Cebu local news (daily update)

[account]

---

Nalzaro: Modus sa mga taxi drivers

GAWAS niining mga binuang sa mga badlungon nga mga taxi drivers nga lubagon (overcharging) o tulison ang ilang mga pasahero, laing modus karon sa kolukoy nga mga driver ang angayan bantayan sa mga pasahero labi pa sa mga kababayen-an. Usa ka college professor ang misugilon kanako nga ang iyang babayeng estudyante hapit malugos sa usa ka taxi driver. Maayo gani kay naka-eskapo siya. Mao ni ang estorya.

Ang maong babaye misakay og taxi gikan sa iyang eskuwelahan ug nagpahatod sa dakbayan sa Mandaue. Namatikdan sa maong estudyante nga nagtabon sa iyang nawong ang driver og labakara. Unya nagpa-ubo-ubo. Nagtuo ang pasahero nga nanabon lang sa nawong ang driver kay gi-ubo. Mireklamo ang pasahero kay medyo init busa gipakusgan sa driver ang aircon. Nanimaho og daw air freshener ug kalit lang nalipong ang babaye.

Have something to report? Tell us in text, photos or videos.

LUGUSON UNTA

Nahipughat na lang ang babaye sa pagbalik sa iyang panimuot nga didto na sila magparking sa usa ka awa-aw nga lugar sa North Reclamation Area diin mihinay-hinay na og abre sa iyang zipper sa iyang pantalon ang driver. Giti-unan og kutsilyo ang babaye sa driver. Apan maayo kay nakasukol siya og nakagawas sa taxi ug dayon nakadagan.

Misibat usab dayon ang driver. Wala niya makuha ang plate number ug ang body number sa
taxi unit. Nahitabo kini mga alas 2 sa hapon.

Mao kini ang bantayan sa mga pasahero labi pa sa mga dalaga. Mas maayo nga sa dili pa mosakay sa taxi, kuhaon ang plate number o body number og ang pangalan sa taxi. Ug kon nakasakay kana unya duna kay namatikdan nga medyo kadudahan ang driver, naog lang dayon sa daghang mga tawo. O ba kaha singgit aron ma-alarma ang katawhan. Bantay gyud ta kay daghan ning mga binuang sa mga driver.

AKSIDENTE

Ang nahitabong karambola sa unom ka mga sakyanan sa sulod sa tunnel sa South Properties (SRP) masilbi untang leksiyon sa mga motorista ug sa atong mga traffic official. Butangan unta na og mga signs diha aron makabantay ang mga driver kay adunay kurba na diha. Tiaw ba nimo kanang unom ka mga sakyanan ang nahilambigit human mobangga ang delivery truck. Usa ang patay ug ubay-ubay ang na-anghol. Maayo gani kay softdrink ang karga. Unsa kaha kon hazardous materials ang karga niadto o ba kaha gasolina unya mosila-ob? Mas grabeng kadaot ang mamugna. Dili na unta pasudlon kanang mga trak de karga. Mao lagi anha ra ta manguros kon ma-igo na sa kilat.

(bobby@sunstar.com.ph)

Gipatik sa mantalaang SuperBalita Cebu Agosto 18, 2011.

[account]

Kapitan sa Toledo City giilisan



CEBU, Philippines - Gipalagpot diha-diha dayon ang kapitan sa barangay Awihao siyudad sa Toledo human midaug sa election protest ang iyang kontra sa nilabay’ng barangay ug SK election sa 13 botos lang nga labaw.

Ang bag-ong gi-proklamar nga kapitan nga tinuoray’ng mananaug mao si Erlinda Canillo, kinsa pormal nga gi-estalar sa sherrif sa Municipal Trial Court in Cities MTCC 7th Division sa dakbayan sa Toledo niadtong Lunes sa alas 9:00 sa buntag.

Kini human giluwatan sa MTCC Toledo City ang writ of execution niadtong petsa 8 ning bulana ug gi-serve dayun sa matag habig.

Subay sa nahipos nga impormasyon gikan sa Bantay Correspondent sa Bantay Radyo Allan Poloyapoy nga ang kampo ni kapitan Birao wala modawat sa maong order ug giingong nag-indefinite leave kini.

Subay sa resulta sa election protest sa sala ni MTCC 7th division Judge sa Toledo City Judge Vidal Gella nasuta nga si Canillo nakakuha og 1,029 botos batok ni Birao nga aduna lay 1,016 botos sa deperensya nga 13 botos pabor kang Canillo.

Ang bag-ong kapitan nga si Canillo nakadawat sa writ of execution niadtong Agusto 8, 2011 ug pormal dayun kining nanumpa atubangan ni manlalaban Fedirico Sanchez sa dakbayan sa Toledo.

