“ Brad Naay nangatang sa gawas!”, mao nay una nakong nadunggan sa usa ka brad nga nag dali-dali og sumbong nako.
Sayo pa sa buntag, presko pa kaayo ko, pag abot nako sa tambayan, ga-andam man gud ko kay finals namo. Na hibulong lang ko kay perti mang daghanang brad nagtambay atong buntaga, nahibaw-an lang diay nako nga pag kagahapon ato, naka bira sila sa talamban, ambot ingon tong isa ka brad patay kuno, pero matod sad sa usa, fifty-fifty kuno. Ang nakapait pa jud sa nabirahan sa talamban, nadamay pa jud ang iyang uyab, kay iya man gi-uwang ang usa ka brad nga nagdala og tubo, siya na nuoy nabunalan.
Padayon silang nag storya, nalingaw sad kog paminaw, kay binirahay gud. Ang katapusan nakong nadunggan nga nisukol kuno tong “ulod” mao tung nibunot og .38 ang isa ka brad nga taas og buhok dayong gipusil kini. Pagkahuman perti nilang dagan kay naa kunoy pulis. Mao kini mga sugilanon nga mag palingaw nako taga buntag, tambay, storya-binirahay, unya inig ka hapon inom sa kokodine, storya gihapon binirahay unya inig kahubog mangita dayog mga “ulod”. Mao katoy balita nga nakatugaw namo atong buntaga, naa kunoy nangatang, pagkabalo nako, dretso kog tan.aw sa mga nawong sa akong mga brad og ni ingon nga, “saman sugaton nato?” kabalo ko nga nakulbaan ang uban, og ako pud labihan nakong kulba.a, pero kung ang kalagot, garbo, og ang pagpanghambog ang musolod sa imong utok di na siguro ka kahuna-huna og kahadlok. Mao sad toy nahuna-huna.an sa akong mga brad, nasayod gyud ko. Ni.ingon dayon ko nila nga, “kung mag duha-duha mog kuyog bilin lang mo, ang kato rang kurso ang mosugat para dili ta mabulabog” isog kunuhay ko sa panan-aw sa akong mga brad pero sa sulod, wa nako kabalo sa akong gibati, graduating pa jud ko ato nga semester, perting pas-pasa sa akong heartbeat, nga paminaw nako nga wala jud koy option kun dili sugaton ang mga nangatang, naa bitaw koy pusil bahala nani. Napulo mi kabuok ato, nilili mi sa tambayan sa mga “ulod” pero wa gyuy “ulod” bisag usa nalang, so, nakahukom jud mi nga nangatang gyud tong mga buang sa gawas. “ato silang gawson brad pakita nato nila kung unsa ta” akong gi encourage akong mga brad.
Tagsa-tagsa namo naay armas, gikan sa tubo padong sa pusil, og batangas. Didto mi agi sa tennis court kay haron dili mi masakpan og ma surprise ang mga “ulod” nga nangatang sa gawas. Dihang galakaw mi. wala jud koy laing mahuna-huna and kung dili patay ra. Wa na gani ko naka huna-huna nga akong uyab nag huwat na diay nako sa class room. Mag sabot paman diay mi sa among anniversary kung asa mi mangadto, naka tigom nasad gud mi og dako-dako kay mangadto kuno mi sa Malapascua. Wala nasad gani ko naka huna-huna nga birthday diay sa akong mama inig ka ugma, ga plano pa gani mi sa akong uyab og sa akong papa nga among I-surprise si mommy palitan daw ni papa og lechon, nya kami sa akong uyab mag bake og cake. Nalimtan nasad nako nga inig ka sunod semana, mag practice nami og paso para sa among graduation, Nalimtan nasad nako nga Friday karon, mangla-ag pa diay unta mi sa akong barkada kay bangkahan ko nila kay graduating gud ko, ako raman guy una naka graduate sa ila, ang uban tawn 1st year pa kay mga wamay klaro.
Ang nasulod sa akong huna-huna ato nga, presidente ko sa akong frat, dili ko dapat makit-an sa kong mga brad nga mag pa bayot bayot, unya among ipakita sa mga “tang-ina” sa gawas nga dili mi puede daog daogon. Ambot lag katong akong mga brad naa ba sad kaha to silay gipang huna-huna o pareho raba mi tanan.
