Mga colorum nga sakyanan likayan
NAGPASIDAAN ang Philippine Coast Guard (PCG) sa mga biyahero ug bakasyonista nga maglikay sa mga “fly-by-night” o colorum nga mga inter-island vessel o motor banca sa ilang pagpamauli o pagbakasyon sa tagsa-tagsa ka destinasyon sa sunod semana panahon sa Adlaw sa mga Santos ug mga Minatay.
Si Cebu Coast Guard Station Commander Capt. Rolando Punzalan nipahimangno sa publiko labi na sa langyaw ug lokal nga mga turista nga mamakasyon sa long weekend sa mga probinsya ug beach resort sa kapeligro pagsakay sa colorum nga mga sakyanan sa kadagatan labi na kon daghan ang mga pasahero.
Subay kini sa kamanduan nga giluwatan ni Rear Admiral Luis Tuason Jr., vice-commandant for operations sa PCG alang sa mas luwas nga biyahe sa mga pasahero nga maoy gitinguha sa Oplan Ligtas Undas 2012 sa Department of Transportation and Communications (DOTC).
Si Punzalan nagkanayon gawas nga way permit o expired ang permit gikan sa Maritime Industry Authority (Marina), ang mga fly-by-night nga vessels o motor banca way insurance alang sa ilang mga pasahero sa higayon nga makasugat og aksidente sa kadagatan.
Ang maong mga klase sa sakyanan sa kadagatan wa usay mga life raft o life vest, kon aduna man gani, kini depektuso.
“We would like to advise the public not to patronize colorum vessels and motor bancas which do not have appropriate Marina documents...they don’t have insurance for their passengers.” matod sa maong opisyal dihang nahinabi sa Sun.Star Superbalita.
Sa buwag nga pamahayag ni Tuason, siya niingon ang illegal nga aktibidad sa pipila ka oportunista nga mga operator angay nga sumpuon kay magbutang lang kini sa karisgo sa kinabuhi sa ilang mga pasahero.
Base sa obserbasyon ni Punzalan, anam-anam na nga ningdagsa ang mga pasahero sa mga pantalan sa Sugbo paingon sa ilang tagsa-tagsa ka destinasyon labi na ang mga estudyante sanglit semestral break na.
Gipatik sa mantalaang SuperBalita Cebu Oktubre 28, 2012.