Atol sa unang adlaw nga pag-asumir ni kapitan Canillo kagahapon nakasugat dayun kini ug problema kay nagpabilin pa man ang mga kawani sa barangay sama sa mga tanod, secretary, tresurero ug uban pang mga tinudlo ni kapitan Birao.

Gibutyag ni kapitan Canillo dihang na-interview sa Bantay Radyo nga nagdumili pagpahawa ang maong mga kawani tungod kay nagpaabot pa sila og kamanduan gikan sa Department of Interior and Local Government DILG.

Tungod niini tinguha karon ni kapitan Canillo nga magpatawag sa labing una niyang sesyon sa konseho sa barangay karong umaabot nga Domingo aron hulipan niya kadtong mga quo terminus nga kawani sa barangay.

Gisuwayan unta ning tigbalita ang pagkuha sa habig ni kapitan Birao apan way nakahatag og landline ingon man cell phone number niini sa mga kawani sa barangay. - BANAT NEWS

[account]

70 anyos nga pusher sikop

CEBU, Philippines - Bisan og senior citizen na ang 70-anyos nga lolo gisikop kini sa kapolisan gumikan sa usa ka warrant of arrest (WA) sa kasong pagpamaligya og shabu sa barangay Omapad dakbayan sa Mandaue sa milabay’ng kaadlawon. Ang gisikop mao si Rodolfo Lariosa, 70, residente sa maong dapit nga nakaeskapo atol sa gipahigayong buy-bust operation sa kapolisan.

Si Lariosa gisikop pinaagi sa giluwatang warrant of arrest ni Mandaue City RTC branch 55 Hon. Judge Estrella Alma Cinco sa kasong kalapasan sa RA 9165 sa pagpamaligya og illegal nga drugas.

Matud pa ni Insp. Wilson Abot ang hepe sa Station 5 sa Mandaue City Police Office nga atol sa ilang buy-bust operation niadtong milabay’ng bulan sa Hunyo si Lariosa nakasibat apan dunay mga ebidensiya nga ilang nakuha ngadto sa suspetsado.

Gikan niadto nagtagotago na si Lariosa ug sa milabay’ng kaadlawon dunay nakapahibalo sa kapolisan nga nasigpatan kini sa ilang panimalay hinungdan nga miresponde ang kapolisan ug nasikop si Lariosa.

Matud pa ni Lariosa kompiyansa siya nga mibalik sa ilang dapit sa pagtuo nga balewala na ang kasong iyang giatubang, ug miangkong iyaha nalang gipaabot gyud kung siya dakpon sa mga polis tungod usab sa iyang pangidaron. Kagahapon sa buntag pormal nang gibalhin si Lariosa ngadto sa Mandaue City Jail samtang anaa pa ang kaso niini sa korte. - BANAT NEWS

[account]

Tibuok dakbayan sa Sugbo paninduton

CEBU, Philippines - Human sugdi ang beautification project sa Osmeña Boulevard o dalan gikan sa Fuente Rotonda paingon sa Capitol building, ang tibuok siyudad sa Sugbo maoy isunod sa pagpaanindot.

Atol sa panagtagbo sa mga sakop sa Cebu City Beautification Committee nga gipangulohan ni Dame Mariquita Salimbangon Yeung, Cebu City Mayor Mike Rama ug Governor Gwendolyn Garcia niadtong Martes didto sa Cebu City Public Library, si Yeung miingon nga magsugod na sila sa pagtrabaho sa beautification project sa Sugbo karong umaabot nga Septembre 9, 2011. Matud pa ni Yeung nga mahimong mabulokon ang pagsugod sa beautification project sanglit madungan man kini sa kasaulogan sa adlaw nga natawhan sa grand great old man nga si kanhi Presidente Sergio Osmeña Sr.

Si Yeung miingon nga ang mga negosyante nga mitambong sa maong tigum miuyon sa sundon nila ang gihimo sa mga contractor sa Sugbo nga miangkon og bahin sa daplin sa Osmeña Boulevard nga maoy ilang paninduton.

Kini nagpasabot nga ang atubangan nga bahin sa mga establisamento sa mga negosyante dinhi sa Sugbo paninduton kay mao kini ang pagpakita nga gimahal nila si Serging Osmeña ug ang siyudad sa Sugbo.

Dugang pa ni Yeung nga ilang gitinguha nga mahuman ang beautification project sa siyudad sa dili pa ang kasaulogan sa pasko.

