tampohan ko kini ug balik ug mahitungod kini ug barang.
Ang akong uyoan nga nahisgutan ko na kaniadto dri mahitungod sa mananaggal ang nakasinati usab ug barang.
Nagsugod ang tanan sa dihang niadto sila sa usa ka isla sa palawan diin may kalingawan. May pista diay sa balangay, busa anaay dakong hikay ug anaa usab bayle. Ang mga mangingisda sa Olanggo labi na sa barangay nga Tinggo ang kasagarangan nga kuyog sa akong uyoan. Kuyog usab kaniya ang duha ka mga igsoong lalaki. Maayog pamayhon silang tiyo kay lagi anaay kaliwat katsila. May igo pod silang salapi nga dala niadtong higayona kay bag-o paman sila nakatumod sa ilang nakuhang mga isda ug bat. Ang ilang panon nag-inom hadool sa sa baylehan ug sa dihang na igo na sa gahum sa ilimnong makahubog namayli sila. Perting sayaw ug nagkalandrakas nalamang sa sinayawan. Mintras namayle may nasigpatan si Tiyo Celso nga maanyag nga babaye, tataw nga lumad ang maong babaye sa maong lugar tungod sa iyahang pamanit. Gidool ni tiyo ang maong binuhat ug nagpaila siya. Nagkukabildohay sila ug maayo hangtod nga nanayaw silang duha.
Wala mabatyagi sa akong uyoan nga may mga mata diay nga puno sa kasina nga nagsige ug lutok kanila. May mga nangulitawo diay niadtong babaye nga nasuya sa iyahang gibuhat. Pipila ka gutlo ang nilabay ug gidool sila ug usa ka lalaki dala tikmod kaniya ug may giyawyaw nga mga pinulongan nga lugos mahisabtan sa akong uyoan. Nakamatikod ang iyahang mga igsoon ug kauban ug gitambagan si Tiyo Celso nga mamalik na lamang sa bangka. Tataw kaayo nga kun nagdugay pa sila may dakong kagubot ang moulbo tungod kay usa diay ka moros ang nasuya kaniya.
Nilabay ang mga adlwa ug gibaliwala na lamang nila tiyo ang maong panghitabo ug nibalik sila sa ilang gimbuhaton sa dagat. Apan si Tiyo Celso may gibating paglain sa iyahang kalawasan. Nagkaanam siyag kaluya ug daw may nang gimok sa iyahang kaunuran. Hangtod nakahukom sila nga magpahiling sa Ospital didto sa Manila. Walay nakita nga apan mga mananambal diha kaniya. Ang tag-iya sa panagatan nga adunahan nakadesidir nga magpa ospital na lamang siya para mabatyagan ug mahiling siya sa mga doktor. Apan nagkadugay nagkagrabe ang iyahang kahimtang, may mga higayon nga anaay mogawas nga uhipan, bakokang ug ok-ok sa iyahang baba. ilong ug dunggan. Ang mga mananambal ug nars sa maong tambalanan wala ka makatoo sa ilang nasaksihan. Nakahukom na lamang ang mga kabanay ug kaigsoonan ni Tiyo nga ipauli na lamang siya sa isla ug magpaabot na lamang sa hukom sa kahitas-an kay daw wala nay kaayohan ang gipamati niya.
Pipila ka adlaw ang nilabay ug nag-antos na lamang si tiyo sa ihang gihambin nga kasakit. May usa ka paryente nga nakadungog sa nahitabo kaniya ug nibisita. Nahisgutan nila kun unsa ang mahimong hinungdan sa nahitabo kaniya. May kaila ang maong paryente nga usa ka bangiitan nga mamarang sa palawan. Gitawagan niya kini ug gisukna kabahin sa gihambin sa akong uyoan. Matod sa maong mamarang siya ang nagbutang sa maong barang ni tiyo tungod lamang sa kasina atong lalaki nga nangulitawo usab sa iyahang gikasayaw nga babaye. May usa na lamang daw ka semana ang tagal sa kinabuhi ni tiyo celso busa makiangayon nga moabot siya sa palawan sa dili pa mapupos ang maong tagal.
Walay paglangay bisan pa sa kaluya sa iyahang luwas gidali nila ug layag ang palawan. Dagkong balod ang nisugat kanila apan gibaliwala lamang kini para lamang matambalan ang barang nga nahiagoman ni Tiyo Celso. Naabot sila sa palawan sa ikaupat nga adlaw ug gidali sa mamarang ang seremonyas sa pagtangtang sa barang tungod kay dugay-dugay kini una makuha. Ubay-ubay ang matang sa mananap ang nakuha gikan sa iyahang lawas.
Apan pagkasunod adlaw nabatyagan ni Tiyo Celso nga may nang gimok pa sa iyahang kaunuran ug gibahibalo dayon ang mananambal. May usa diay nga nataligam-an,usa ka gamayng bakukang nga matod pa sa mananambal mao ang pinakaintapan sa tanan. Diha-diha giseremonyasan kini ug gikasab-an pa sa mananambal nganong nagmagahion kini pag gawas. Dakong pasalamat ni Tiyo Celso sa mananambal nga mao pod ang nagbarang diay kaniya. Nahimo nang tawhay ang paminaw ni Tiyo Celso paglabay sa pipila ka adlaw. Hangtod ning panahona, wala na gayud siya nakaako pa pag adto sa palawan bisan pa man ug ang ilang panginabuhian anaa sa dagat. Mas gipili pa niya nga ari na lamang mangisda sa hadool human sa maong kasinatian.
Isip magtatampo nga nagsaysay niining maong kasinatian hangtod karon dili gihapon makatoo nga may barang gayud diay. Matod usab ni Tiyo Celso mismo, nga niadtong panahona siya nadutlan sa barang tungod usab sa kaminos sa iyahang pagtoo sa Labawng Magagahom..
Re: MERGED: Your ghost/paranormal encounters/stories/pictures
Originally Posted by ninjaintraining*
Reply With Quote
Posting Permissions
