod sa pipila ka takna.

Dihang gisusi sa mga kabanay ang iyang lawak, didto nadiskobrehan kini nga wala nay kinabuhi ug gibalikosan sa tumoy sa plastic hose ang liog niini kansang pikas tumoy didto igaid sa ilang sagbayan.

Matud pa ni Quintayin nga nasuta sa mga kabanay nga may plano gyud ang maong bayong-bayong sa paghikog.

Samtang dugang nakuha usab nga impormasyon ni Quintayin nga ang biktima misumbong kuno sa iyang mga higala nga nakasala siya sa usa ka babaye apan wala kini modetalye kun unsa nga klase sa sala hinungdan nga gibati niini ang tumang kaguol ug kabalaka.

Dugang impormasyon nga nakuha ni Quintayin nga ang biktima gipaundang sa iyang ginikanan sa pagtungha tungod kay wala na kuno kini magtarong sa pag-eskuyla kay didto na malingaw sa pagduwa og computer. Apan wala hisayri sa kapolisan ug sa mga ginikanan kun unsa gyu’y hinungdan sa paghikog sa maong batan-on. - BANAT NEWS

[marqi_20]

Health Service monitoron sa LMP

CEBU, Philippines - Usa sa mahinungdanong butang nga nahisgotan sa gipahigayon nga Health Summit didto sa Capitol Social Hall niadtong Biyernes mao ang pagmonitor sa mga membro sa League of Municipalities of the Philippines (LMP) sa mga health service sa matag lungsod lukop nasud.

Matud pa Mayor Strike Revilla sa Bacoor, lalawigan sa Cavite, kinsa sa samang higayon maoy National President sa LMP nga ang nag-una karon nga problema sa nasud mao ang dili maayong pagpanghatod sa programa sa panglawas ngadto sa molupyo ilabi na sa nagpuyo sa kabukiran.

Si Revilla nagkanayon nga mao kini lig-ong tahas karon sa LMP nga mosusi sa kaepektibo sa mga pangalagad nga gidalit sa kagamhanan sa kaayohan sa panglawas nga gihatud sa mga municipal ug barangay health workers sa mga molupyo sa kalungsoran ug kabarangayan aron masiguro nga mapahimuslan kini sa labing kabos nga mga molupyo sa matag dapit.

Samtang si LMP Cebu Chapter President Nelson Garcia kinsa maoy mayor sa lungsod sa Dumanjug miingon nga ang LMP daghan og natuki nga mga suliran kalabot sa serbisyo sa goberno sa panglawas hinungdan nga mao kini gihatagan nila karon og dakong pagtagad.

Iyang gitataw nga ang sagad sa mga sakit nga giatubang sa mga molupyo sa probinsiya mao ang tuberculosis, rabies ug uban pa.

Dinhi matud pa niya gitun-an karon sa LMP nga hatagan og universal PhilHealth Insurance. Si Garcia miingon nga ang mga mayor makig-alayon sa Department of Health aron matubag ang nag-unang panginahanglan sa health service.

Samtang si Revilla miingon nga hugtan nila ang pagmonitor sa mga health services sa mga probinsiya ilabi na dinhi sa Sugbo kay mao kini ang ikalima nga probinsiya nga gipahigayonan sa LMP sa usa ka Health Summit.

Busa alang kaniya kinahanglang makabaton og katumanan ang ilang mga nahisgotan sa maong panagtagbbo ug dili kay mahanaw lang daw aso

Midugang si Revilla nga aduna pay .79 pa ka mga probinsiya sa nasud nga ilang suroyon aron hisgotan usab ang maong katuyoan, sa ingon labing maatiman ang panglawas sa tanang Filipino.

Apan ang mahinugdanon matud pa niya mao ang abag sa mga lokal nga opisyal sa kagamhanan aron motunhay ang maong proyekto. - BANAT NEWS

[marqi_20]

Tugpahanan sa Bantayan ug Camotes ayuhon

CEBU, Philippines - Aron nga labing molig-on ang ekonomiya sa Sugbo ilabi na sa natad sa turismo, ang kagamhanan ning lalawigan gitakda nga mopaayo ug mopalambo sa duha ka tugpahanan nga nahimutang sa isla sa San Francisco, Camotes ug sa lungsod sa Santa Fe, sa isla sa Bantayan.