Sa iyang bahin si mayor Rama nagpasalamat sa suporta ni gobernador, Garcia kay humok kaayong misanong ang mga negosyante sa gipangayong kooperasyon nila human nila makita ang gisugdan nga beautification sa Osmeña Boulevard.

Giklaro ni Rama nga ang maong proyekto wala himoa sa dagkong mga personalidad kun dili gugma sa Sugbo nga gikinahanglang ipakita pinaagi sa pagpatahom sa siyudad. Si Gov. Garcia miingon nga dako kaayo og kahigayunan nga daghang mga Sugboanon nga ganahan og mapasigarbuhong mopuyo sa Sugbo tungod kay nindot na kaayo ang dakbayan tungod sa maong proyekto. - BANAT NEWS

[account]

80 kahong pinabuthang tuloy gisakmit



CEBU, Philippines - Gibana-banang moabot ngadto sa P100 mil nga balor sa 80 ka kahon nga isdang tuloy nga gisakmit sa mga sakop sa Anti Illegal Fishing Task Force didto sa lungsod sa Consolacion kagahapon sa alas 11:00 pasado sa buntag.

Ang hepe sa Anti Illegal Fishing Task Force Jojo Merencillo mibutyag nga gidakop nila ang maong mga kinahong isda tungod kay nakuha kini sa illegal nga pamaagi gamit ang dinamita.

Ang maong mga isda gikan pa sa barangay Kawit lungsod sa Medillen.

Matud ni Merencillo pagkabuntag nakadawat sila og text message gikan sa nagpailang concerned citizen kabahin sa pagdiskarga na sa mga kinahong isdang tuloy nga pinabuthan didto sa Medillen ug paingon nang ideliber sa Pasil dinhi sa dakbayan sa Sugbo.

Daling nagpahigayun og checkpoint ang mga sakop sa Anti Ilegal Fishing Task Force sa lungsod sa Consolacion ug pag-agi sa maong tulo ka trak de karga gipara nila kini ug giinspeksyon ang ginhawaan sa maong mga isda.

Diha-diha ilang nakompirmar nga binuthan kini hinungdan nga ilang gisakmit ang mga karga niini ug gi-hold ang sakyanan ug ang tulo ka dayber niini ug tulo ka truck boy.

Sa paghimo ning balita wala pa mahibaw-i kun si kinsa ang tag-iya sa maong 80 ka kahon nga pinabuthang tuloy tungod kay pulos wala motug-an ang mga drayber ug truckboy.

Ug gani nipadayag pa kini atol sa gihimong pagsukit sukit dihang gi-presentar sa kapitolyo kagahapon sa udto nga wala sila makahibawo nga pinabuthan ang isdang ilang karga tungod kay gisugo ra sila paghatud niini.

Matud pa duna pay laing duha ka trak de karga nga kauban sa pag-deliber sa maong mga pinabuthang isda apan nakasibat kini ug wala madakpi atol sa checkpoint kagahapon.

Si Gob. Gwendolyn Garcia mimando sa pag-apod apod sa maong mga isda ngadto sa mga pamilya nga biktima sa dakung sunog sa barangay Tejero ug Carreta ning dakbayan sa Sugbo kagahapong adlawa.

Apil sa gihatagan sa mga pinabuthang isda ang mga piniriso sa Cebu Provincial Detention and Rehabilitation Center CPDRC aron ipakaon. - BANAT NEWS

[account]

Ig-agaw sa bise mayor gikawatan

CEBU, Philippines - Mokabat sa P500 mil nga kantidad nga salaping Pilipinhon, dolyares, alahas ug uban pang mga butang ang nahanaw gikan sa ig-agaw ni Mandaue City Vice Mayor Glenn Bercede sa barangay Banilad, dakbayan sa Mandaue nga gituohang gisakiyo sa kaugalingong katabang nga babaye nga milayas sa ilang panimalay sa miaging gabii.

Ang biktima mao si Norman Bercede Perez, 43, usa ka magpapatigayon ug nagpuyo sa Bercede compound sa barangay Banilad sa maong dakbayan.

Ang suspetsadong katabang sa biktima mao si Shella Bacena, 31, lumad nga taga Pangasinan nga kapin sa tulo pa ka semanang katabang ni Perez.

Si SPO2 Fernando Gabutero sa kapolisan sa Presinto 4 sa Casuntingan Police Station sa Mandaue City Police Office (MCPO) nga nahinabi sa Banat News miingon nga alas-4 sa miaging kaadlawon wala na diha ang suspek.

Tungod sa pagduda ilang gisubay ang ilang mga kabtangan ug matud pa ni Gabutero diha nila madiskubrehing nahanaw na ang ilang P20 mil; $1,500; 100 New Zealand dollars; 200 Hongkong dollars; 200 Singaporean dollars, tulo ka mahalong relo de pulso, mga imported nga perfume ug mga duwaan nga gibanabanang kapin sa tunga sa milyon ang kantidad niini.