“andama inyong mga kargada brad” ako silang gi-ingnan. “dili ta mag tapok para dili kaayo halata, ako bahala akoy starting basta kung mag kina-unsa back-api jud ko ninyo ha, dayon kanya-kanya dayon tag skirda mag abot lang ta didto sa atong tambayan” dali raman sad sila nka sabot, hinu-on pud naandan naman sad to namo, nabag-uhan lang ko kay kami man gud maoy gi-atngan, wa mi kaila sa among mga kontra, mao tong gi kulba.an ko gamay. Naka gawas na jud mi sa gate, og nakit-an dayon namong mga “ulod”, lima kabu-ok ambot lang sad ug ang mga “ulod” ba gyud kaha to, basta kay ga jacket man sila klaro kaayo naa silay dala nga kargada. Nihunong ko og nang hupaw og lawom kaayo. “bahala na ni”. Wala pami naka du.ol nakabantay na ang mga ulod namo, naa ra gyud ga barog atbang sa gate. Pag kakita nila nako, ang usa ka ulod nikalit lang og siyagit “ nanggawas ang mga “burikat” mga tol!!” perti diay nilang daghana, murag sa akong bana-bana abot silag baynte!, naa pa jud diay nag barog sa may jollibee og naa say lima nga nag barog sa orange brutus.
Pas-pas na kaayo akong “heartbeat”. Nitan-aw ko sa mga nawong sa akong mga kauban, mura silag kadaganun, pero dihang gibunot nako akong kargada, mura silag na ngisog, og ang isa nako ka brad nga taas og buhok ni kalit og siyagit “mga ‘ulod’ mag patay nata!!” sabay sa pag sinyas nga du-ol mo diri. Wala pa nag du-ol ang duha ka grupo, nag hulat lang jud mi nga du-olon mi. “brad naay lima sa luyo” taho sa usa ka brad. Murag daghan na ang nakabantay nga mga tawo kay naa ra bya mi daplin sa dalan, sa P.del Rosario street pa jud murag mahibulong na ang mga tawo og nganong naay ga sinyagitay nya gadala pa jud kog pusil. “bantay brad” nisyagit ang among usa ka brad, ug sunod ko nalang nadunggan ang tulo ka nag sunod-sunod nga buto.. ang mga tawo nag lumbaa.nay og dagan. Natumba gud ang statua sa jollibee kay didto man sila nag pinusilay og nabinunaly og tubo, sa luyo nako akong isa ka brad gi dunggab. Peritng daghanang dugo akong nakit-an, nihilak tawon tong brad nako nga taas og buhok dayong siyagit og “MAMA!”. Katong nag barog-barog sa may brutus, nidu-ol sa akong mga brad nga naa sa luyo nako.
“dagan burikat dagan!” mao kanay gisulti sa usa ka “ulod” nga nigukod sa akong isa ka brad.. naluoy ko gatan-aw niya kay 1st year pa raba tawn to siya, bata pa kaayo, unya gigukod pa jud og bugakhang isa ra tawn ka buto, og dali siyang naligid murag kahoy nga natumba, nabungkag man tingali ang iyang buko-buko kay nadul-it man gud pag kapusil. Gubot kaayo, og wa nako mahuna-huna-an wala na gani ko naka pabuto sa paltik nga akong gidala, grabe jud akong kahadlok kay perti jud nilang daghana.
“brad skirda perti nilang daghana!!” nisiyagit ang usa nako ka brad. nibarog nalang pud ko og pas-pas kaayong akong dagan, hadlok kaayo ko atong higayuna. Gikugod mi, wa nako kabntay kung pila to kabuok mura gyud og salida sa sine. Mura mig mga artista daghan kaayog mga usisero nga nitan-aw sa action. Didto mi dagan padulong sa Jakosalem among mga plano nangawala, basta nga makadagan mao nana.
Nang hunong mi dihang nakabantay mi nga wala na sila mogukod Murag ngawala naman sila nihunong mi sa may 64 mb, isa ka internet café sa may Kamagayan. grabe akong hangos naa bot na tingali to akong dila sa akong tiyan. Taod-taod naay nikalit og siyagit sa akong luyo: “patay kang burikata ka!!!” unya isa ka dakong buto BANG! Nanagan akong mga kauban lumba-anay og sulod sa Kamagayan samtang ako Nag hinuktok ra, ako gipahiran akong nawong, nahibulong ko ug nganong basa man kaayo, mura jud kog nanghilam-os, naa ga-agas sa akong ulo, mura man sag dili singot kay pilit-pilit man, unya pula-pula. Unya ang baho murag katong baboy nga among gi-ihaw pag birthday sa akong ig agaw… dugo diay to ni agas gikan sa akong ulo.. “buanga uy na igo ko” niluhod ko og ningisi, dayon sa pag higda, wala ko naka piyong dayon, kay naka hinumdum diay ko sa sabot namo sa akong papa nga surprison namo akong mama sa iyang birthday ugma, na hinumduman sad nako, nga hapit na diay anniversary namo sa akong uyab, gi-sugo man diay ko ato niya nga txtsan nako akong amigo nga taga malapascua kay para maka discount ko sa among cottage didto, og ang last nako nahinumduman nga nag storya diay mi sa among dean atong isang adlaw kay pa submitton ko og graduation speech kay summa cum laude diay unta ko… …. (END)
Sugilanon sa USa ka PRatman (short story)
Originally Posted by o3cara
Reply With Quote
Posting Permissions