Kini ang gibutyag ni Engr. Eulogio Pelayre, hepe sa Provincial Engineering Office ngadto sa mga sakop sa media kalabot na sa plano ni Governor Gwendolyn Garcia sa pagpa-develop sa nahisgutang mga airport.

Matud pa ni Pelayre nga unahon sa pagpaayo sa Kapitolyo ang run way sa duha ka tugpahanan ug tukoran usab kini og terminal ingon man hangar.

Midugang si Pelayre nga labi kining makapalambo sa ekonomiya sa lalawigan sanglit ang eroplano mao may usa sa matang sa mga sakyanan nga dali kaayong makahakot sa mga bisita nga mosuroy sa nagkalainlaing lugar sa lalawigan sama sa Camotes ug sa Bantayan island.

Hinuon dili lamang mga turista ang katabangan niini kundili ang mga negosyante usab sa maong mga lugar makapahimulos usab sa pagbul-og sa ekonomiya sa ilang mga dapit nga nahimutangan sa maong mga tugpahanan.

Sa pagkakaron gikuwenta pa ang katibuk-ang magasto sa kagamhanan sa lalawigan ning maong proyekto. - BANAT NEWS

[marqi_20]

Overseas job fair gihugopan sa aplikante

CEBU, Philippines - Gihugopan sa kagatosan ka mga aplikante og trabaho alang sa gawas sa nasud ang overseas job fair sa Cebu Public Employement Services Office (PESO) sa Kapitolyo kagahapon.

Ang pagpanawat og aplikante didto himoa sa Cebu International Convention Center (CICC) sa dakbayan sa Mandaue.

Si Julius Chua nga maoy pangulo sa maong buhatan miingon nga ubay-ubay ang ilang giklasipikar nga may purohang makatrabaho sa gawas sa nasud.

Kini human sila mopasar sa interview nga gipahigayon sa mga sinaligan sa mga kompaniya sa gawas nga nagkinahanglan og mga trabahante.

Matud pa ni Chua nga nagkadaiyang mga trabaho ang gitanyag sa nagkalainlaing kompaniya nga naglakip sa mga medical work alang sa mga hospital, engineering, driver, mga construction worker ug uban pa.

Si Chua miingon nga narehistro na daan sa ilang buhatan ang sagad sa mga aplikante nga misalmot kagahapon sa maong overseas job fair

Gitataw niya nga ang maong job fair maoy kabahin sa programa ni Gobernador Gwendolyn Garcia aron makatabang sa mga aplikante paingon sa Taiwan, Thailand, China, Korea ug uban pa. - BANAT NEWS

[marqi_20]

Gwen mikulit og kasaysayan

CEBU, Philippines - Giangkon sa mga kadagkoan sa Department of Agriculture (DA) nga si Governor Gwendolyn Garcia mikulit og kasaysayan sa nasud pinaagi sa pagpanghatag niini og insurance sa mga mag-uuma ug mga mangingisda sa tibuok probinsiya.

Matud pa ni Regional Executive Director Leo Caneda sa DA7 nga ang maong programa sa gobernador pinaagi sa Philippine Crop Insurance Corporation (PCIC) maoy labing una sa tibuok Pilipinas.

Gibutyag sa director nga wala pay usa ka local government chief executive nga sama ni Gobernador Garcia nga nakahunahuna sa pagpasiguro sa mga mag-uuma ug mananagat nga naglakip sa ilang mga tanom ug kahayopan ingon sa mga bangka ug mga pukot.

Midugang siya nga ang gobernador mihimo og programa nga haom kaayo sa bag-ong lakat sa panahon kon climate change nga nasinati karon sa taga Sugbo ug sa Pilipinas.

Giawhag usab ni Caneda ang ubang mga lider sa ubang lalawigan sa Pilipinas sa pag himo ug pagsagop sa susamang mga pamaagi aron malikayan ang hulga sa kadaot sa panginabuhi sa mga mag-uuma ug mananagat sa nasud sa panahong hulgaon sila sa mga katalagman.

