Gugma sa Hamtong
by
, 10-30-2013 at 10:44 PM (3064 Views)
May gugmang lumalabay lamang ug wala'y baroganan,
apan lahi ang pagbating inanay'ng gihulma sa kahiladman,
sinalikway apan pabiling nagmalig-on bisan pa sa mga unos,
bugtong halad lamang ang kaligdong niini ug katim-os.
Gisudyaan sa kadaghanan kining gugma sa hamtong,
daw sa kalipay'ng wala'y tapos di angayan makaangkon,
lood matud pa sa uban ug napuno intawn sa pagtamay,
busa boot na lamang unta itago mga luhang nidagayday.
may higayon sa ilimnon makahubog na lamang magpalaban,
nanghinaot nga ang pagbating gisalikway inanay malimtan,
apan dili mahimong ilubong ang pinitik nga talagsaon,
kining gugma sa hamtong, naanod na ug karon naulipon.
Hinalarang gituktok makadaghan ang pultahan sa dughan,
apan pabiling sirado ug sa umaabot daw dili kadangpan,
sayod akong gilantaw mo ang saad ning gugma sa hamtong,
ang matang sa gugmang dili mopakyas sa buhat ug pulong.