Dugang pa niya nga ilang gituohan nga sa adlawan pa gikawatan ang mga biktima ug hilom nga misibat nianang pagkagabii samtang nahinanok sa pagkatulog ang tanang sakop sa pamilya. - BANAT NEWS

[account]

Cellphone idili sa prisohan

CEBU, Philippines - Giduso ngadto sa konseho sa dakbayan sa Lapulapu ang usa ka resolution nga magdili sa cellphone nga makasulod sa bilanggoan.

Ang maong resolusyon gipangamahanan ni Lapulapu City Councilor Rodolfo Potot nga mao usab ang Chairman sa Committee on Police Fire and Penology sa konseho.

Base sa maong resolusyon nagpanday kini sa usa ka ordinansa nga did-an ang mga binilanggo ug ang mga mobisita pagdala og cell phone ug uban pang mga electronic communication devices sulod sa Lapulapu City Jail ug sa mga Police detention cells diin ang makalapas niini adunay ipahamtang nga silot ug multa.

Pipila na kahigayon nga dunay mga panghitabo atol sa ipahigayong operation greyhound sa mga sakop sa Bureau of Jail Management and Penology nga dunay masakpang nagtiner og cell phone nga mga binilanggo.

Gawas nga gidili kini sa balaod ug maisip nga ‘special treatment’ ang ilang gitagamtam tungod kay gitugotan sila sa mga jail guards.

Si Potot inubanan ni Kon. Eduardo Cuizon mipalabang og usa ka ordinansa atol sa ilang regular session kagahapon nga magdili sa mga binilanggo, detinado ug ang mga mobisita sa prisohan nga magdala og cell phone. - BANAT NEWS

[account]

Sunog 150 balay ugdaw



CEBU, Philippines - Gibana-banang mokabat sa 150 ka panimalay ang naugdaw sa nahitabong kapin usa ka oras nga sunog sa upat ka mga sitio sa barangay Carreta ug Tejero ning dakbayan sa Sugbu kagahapon sa udto.

Si Cebu City Fire Marshal Aderson Comar sa pakighinabi sa Banat News mibutyag nga ang sunog milamoy sa kabalayan sa sitio Tera Cora, sitio Sambag, sitio Laurente pulos sa barangay Tejero ug sitio Ponce 2 sa barangay Carreta ug midanyos og P2.6 milyones.

Matud pang Comar base sa nakuha nilang impormasyon nagsugod ang sunog diha sa boarding house nga iya sa usa ka Violeta Ligan. Gisusi pa sa mga arson investigators ang hinungdan niini.

Apan si Comar nagkanayon nga base sa impormasyon adunay nagluto sa maong balay ug nabiyaan kini, hinuon ilaha pa kining kompirmahon.

Si barangay kapitan Eduardo Lauron sa Carreta mibutyag sa mga tigbalita nga gibana-banang mokabat sa 80 ka panimalay ang naugdaw diha sa Ponce 2 ug kasamtangan nilang ipahimutang ang naapektahang pamilya sa Carreta Elementary School ug sa Carreta Sports Complex.

Matud pang Lauron nga ang lote sa Ponce 2 iya sa dakbayan sa Sugbu apan magpaabot pa siya sa resulta sa re-blocking sa maong sitio sa tuyo nga pagbutang og dalan aron dili maghuot ang mga bombero panahon sa sunog.

Samtang adunay gihimong emergency session kagahapon aron ideklarar nga under state of calamity ang iyang barangay.

Si Tejero barangay kagawad Gary Lao nagkanayon nga susamang emergency session ang ilang himuon sa tuyo nga makapagawas sila og hinabang sa mga biktima.

Si Mayor Michael Rama kinsa misusi sa nasunogan kagahapon walay laing unang paghulagway sa lugar kundili ‘congestion’ kun kahuot sa lugar. Si Rama nagkanayon nga kinahanglang adunay ipahigayong re-blocking ug paablihan sa kanhi mga dalan nga nabulit na karon sa mga balay. Kini human sa iyang pagsusi ang mayor miingon nga grabeng kahuot sa kabalayan ang iyang nasaksihan ug ang mga kaniadto gagmay’ng dalan misamot og kagamay.

Adunay mga dalan nga padulong sa MJ Cuenco diha sa may Tera Cora ug Ponce 2 ang naghuot tungod sa mga bungbong, paril ug mga lamesa sa mga namaligya.