Gawas ni Caneda, si manlalaban Juvy Bernabe, ang presidente sa PCIC nakadayeg usab sa gihimo sa Gobernador sa Sugbo tungod kay nagpasabot kini nga si gobernador Garcia migamit sa iyang hustong liderato sa pagserbisyo sa katawhan sa lalawigan.

Matud pa niya usa kini ka makasaysayanon kaayong programa sa kagamhanan sa lalawigan sa Sugbo sa pagpanguna ni Gobernador Garcia. - BANAT NEWS

[marqi_20]

Mananagat ug mangingisda may insurance

CEBU, Philippines - Mikabat sa kapin usa ka libo ka mga mag- uuma ug mananagat sa habagatang bahin sa Sugbo ang nakadawat sa Accident insurance card bunga sa programa ni Governor Gwendolyn sa pagpasiguro sa maong mga molupyo pinaagi sa Philippine Crop Insurance Corp. ( PCIC).

Ang pagpang-apud-apod sa 1,163 ka mga insurance card gihimo sa gobernador niadtong Biyernes didto sa lungsod sa Argao.

Ang mga benepisyaryo gilangkoban sa mga molupyo sa 7 ka mga lungsod nga naglakip sa Argao, Alcoy, Boljoon, Dalaguete, Oslob, Samboan ug Santander.

Ang midawat sa maong mga card mao na mismo ang tagsatagsa ka mga mayor sa nahisgutang mga lungsod ug sila nay gitahasan sa paghatag niini ngadto sa mga mag-uuma ug mangingisda sa ilang tagsatagsa ka mga lungsod.

Ang gobernador mipasabot nga ang iyang tuyo sa pagpaubos sa mga benepisyaryo sa pagsiguro mao nga aron kahatagan sila og seguridad lakip na ang ilang kaumahan o kaha ginamiton sa panagat sa higayong muabot ang dautang panahon.

Gawas sa kinabuhi sa mag-uuma ug mananagat, lakip usab nga gipasiguro sa gobernador ang ilang mga tanom ug mga hayop ingon man mga sakayan sa kadagatan ug mga pukot nga maigo sa kalamidad nga mugna sa kinaiyahan.

Gitambongan ang maong kalihokan ni Deputy House Speaker ug kongresista sa ikaduhang distrito sa Sugbo Pablo Garcia, mga mayor sa segundo distrito, mga sakop sa hunta probinsyal; executive director Leo Caneda sa Department of Agriculture-7 ug manlalaban Jovy Bernabe, presidente sa PCIC. - BANAT NEWS

[marqi_20]

Pamilya gimasaker

NAKURAT ang mga lumolupyo sa Palm Lodge, Barangay Tabunok, dakbayan sa Talisay, alas 8:00 kagahapon sa buntag, tungod sa pagmasaker sa usa ka pamilya diin nikalas sa unom ka kinabuhi.

Lakip sa nagpusil sa kaugalingon mao ang kanhi seaman nga amahan nga suspek sa masaker human gikatahong gisanapan sa grabeng pangabubho sa iyang asawa ug giingong nag-antos usab sa nervous breakdown.Si Emmanuel Ponce, 55, kanhi seaman maoy mipusil-patay sa iyang asawa nga si Melinda Ponce, 53, branch manager sa BDO sa Taboan, dakbayan sa Sugbo ug usa ka ultra marathoner.

Lakip sa patay ang iyang mga anak nga sila si Elaine Grace, 26, kanhi ERUF volunteer; Heether Joy, 25, nurse; Emlin Bridge, 18, radiologist; ug katabang nga si Anastacia Deniega, taga Barangay San Isidro.

Si SPO1 Mikie Espina, ang imbestigador sa Talisay City Police Station nga nahinabi sa dySS Super Radyo niingon dunay sakit nga nervous breakdown si Emmanuel hinungdan nga usa kini sa ilang gitan-aw sa krimen.

Matud niya nga sa ilang pag-abot sa lugar, ilang naabtan ang mga biktima ug lakip si Emmanuel kinsa nagpusil dihang naabot ang mga niresponding kapulisan.

Gikataho nga naluwas ang kamanghurang anak nga si Embrelaince Therjoy, 13, human gihatagan og kahigayunan sa amahan nga motaho sa kapulisan ang tinuoray’ng hitabo kun nganong nahimo niya ang krimen.

