Martes, Agosto 26, 2008
2 ka kampana gikawat
Dennes R. Tabar Sun.Star Superbalita
DUHA ka karaang mga kampana sa lungsod sa Dumanjug, sa Sugbo gipangkawat.
Ang duha ka mga kampana nga ginama pa niadtong 18 century gikan sa karaang kuwarta ug mga alahas sa mga lumolupyo gihangyo na untag P4 milyunes sa usa ka antique collector.
Ang kuwarta ug mga alahas inamot-amot sa mga tawo aron magama ang usa ka dakong kampana nga giparesan sa gamay nga kampana.
Nahitabo ang pagpangawat niadtong Huwebes pasado ala 1 sa kaadlawon sa usa ka kapilya sa barangay Pawa, 10 ngadto sa 13 ka kilometros gikan sa barangay Poblacion.
Ang patron sa barangay mao si Senior San Jose nga magpista karong tapos buwan.
Ang mga lumolupyo sa maong lugar nagsugod na sa ilang novena matag gabii.
Gumikan sa nag-angat nilang pista, ang duha ka mga kampana ila usab nga gipagawas.
Ilang gihulagway nga ang usa di madaog og usa lang ka tawo samtang ang gamay maalsa lang og usa.
Si Senior Insp. Ricardo Nayne, hepe sa Dumanjug police station, nibutyag nga ang dakong kampana adunay gilapdon nga 22 pulgadas apan adunay gibug-aton nga 60 kilos ug ang usa aduna lay 10 ka pulgadas ang gilapdon.
“Ila man ning gitagoan kay karaan lagi. Unya adtong higayona gipagawas kay hapit nang pista,” asoy ni P01 Reynante Locaylocay nga nahinabi sa Sun.Star Superbalita.
Apan niadtong Miyerkules sa gabii, human sa ilang novena wa kini nila mahipos ug pagkabuntag sa Huwebes nabantayan sa mga lumolupyo nga wa na diha ang duha ka mga kampana.
Si barangay Kapitan Arnulfo Singson kinsa maoy ni-report ngadto sa kapulisan niasoy nga pasado ala 1 sa kaadlawon niadtong Huwebes dunay nakakita og tulo ka motorsiklo nga nag-parking kilid sa ilang kapilya.
Ang matag motorsiklo adunay tulo ka mga tawo nga sakay.
Ang kapulisan nagtuo nga ang maong mga tawo maoy nagkawat sa duha ka mga kampana.
Matod ni Locaylocay nga nasubo kaayo karon ang mga parokyano sa maong barangay tungod sa pagkahanaw sa kampana.
“Kadto gud siya, Sir, ingon nila mga karaan tong kuwarta ug mga alahas giamot-amotan sa mga tawo ba unya gipalanay gihimog kampana,” hulagway ni Locaylocay.
Gani sigon sa nasayran aduna nay usa ka negusyanteg antique dinhi sa Sugbo ang niadto sa barangay Pawa aron unta paliton ang kampana og P4 milyunes pesos.
Apan wa sila mosugot tungod tungod sa sentimental value niini ug gawas pa kabilin kini sa ilang katiguwangan.
Ang kapulisan sa Dumanjug nagtuo nga gumikan sa maong estorya daghan ang nagka-interest sa maong kampana.
Sa pagkakaron ang kapulisan nagpadayon pa sa ilang imbestigasyon samtang dako ang ilang pagtuo nga taga diha ra sa ilang dapit ang nagkawat niini.
“Naa pa to diri. Posibleng gitagoan lang sa to kay bug-at man to,” matod ni PO1 Locaylocay.
(Agosto 26, 2008 isyu
2 ka kampana gikawat
Reply With Quote
Posting Permissions
