Originally Posted by
fatso
Bro reeses....sabado na pud..share ug unsai sunod nga kabanata sa imong panghitabo karon diha.
More stories please!
Duna koy e share ninyo bahin sa among lugar sa Lapu-lapu City. Siguro familiar ninyo ang Timpolok nga parti sa Barangay Babag I. Usa ni siya sa mga pinaka daghang fish ponds nga lugar sa Opon. Taga diri ang kaliwat sa akong mama ug naa mi diri karon nagpuyo.
Matud pa sa akong mga katiguwangan, nga kani-adto, banwa kaayo ning lugara ug maihap ra ang namuyo. Daghang mga civilians ug mga guerilla sa panahon sa WWI ang gipamatay ug gilubong aning lugara. Gidungog pod ni siya nga daghang abat (ongo) ug mga dili ordinaryong panghitabo.
Ang mga istorya kay base ni sa akong kaugalingong experience ug sa akong mga higala/paryente:
1) Agta/White Lady sa white house:
Kung padung ka sud sa Timpolok, makita nimo ang white house sa left side mga few meters away sa Aldea Subd. Gitawag pod ni siyang "Balay sa Amerikano", kay Amerikano lagi ang tag-iya. Murag gi abandunar na ni siya kay tua na sa gawas sa nasud namuyo ang tag-iya. Ug sa akong nahibaw-an, lain na karon ang tag-iya sa maong balay.
Sa wa pa na matukod ang subdivision, mahadlok na gyud mo-agi ang mga taw diha ilabi na kung moabot na ang kagabhion. Tungod sa kamingaw sa lugar, tagsa na lang kaayo ang mga sakyanan ang musud. Usa pa, gidungog nga dunay white lady ang mag pasu-paso sa palibot sa balay ug daghan ang nakakita.
2006 - Nag work ko sa Call Center ug kadlawn akong trabaho. Ready na ko ana mga 3 a.m. Kini laging wa tay kaugalingong service, mag atang ra ko ug pedicab (common name kay tricycle). Usahay, maka timing ko nga naa dayo'y mo-agi nga tricycle pero duna poy mga higayon nga nihit kaayo ang sakyanan. Bisag aware ko sa mga panghitabo sa lugar, mapugos kog lakaw ug mga 50-60 meters padung sa Aldea para didto ko mag atang ug masakyan. Ngit-ngit kaayo nang lugara kay lagyo kaayo ang mga posti sa suga.
Dihang nagkaduol na ko sa white house, nisugod na ug panglimbawot akong balhibo. Wa koy 3rd eye, pero nakamatikod gyud ko nga naay dili ingon nato ang naa sa akong palibot. Derecho akong panan-aw ug naghinay-hinay kog pangadye. Nakadungog ko ug naay nanitsit nako gikan sa dakong kahoy tupad sa white house. Wa lang nako panumbalinga ug nikusog pagsamot akong lakaw, nagdagan na ko. Ambot ug ngano, akong gi lingi. Nakit-an nako ang dako kaayong anino nga murag naay baga. Nisutoy kog dagan. Pag abot nako sa gate sa Aldea, wa abti ug 2 minutes, dunay tricycle ang ni-agi gikan sa kung diin ko gikan. Pagsakay nako, gisultian kos driver nga nakit-an kuno ko niya nga naglakaw ug gibosinahan ko pero wa kuno ko maminaw. pero sa tinuod lang, wa gyud koy nadunggan nga bosina sa tricycle. Gilamat kuno ko.
Duna poy higayon nga nag atang ko ug masakyan sa dan. Same time. Mga 10 minutes nalang, wa gyu'y ni-agi nga tricycle, so napugos na pod kog lakaw. Aguy kay may nakit-an man kong nagbarug sa unahan atbang gyud sa white house. Di kaayo nako maklaro kay mga 30 meters pa akong distansiya. Babaye nga taas ug buhok ug naka puti. Nidagan ko pauli oy! Sukad ato, nangontrata nalang kog tricycle driver nga mokuha nako kada kadlawn.
Dili ra ka usa o ka duha ni nako na experience.
2) Lungon nga naglutaw
Gidungog napod diri sa among lugar nga may lungon nga maglutaw sa tungang gabii kung mag uwan.
Namatay to akong iyaan. Ang ilang balay kay luyo ra sa amoa. Anang gabhiona, schedule sa pamilya sa akong igsoon ang mo bilar. Uwan-uwan to ug mga late na sila naabot sa namatyan. Dugay-dugay sila nga nakakanaug sa sakyanan kay kusog-kusog ang uwan. Nangita ra silag timing nga mohinay una sila manganaug sa kotse. Sulti sa akong pagumangkon, duna kunoy nikalit ug agi sa ilang atubangan nga panun sa mga taw nga naglakaw, nagpa uwan, nag dala ug kandila nga nagsunod sa lungon. Ang ilang gikahibugnan, ngano naglutaw ang lungon ug wa kini alsaha. Sila jud tanan ang nakakita. Paglabay kuno sa panun, nikalit lang kuno ug ka wala.
3) Sumpayan sa sunod higayon........