Ang bata nigawas sa ilang panimalay apan diha ra siya sa daplin sa karsada nga wa sa kaugalingon nga nagsigig hilak nga wala masayod unsay iyang buhaton gumikan kay nakurat sa insidente.

Nabantayan sa mga nagpakabanang silingan nga dunay dautang nahitabo sa pamilyang Ponce, sanglit ang bata diha sa gawas nga wa sa kaugalingon ang panglihok niini hinungdan nga ilang giduol ug gitabangan.

Ang bata nipahibalo sa iyang mga silingan nga gisugo siya sa iyang amahan nga ipahibalo ngadto sa kapulisan ang nahitabo sa ilang pamilya nga iyang gipatay hinungdan nga gihatagan siyag kahigayunang mabuhi.

Tungod niini, dali nilang gipahibalo ang kapulisan sa insidente ug gituyokan sa mga tawo ang panimalay sanglit naa pa sa sulod sa panimalay ang suspetsado.

Pag-abot sa mga pulis niabag usab kini sa pagsirkulo sa panimalay aron masigurong dili makagawas si Emmanuel, apan kalit lang nilang nabati ang usa ka sipang buto sa armas.

Dihang gisusi didto sa sulod sa panimalay, nagbuy-od diha sa sala ang patay’ng lawas ni Heether Joy ug Emlin Bridge diha sa sala, samtang si Elaine Grace, didto sa iyang lawak diha sa katre.

Ang asawa niining si Melinda, ug katabang nga si Deniega, ingon man si Emmanuel, diha sa kusina nagbuy-ob.

Si Ellaine ug inahan nga si Melinda, nadala pa unta sa Talisay District Hospital apan gideklarar nga dead-on-arrival (DOA).

Apan gilakip karon sa imbestigasyon sa kapulisan nga nagselos ang amahan ngadto sa iyang asawa tungod kay nagduda kini nga dunay laing lalaking gikabuangan.

Gani dihang wala namakabalik sa pagsakay og barko si Emmanuel, kanunay nalang silang magka-problema sa iyang pamilya.

Gipalayas na siya sa iyang asawa kaniadto hinungdan nga nagkabuwag silang duha, apan nagbalik pag-usab, apan dili na sila magtupad sa ilang kuwarto inig pangatulog.

Ang bana giingong naoperahan sa iyang ulo kaniadto dihang nagsakay pagbarko sa gawas sa nasud human giingong natagakan kinig gahi nga butang.

Gawas niining dunay mga report sa mga kabanay nga tiggamitan usab kinig illegal nga drugas, apan tanang anggulo selos ug sakit niini maoy usa sa gisubay sa kapulisan nga motibo sa krimen.

Ang mga residente sa lugar nakakunpermar usab nga makadaghan nang higayon nga gialarma sa kapulisna ug sa barangay si Emmanuel, kini human magbadhasbadhas sa ilang panimalay nga magdalag kutsilyo nga mohulga sa iyang pamilya nga pamatyon.

Ang mga silingan sa lugar mibutyag nga sa wala pa ang krimen nakabantay sila nga dunay nagdahunog sa panimalay sa Ponce, daw dunay mga tawong nagginukdanay sulod sa panimalay.

Wala magdugay, ilang nabati ang sunod-sunod nga buto-buto sa armas.

Nahibaw-an lang dihang nigawas ang 13 anyos nga anak nga tulala.

Ang bata daling gisagop ni Bokal Julian Bacus Daan, diin pipila lang kametros ang gilay-on sa panimalay niini gikan sa panimalay sa pamilyang Ponce.

Hinuon, kagahapon ang bata gikuha na sa iyang kabanay ug gipaubos sa counseling sa mga sakop sa Department of Social Welfare and Development (DSWD) tungod sa trauma niini.

Nakuha gikan sa crime scene ang .45 kalibre nga armas nga maoy gigamit sa suspek sa pagbuhat sa krimen, 2 ka live ammos, 2 ka slugs ug pito ka mga kabhang.

Gipatik sa mantalaang SuperBalita Cebu Oktubre 17, 2011.