“Ato ning tabangan. No matter what, they have to understand (re-blocking). We are only restoring what is ought to be. Because many years back, nindot ni pagka-porma,” matud pang Rama sa mga tigbalita.

Mipasalig hinuon kini nga kadtong maapektahan sa re-blocking dili pasagdan sa siyudad sanglit pangitaan sila og ilang kabutangan.

Si kanhi kongresista Raul del Mar ug amahan sa kasamtangang kongresista sa North District kinsa misusi usab sa nahitaboan nagkanayon nga mohatag usab sila og financial assistance base sa kung pilay nabilin sa ilang pundo karon .

Ang alarma nadawat sa kabomberuhan 11:45 ug nakontrolar kini 1:06 sa hapon human giisa ni Comar ngadto sa Task Force Bravo ang alarma nga girespondehan kapin sa 30 ka mga fire trucks.

Ang mga mirespondeng mga bombero gikan sa kabomberuhan sa Naga, Liloan, Consolacion, Minglanilla, Talisay, Mandaue, Lapulapu ug ang Cebu City . Lakip sa miresponde mao ang mga fire volunteers gikan sa Sto. Niño Fire Brigade, Basak, Emergency Rescue Unit Foundation, Filipino-Chinese Fire Volunteers ug pribadong kompanyang may water tanker.

Si Comar nagkanayon nga human sa nahitabo nga sunog sa Tejero kapin usa ka bulan na ang nakalabay naapil na sa ilang giplanuhang i-reblocking ang nasunog nga mga sitio sa maong dapit kagahapon.

Sumala pang Comar naghuot gyud ang kabalayan maong ang mga barangay penetrator firetrucks ray nakasulod sa gagmay kaayong dalan.

Samtang usa ka Arjie Cuevas,17, ang naangol human kini matumbahi og hollowblocks sa nasunog nilang balay dihang nanguykoy kini human sa sunog. Ang batan-on gihatagan og first aid sa mga sakop sa Philippine National Red Cross volunteers tungod sa samad niini sa tikod.

Aduna say ginang kagahapon nga nangita sa ilang motorsiklo nga giingong gidayongan og aswat sa mga tawo paggawas sa karsada apan dihang ilang gipangita wala na ang ilang Honda XRM nga motorsiklo. - BANAT NEWS

[account]

Kulata ang namatyan sa batan-on

CEBU, Philippines - Ang 17-anyos nga batang lalaki kinsa giingong namatay sa hazing gikatahong gikulata diay sa iyang ama-ama hinungdan nga namatay. Si SPO4 Alex Dacua sa homicide section sa Cebu City Police Office (CCPO) mibutyag nga nakadawat sila og report kagahapon sa buntag nga ang mikulata hinungdang namatay ang bayong-bayong nga si Jhon Michael Mina, mao ang iyang ama-ama nga si Richard Perez.

Ang kapolisan nagplano sa pag-imbitar ni Perez ug sa inahan sa biktima nga si Mylene aron ma-imbestigar bahin sa report nga ilang nadawat.

Giklaro ni Dacua nga base sa ilang pasiunang imbestigasyon gituohan nga si Mina nabiktima sa hazing tungod sa mga bun-og niini sa lawas.

Matud usab ni Dacua nga naghuwat pa sila sa resulta sa autopsy sa patay’ng lawas sa biktima aron masuta ang hinungdan sa iyang kamatayon.

Kahinumdoman nga niadtong Martes sa kaadlawon si Mina namatay sulod sa taxi nga iyang gisakyan paingon ngadto sa Cebu City Medical Center (CCMC) nga sa sayo gituohan nga gumikan sa iyang sakit nga ulcer. - Brenda D. Batuto ug Ryan Christopher J. Sorote sa The Freeman/WC (BANAT NEWS)

[account]

Merkado sa Lagtang giinspection

CEBU, Philippines - Ang Department of Public Works and Highways (DPWH) ug Environmental Management Bureau (EMB) mipahigayon og ocular inspection kagahapon sa buntag sa bag-ong merkado sa barangay Lagtang, dakbayan sa Talisay. Kini nunot sa reklamo ug pangangkon sa mga vendor sa merkado publiko sa Tabunok nga ang ilang balhinan nga bag-ong merkado sa barangay Lagtang usa ka floating structure tungod kay giingong mikawat kini sa sapa sa Mananga.

Si Talisay City assistant engineer Gamaliel Vicente nagkanayon nga positibo silang mopabor sa siyudad ang resulta sa maong inspection tungod kay sa sayo pa ang Department of Environment and Natural Resources (DENR) mi-inspection na sa maong lugar nga gitarokan sa bag-ong merkado. - BANAT NEWS