Namatay samtang nag-***
Ni Flor V. Querubin
Wednesday, March 2, 2011
WA matiwas ang panagsawo sa dugos sa himaya sa usa ka American national ug sa iyang uyab nga public elementary school teacher kay giatake siya sa sakit sa kasing-kasing ibabaw sa kama sud usa ka hotel ug namatay.
Naalarma ang hotel staff sa BSM Hotel sa Brgy. Basak, dakbayan sa Lapu-Lapu, sa dihang nangayo og pakitabang ang usa sa ilang mga guest kay nilagom ang iyang pares sud sa ilang giabangan nga lawak.
Gisaysay ni SP02 Ernesto Francisco sa Crime Against Person’s Desk sa Lapu-Lapu City Police Office (LLCPO) sa dihang nahinabi sa Sun.Star Superbalita nga ni-check-in ang langyaw ug ang magtutudlo sa alas 10:40 niadtong Martes sa gabii sa BSM.
Ang American national giila nga si Henry Peterson Jr., 57, magtutudlo sa Eduworld International Language School sa abroad apan nagpuyo sa Unit 205 sa Mactan Oasis Garden, Soong-Mactan, Lapu-Lapu.
Siya minyo sa usa ka Cebuana, apan giingong di maayo ang ilang relasyon.
Samtang ang kauban ang 43-anyos nga public school teacher (gitago ang tinuod pangalan) nagtudlo sa Maribago Elementary School, giingong buwag sa bana, taga barangay Maribago.
Base sa pasiunang imbestigasyon ni Francisco ug P01 Franklin Bulaquia nga human sa kapin sa usa ka oras gikan sa ilang pag-check in, nangayo og assistance ang kauban nga babaye.
Dali nga nitawag sa Emergency Rescue Unit Foundation (ERUF) ang mga hotel staff.
Ila pang naabtan si Peterson nga way sapot ug ingon sa wa na magginhawa.
Gidali pagdala sa Lapu-Lapu City Hospital si Peterson apan gideklarar sa mga mananambal nga dead-on-arrival (DOA).
Matod pa ni Francisco nga atol sa pakighilawas sa langyaw ug magtutudlo, kalit nga nawad-an sa panimuot si Peterson.
Nisamot og karatol ang magtutudlo sa dihang adunay dugo nga nigawas sa ilong niini.
Way nakita ang mga imbestigador nga foul play sa lawas sa biktima ug gituohan nga cardiac arrest maoy hinungdan sa iyang kamatayon.
Nasayran gikan sa asawa ni Peterson nga ikatulo na ka higayon nga giatake sa sakit sa kasing-kasing ang biktima, niining higayona wa na siya matabang pa.
Ang asawa sa langyaw nagdumili sa pagpaila, taga-dakbayan sa Mandaue nga maoy nag-atiman sa death certificate sa Cosmopolitan Funeral Homes sa Pajo.
Gipatik sa mantalaang SuperBalita Cebu Marso 03, 2011.
Namatay samtang nag-***
Posting Permissions
