DUHA ka mga tawo ang nangamatay ug laing duha ang naa sa kritikal nga kondisyon human madasmagi kagahapon sa buntag sa awto nga gimaneho sa tawo nga gituohang nakainom.
Nangamatay diha-diha ang duha ka mga biktima tungod sa kakusog sa impact sa bangga alas 6 kagahapon sa buntag sa Salinas Drive, Barangay Lahug, dakbayan sa Sugbo.
Ang nangamatay giilang mao sila si Joselito Lopez, 43, taga Sityo Ponce, Barangay Capitol Site, ug si Gaudioso Bontilao, taga Kang-atis, Barangay Guba, dakbayan sa Sugbo.
Si Bontilao maoy nagmaniho sa motorsiklo nga may plaka 8989 GQ. Silang duha pulos mga kawani sa Philippine Amusement and Gamings Corporation (Pagcor).
Ang nakadasmag kanila mao si Gerard de la Cruz, 29, taga Camella Homes, Pahak, siyudad sa Lapu-Lapu, temporaryong' nagpuyo sa Nivel Hills, Lahug,
kanhi kawani sa Pagcor, nagmaniho sa Honda Civic nga puti nga dunay plaka YGX-365.
Samtang nangaangol nga anaa pa sa tambalanan giilang mao sila si Danny Valle, 37, taga Kalunasan, ug si Roel Cadiz, 33, taga isla sa Camotes, Sugbo.
Sa pasiuna nga imbestigasyon sa Traffic Division sa dakbayan sa Sugbo nagbutyag nga kusog nga nagdagan ang awto nga gimaniho ni De la Cruz gikan sa Nivel Hills.
Nisubay siya sa Salinas Drive paingon na unta mokuha sa iyang amahan nga kauban ra usab sa trabaho sa mga nangamatay.
Siya nialegar nga kalit lang nibagnos ang ligid sa sakyanan ug ni-skid og mga says metros dayon kalit nga niliko paingon sa pikas lane ug nisaka sa gutter paingon sa sidewalk.
Sa pagsud niya sa pikas lane, iyang naigo sila si Lopez ug Bontilao nga nagmotorsiklo.
Dihang nisaka na sa gutter, nangaigo sila si Valle ug Cadiz, dayon nibangga sa mahogany ug milapos paingon sa koral sa kan-anan sa dapit.
Sa interview sa Sun.Star Superbalita human gyud sa hitabo, si de la Cruz nga nahinabi sa Sun.Star Superbalita niangkon nga nakainom siya apan di hubog.
Matod niya nga nakatagpilaw usab siya samtang nagmaneho. Human niini, nitahan siya sa niresponding kapolisan ug temporaryong gitanggong sa buhatan sa Traffic Division.
Si Karen Lopez, asawa ni Joselito, niingon nga gikan pa sa Pagcor Casino ang iyang bana ug nisakay kang Bontilao paingon na mamauli dihang ilang gikasugat ang awto nga gimaniho ni de la Cruz.
Si De la Cruz, sa iyang bahin, niingon nga gikan siya sa iyang boarding house sa Nivel Hills ug paingon na unta mokuha sa iyang amahan sa iyang gitrabahoan nga casino.
Niangkon si de la Cruz nga nag-inom siya uban sa iyang mga higala nianang gabii.
Nakatulog pa siya dayon nimata og sayo aron sa pagkuha sa iyang amahan sa casino nga nagbase sa Waterfront Hotel-Lahug.
Matod sa amahan sa suspek nga nanghuwam sa iyang sakyanan ang iyang anak kay adunay tambungan nga kalihukan.
Nasayod na lang siya sa maong hitabo human gipahibawo sa iyang mga kauban kabahin sa aksidente.
4 nadasmagan; 2 patay, 2 kritikal | Sun.Star