Words of a predictable mind

Ambot unsa’y naa aning mga kinanto nga tindahan nga di man jud ko kalikay.

Alas kwatro y media sa kaadlawn, samtang nagsakay ko og jeep pauli, nakalabay ko’g tindahan nga aduna’y baligya nga kape ug pan. Kay gikan man ko’g binurgis nga inum, nabati nako ang panginahanglan sa pininoy nga pakighimamat. Mao nga dayon ko’ng nituktok sa atop sa jeep og nisyagit nga “bai, lugar lang.”

Sa pagnaog nako sa jeep, dayon nakong nasimhotan ang humot sa neskape ug maylo. Sa wa’y pagduhaduha, nilingkod ko tupad sa mga mamumuo nga padung sa ilang trabaho nya ni-order og init nga maylo. Ni-order ko og pransis nga tag singko ug duha ka pandesal nga tagmamiso kuyog sa akong maylo.

Samtang nagkutaw ko sa maylo, naminaw ko sa mga istorya sa mga mamumuo. Ang tupad nako nagyawyaw kabahin sa kawad-on sa bonus nila sa pabrika sa panahon sa pasko. Nitubag pud ang usa nga sa pipila ka tuig nga paghago niya sa maong pabrika wala pa jud mahitabo nga aduna’y pahalipay nga gihatag sa ilaha sa buwan sa disyembre. Lain pang usa, nisumbat pud nga matud daw sa ilan porman di kuno sila angayang tagaan og pahalipay kay daw kontraktwal ra man ilang trabaho.

Samtang gikutaw nako ang maylo gamit ang pransis, wa ko kalikay og pagkompara sa akong kaagi sa niaging pipila ka oras sa ilang kaagi sa pipila katuig. Sa dakong ka-uwaw nako, nakita nako nga sa niaging pipila ka oras ubay-ubay nga mahalong ilimnon ang akong nahurot ug plinatong sud-an ang nakaon. Kung buot sumahon, ang kinatibuk-ang nagasto namong barkada sa among paglipay-lipay labaw pa sa binuwang gasto nila sa pagpa-eskwela sa ilang mga anak ug pag-pakaon niini.

Ganahan na unta ko makigstorya sa ila kabahin sa gitawag nga inequality sa katilingban, apan nakita pud nako nga wa ko’y igong katungod kabahin ana ka’y ako mismo nakatagamtam sa maong kasayon apa wala nako gibalos sa mga naglisud.

Busa naminaw na lang ko. Sa kadaghang istorya nila, naabot sila kabahin sa pasko.

Ang usa ka asawa sa mamumuo nagyawyaw kabahin sa manatra, nga daw lagi wa nila makuha kay ang ilang kapitan sa brangay adunay gipalabi. Tantong pugong nako, pero ganahan na unta ko mangutana unsa nang manatra.

Apan sa pagdagan sa iang istorya, naka-realize ko nga din a man kinahanglan sabton kung unsa nang manatra. Sa kada pulong nga ilang gibuhian mabati nimo ang kalagot ug kasubo, nga bisan kinsang nagdako sa ininglis nga pulong makasabot ra gihapon.

Mabati nimo ang kahi-ubos. Mabati nimo ang lawm nga kaguol. Mabati nimo ang hingpit nga kalagot samtang naghagol-hol sa ilang kalisud.

Mao nga paghuman nako og kaonsa pransis ug pandesal, dayon ko’ng nilakaw. Nilakaw ug giparok akong ulo sa semento nga bungbong sa dakong ka-uwaw sa wala’y pagpakabana nako sa akong isigka-tawo.

Ikaw kuno sa ingon ana nga siwatsyon, kutob ra ba ka mo post sa facebook nga “ewwww, just saw dirty workers drinking coffee on the streets"?